బ్లడ్ క్యాన్సర్ అంటే ఏమిటి? ఎందుకు ప్రమాదకరం?

Blood Cancer

Blood Cancer: పరుగుల ప్రపంచంలో మనం తరచుగా చిన్నపాటి ఆరోగ్య సమస్యలను నిర్లక్ష్యం చేస్తుంటాం. కానీ కొన్నిసార్లు ఈ సాధారణంగా అనిపించే లక్షణాలే తీవ్రమైన వ్యాధికి సంకేతం కావచ్చు. నిపుణుల అభిప్రాయం ప్రకారం.. బ్లడ్ క్యాన్సర్ (రక్త క్యాన్సర్) ప్రారంభ లక్షణాలను సరైన సమయంలో గుర్తిస్తే చికిత్స ద్వారా కోలుకునే అవకాశాలు మెరుగుపడతాయి. ఈ క్యాన్సర్ లక్షణాలు కొన్నిసార్లు చాలా సాధారణంగా అనిపించినప్పటికీ అవి పదేపదే వేధిస్తుంటే మాత్రం అస్సలు తేలికగా తీసుకోకూడదు.

బ్లడ్ క్యాన్సర్ అంటే ఏమిటి? ఎందుకు ప్రమాదకరం?

శరీరంలోని రక్త కణాలు ముఖ్యంగా తెల్ల రక్త కణాలు అసాధారణంగా పెరిగి, సరిగ్గా పనిచేయని స్థితిని బ్లడ్ క్యాన్సర్ అంటారు. దీనివల్ల శరీర రోగనిరోధక శక్తి బలహీనపడుతుంది. ఇందులో ప్రధానంగా మూడు రకాలు ఉన్నాయి. ల్యూకేమియా, లింఫోమా, మైలోమా. ఇవి ఎముక మజ్జ, శోషరస వ్యవస్థపై ప్రభావం చూపుతాయి.

Also Read: రూ. 25.20 కోట్లకు కొనుగోలు.. బౌలింగ్‌కు దూరంగా ఆల్‌రౌండ‌ర్‌?!

గమనించాల్సిన కీలక లక్షణాలు

నిరంతర అలసట, పదేపదే ఇన్ఫెక్షన్లు: తగినంత విశ్రాంతి తీసుకున్న తర్వాత కూడా శరీరం అలసిపోయినట్లు అనిపిస్తే అది ఎర్ర రక్త కణాల లోపానికి సంకేతం కావచ్చు. అలాగే పదేపదే జ్వరం, జలుబు లేదా ఇతర ఇన్ఫెక్షన్లు రావడం మీ రోగనిరోధక శక్తి బలహీనపడుతుందని సూచిస్తుంది.

అకస్మాత్తుగా బరువు తగ్గడం, ఒంటి నొప్పులు: ఎటువంటి డైట్ లేదా వ్యాయామం చేయకుండానే వేగంగా బరువు తగ్గడం ఒక ప్రమాద హెచ్చరిక. దీనితో పాటు ఎముకలు, కీళ్లలో నిరంతర నొప్పిని నిర్లక్ష్యం చేయకూడదు. ఎందుకంటే రక్త కణాలు ఎముక మజ్జలోనే తయారవుతాయి.

చర్మంపై మచ్చలు, అసాధారణ రక్తస్రావం: దెబ్బ తగలకుండానే శరీరంపై నీలి రంగు లేదా నలుపు మచ్చలు కనిపించినా, లేదా చిగుళ్లు, ముక్కు నుండి అకస్మాత్తుగా రక్తం కారినా అది ప్లేట్‌లెట్స్ తగ్గుదలకి సంకేతం కావచ్చు.

రాత్రి పూట చెమటలు, గడ్డలు: రాత్రిపూట విపరీతంగా చెమటలు పట్టడం లేదా మెడ, చంకలు, గజ్జల వద్ద నొప్పి లేని వాపు (గడ్డలు) కనిపించడం లింఫోమా వంటి బ్లడ్ క్యాన్సర్ లక్షణం కావచ్చు.

బ్లడ్ క్యాన్సర్ ప్రారంభ లక్షణాలు సాధారణ అనారోగ్యాల వలె ఉంటాయి. అందుకే చాలామంది వీటిని వదిలేస్తారు. కానీ ఈ లక్షణాలు సుదీర్ఘకాలం కొనసాగితే వెంటనే వైద్యుడిని సంప్రదించి పరీక్షలు చేయించుకోవడం అవసరం. సరైన సమయంలో గుర్తించడమే ఈ వ్యాధి నుండి ప్రాణాలను రక్షించుకునే ఉత్తమ మార్గం.

Follow us