రెడ్ మీట్ వల్ల నిజంగా క్యాన్సర్ వస్తుందా?

Red Meat Cancer

Red Meat Cancer: ప్రస్తుత కాలంలో ప్రజలు తమ ఆహారపు అలవాట్లు, ఆరోగ్యం పట్ల చాలా స్పృహతో ఉంటున్నారు. ఆహారంలో శాకాహారం, మాంసాహారం రెండింటినీ భాగం చేసుకుంటున్నారు. ఫిట్‌గా ఉండటానికి చాలా మంది రెడ్ మీట్‌ను కూడా తింటుంటారు. అయితే దీనిని అతిగా తీసుకోవడం ఆరోగ్యానికి హానికరం కావచ్చు. రెడ్ మీట్ ఎక్కువగా తినడం వల్ల క్యాన్సర్ వస్తుందా? అనే సందేహం చాలా మందిలో ఉంటుంది. ఈ విషయంపై ‘ఆర్ట్ ఆఫ్ హెల్త్ క్యాన్సర్ సెంటర్’కు చెందిన క్యాన్సర్ నిపుణులు కీల‌క విష‌యాలు వెల్ల‌డించారు.

రెడ్ మీట్ వల్ల నిజంగా క్యాన్సర్ వస్తుందా?

రెడ్ మీట్ తినే ప్రతి వ్యక్తికి క్యాన్సర్ వస్తుందని చెప్పలేము. క్యాన్సర్ ముప్పు అనేది వ్యక్తి తినే ఆహారపు అలవాట్లు, తీసుకునే పరిమాణం, జీవనశైలిపై ఆధారపడి ఉంటుంది. మటన్, బీఫ్, పోర్క్ వంటి రెడ్ మీట్‌ను అధిక మొత్తంలో తీసుకోవడం వల్ల కొన్ని రకాల క్యాన్సర్లు, ముఖ్యంగా పేగు సంబంధిత క్యాన్సర్ వచ్చే ప్రమాదం పెరుగుతుంది. అయితే దీని అర్థం రెడ్ మీట్‌ను పూర్తిగా మానేయాలని కాదు. దీనిని పరిమితికి మించి తీసుకోవడం, వండే విధానం సరిగ్గా లేనప్పుడే సమస్య మొదలవుతుంది.

Also Read: Breast Cancer : మగవారికి కూడా రొమ్ము క్యాన్సర్.. లక్షణాలివే!

వండే విధానం ఎందుకు ప్రమాదకరం?

రెడ్ మీట్‌ను గ్రిల్ చేయడం లేదా అధిక ఉష్ణోగ్రత వద్ద వేయించడం, వంటి పద్ధతుల్లో వండినప్పుడు అందులో కొన్ని హానికరమైన రసాయన మూలకాలు ఏర్పడతాయి. ఇవి శరీరంలోని కణాలను దెబ్బతీసి, కాలక్రమేణా క్యాన్సర్ ముప్పును పెంచుతాయి. అంతేకాకుండా రెడ్ మీట్‌లోని కొన్ని అంశాలు శరీరంలో ప్రతికూల రసాయనిక మార్పులకు దారితీస్తాయి.

శరీరంపై ప్రతికూల ప్రభావం ఎప్పుడు చూపుతుంది?

ప్రాసెస్ చేసిన మాంసం అంటే సాసేజ్, బేకన్, సలామీ వంటివి ఆరోగ్యానికి మరింత ఆందోళనకరమని చెప్పాలి. వీటిని నిల్వ ఉంచడానికి ఉపయోగించే ప్రిజర్వేటివ్ రసాయనాలు శరీరంపై ప్రతికూల ప్రభావాన్ని చూపిస్తాయి. ఫలితంగా క్యాన్సర్ వచ్చే ప్రమాదం మరింత పెరుగుతుంది.

ఎలా తీసుకోవాలి?

మాంసంలో ప్రోటీన్, ఐరన్, అనేక ముఖ్యమైన పోషకాలు ఉంటాయి. ఇవి శరీరానికి మేలు చేస్తాయి. అయితే రెడ్ మీట్‌ను తక్కువ పరిమాణంలో తీసుకోవడం ఉత్తమం. మాంసంతో పాటు పండ్లు, కూరగాయలు, తృణధాన్యాలు, పీచు పదార్థం అధికంగా ఉండే ఆహారాన్ని తీసుకోవడం వల్ల శరీరం ఆరోగ్యంగా ఉంటుంది. సమతుల్యమైన ఆహారం, సరైన వంట పద్ధతులను పాటించడం ద్వారా ఆరోగ్యానికి వచ్చే ముప్పులను తగ్గించుకోవచ్చు.

Follow us