Mahashivratri 2026 : 2026లో మహాశివరాత్రి వచ్చే తేదీ ఇదే.. పండుగ మహత్యం తెలుసా!

శివుడికి ఎంతో ప్రీతికరమైన రోజు మహాశివరాత్రి. హిందువులు జరుపుకునే ముఖ్యమైన పండుగల్లో శివరాత్రి కూడా ఒకటి. శివపురాణంలో మహాశివరాత్రికి సంబంధించి అనేక కథలు ఉన్నాయి. ప్రతి సంవత్సరం మాఘ మాసంలోని కృష్ణ పక్షం చతుర్దశి రోజున మహాశివరాత్రి వస్తుంది. ఈ విశిష్టమైన రోజున శివుడిని భక్తి శ్రద్ధలతో పూజిస్తే సకల శుభాలు జరుగుతాయని శాస్త్రవచనం. ఈ నేపథ్యంలో కొత్త ఏడాది 2026లో మహాశివరాత్రి పండుగ ఏ రోజున వచ్చిందో తెలుసుకుందాం..

మహాశివరాత్రి హిందూ సంప్రదాయంలో ముఖ్యంగా శివ భక్తులకు అత్యంత ముఖ్యమైన పండుగల్లో ఒకటి. దేశవ్యాప్తంగా మహాశివరాత్రి పండుగను ఎంతో ఉత్సాహంగా ఘనంగా జరుపుకుంటారు. శివుడికి అంకితం చేయబడిన అతి ముఖ్యమైన పండుగగా మహాశివరాత్రిని పరిగణిస్తారు. ప్రతి సంవత్సరం మాఘ మాసం కృష్ణ పక్షంలో 14వ రోజున అంటే బహుళ చతుర్దశి తిథి రోజున మహాశివరాత్రి పండుగ జరుపుకుంటారు. మరి కొత్త ఏడాది 2026లో మహాశివరాత్రి (Mahashivratri 2026) పండుగ ఎప్పుడు వచ్చిందో తెలుసుకుందాం..

2026 కొత్త ఏడాదిలో మహాశివరాత్రి పండుగను ఫిబ్రవరిలో జరుపుకుంటారు. మాఘ మాసం బహుళ చతుర్దశి తిథి 2026 ఫిబ్రవరి 15వ తేదీన సాయంత్రం 5:05 గంటలకు ప్రారంభమవుతుంది. అనంతరం 2026 ఫిబ్రవరి 16వ తేదీన సాయంత్రం 5:34 గంటలకు ముగుస్తుంది. కాబట్టి మహాశివరాత్రి 2026 పండుగను ఫిబ్రవరి 15వ తేదీ ఆదివారం రోజు జరుపుకుంటారు. ఎందుకంటే మహాశివరాత్రి పూజకు అత్యంత పవిత్రమైన సమయం నిషిత కాలం (అర్ధరాత్రి సమయం). ఈ రోజున నిషిత కాల పూజకు ముహూర్తం ఫిబ్రవరి 15వ తేదీ రాత్రి 11:55 నుంచి 12:56 వరకు ఉంటుందని తెలుస్తోంది. ఇక ఉపవాసం ముగింపు విషయానికొస్తే.. 2026 ఫిబ్రవరి 16వ తేదీన ఉదయం 6:42 నుంచి మధ్యాహ్నం 3:10 గంటల మధ్య పారణ చేయవచ్చు.

మహాశివరాత్రి రోజును పరమశివునికి ఎంతో ప్రీతికరమైన రోజుగా ధర్మశాస్త్రాలు చెబుతున్నాయి. ఈ పవిత్రమైన రోజున ఉపవాసం ఉండటం, జాగరణ చేయడం, రోజంతా శివనామస్మరణతో శివుడికి దగ్గరగా గడపడం, ప్రదోషవేళ శివుడిని అభిషేకించడంతో పాటు.. ప్రత్యేకంగా బిల్వార్చన, రుద్రాభిషేకం వంటివి చేయడం అత్యంత శుభప్రదం. ముఖ్యంగా మహాశివరాత్రి రోజు ఉపవాసం ఆచరించడం మంచిదని చెబుతారు. అలాగే మహాశివరాత్రి రోజున జాగరణ చేయడం వల్ల.. అందులోనూ రాత్రి పూట చేసే శివార్చన మరియు శివాభిషేకం వల్ల శరీరంలో తేజస్సు కలుగుతుందని పండితులు చెబుతారు. అలాగే భగవంతుడి మీద సాధకులకు మరియు మోక్షమార్గంలో ప్రయత్నించే వారికి రాత్రిపూట విశేషమైన సమయంగా భావిస్తారు. శివుడు అభిషేక ప్రియుడు కాబట్టి మహాశివరాత్రి రోజు సాయంత్రం 5 – 6 గంటల సమయం నుంచి అర్ధరాత్రి 2 గంటల సమయం మధ్యన చేసే రుద్రాభిషేకం, శివార్చన, బిల్వార్చన వల్ల ఆయురారోగ్యాలు, ఐశ్వర్యం కలుగుతాయని పండితులు చెబుతారు.

మహాశివరాత్రి రోజున శాస్త్రోక్తంగా శివుడిని ఆరాధించినా లేదా మనకు ఎలాంటి మంత్రాలూ తెలియక కేవలం భక్తి శ్రద్ధలతో శివలింగం మీద చెంబుడు నీళ్లు పోసినా రెండూ సమానమే అంటాడట ఆ కైలాసనాథుడు. మన సంప్రదాయంలో నిత్య శివరాత్రి, పక్ష శివరాత్రి, మాస శివరాత్రి, మహా శివరాత్రి, యోగ శివరాత్రి అనే ఐదు రకాల శివరాత్రులు ఉన్నాయని మన పురాణాలు చెబుతున్నాయి. ప్రతి రోజూ శివుడిని ఆరాధించడం అనేది నిత్య శివరాత్రి. ప్రతి మాసంలో శుక్ల, బహుళ చతుర్దశి రోజు శివారాధన చేయడం అనేది పక్ష శివరాత్రి. ప్రతి మాసంలో బహుళ చతుర్దశి రోజున శివుడిని పూజించడం అనేది మాస శివరాత్రి. అలాగే మాఘ బహుళ చతుర్దశి తిథిని అత్యంత విశిష్టమైన మహాశివరాత్రిగా శివపురాణం పేర్కొంటోంది. ఇక ఐదో శివరాత్రి అయిన యోగ శివరాత్రి విషయానికొస్తే సాధకుడు తన యోగ మహత్యంతో యోగ నిద్రకు ఉపక్రమించడాన్ని యోగ శివరాత్రి అంటారట.