Cough Syrup: ద‌గ్గు మందు తాగి ఆరుగురు చిన్నారులు మృతి.. ఎక్క‌డంటే?

Coldrif Syrup

Cough Syrup: దేశవ్యాప్తంగా కలకలం సృష్టిస్తున్న ద‌గ్గు సిరప్ (Cough Syrup) మరణాల వ్యవహారంలో కేంద్ర, రాష్ట్ర ప్రభుత్వాలు అప్రమత్తమయ్యాయి. మధ్యప్రదేశ్, రాజస్థాన్‌లలో కిడ్నీ వైఫల్యంతో పిల్లలు మరణించడానికి కారణమయ్యానన్న ఆరోపణలు ఎదుర్కొంటున్న కఫ్ సిరప్‌పై అధికారులు లోతుగా దర్యాప్తు చేస్తున్నారు. ఈ సిరప్ నాణ్యత, దానిలో విషపూరిత పదార్థాల ఉనికి, ఏదైనా సంక్రమణ వ్యాధుల (Infectious Disease) ప్రభావం ఉందా అనే కోణాల్లో నమూనాల పరీక్షలను ముమ్మరం చేశారు.

ముమ్మరంగా నమూనాల పరీక్షలు

ఈ దుర్ఘటనకు గల ఖచ్చితమైన కారణాలను తెలుసుకోవడానికి నేషనల్ సెంటర్ ఫర్ డిసీజ్ కంట్రోల్ (NCDC) బృందం మృతులు నమోదైన ప్రాంతాలను సందర్శించి, కీలక నమూనాలను సేకరించింది. ఈ నమూనాలను నిశితంగా పరిశోధించి, సిరప్‌లో ఏదైనా వ్యాధికారక అంశాలు ఉన్నాయేమోనని పరీక్షించనున్నారు. ఈ పరీక్షా ఫలితాలు వచ్చిన వెంటనే వాటిని తక్షణమే రాష్ట్ర ఔషధ అధికారులతో పంచుకుంటామని, దీని వల్ల తదుపరి చర్యలు వేగవంతం అవుతాయని సంబంధిత అధికారులు వెల్లడించారు.

Also Read: Abhishek Sharma: అభిషేక్ శర్మ సంచలనం.. ICC T20 ర్యాంకింగ్స్‌లో ప్రపంచ రికార్డు!

మరోవైపు, రాష్ట్ర ఔషధ నియంత్రణ అధికారులు సైతం అనుమానిత డ్రగ్ నమూనాలను సేకరించి, వాటిని పటిష్టమైన ల్యాబ్‌లలో పరీక్షిస్తున్నారు. ఈ పరీక్షల తుది నివేదికల కోసం ఇంకా వేచి చూస్తున్నారు. ఈ నివేదికలు సిరప్ తయారీ నాణ్యతలో లోపాలు లేదా నిషేధిత రసాయనాల వినియోగాన్ని నిర్ధారించగలవు.

రాజస్థాన్, మధ్యప్రదేశ్‌లలో మరణాల సంఖ్య

ఈ విషాద ఘటనల్లో అత్యధికంగా మధ్యప్రదేశ్‌లోని ఛింద్వారా జిల్లాలో ఆరుగురు పిల్లలు మరణించారు. వీరంతా ఆ కఫ్ సిరప్‌ను సేవించిన తర్వాత కిడ్నీ వైఫల్యం (మూత్రపిండాలు పనిచేయకపోవడం) కారణంగా మృతి చెందినట్లు ఆరోపణలు వచ్చాయి. ఇక రాజస్థాన్‌లోని సికర్ జిల్లాలోనూ ఇదే తరహాలో ఒక మరణం నమోదైంది. ఈ పరిణామాల నేపథ్యంలో వెంటనే స్పందించిన అధికారులు ఆ కఫ్ సిరప్ పంపిణీపై విచారణ, నిషేధం విధించారు. ముఖ్యంగా రాజస్థాన్‌లో పరిస్థితి తీవ్రతను దృష్టిలో ఉంచుకుని రాజస్థాన్ మెడికల్ సర్వీసెస్ కార్పొరేషన్ (RMSCL) తక్షణమే రంగంలోకి దిగింది. వారు ఈ సిరప్‌కు చెందిన ఏకంగా 19 బ్యాచ్‌ల అమ్మకం, వినియోగాన్ని తక్షణమే నిషేధించారు.

Follow us