2026లో వృషభ రాశి జాతకంలో చేయాల్సిన పరిహారాలు ఇవే !

Vrishabha

జ్యోతిష్యం ప్రకారం, వృషభ రాశి వారికి శుక్రుడు అధిపతిగా ఉంటాడు. శుక్రుడి ప్రభావంతో ఆంగ్ల నూతన సంవత్సరంలో ఈ రాశి వారి కోరికలన్నీ నెరవేరే అవకాశం ఉంది. శుక్రుడిని ప్రేమ, అందం, భౌతిక ఆనందం, సంపదకు ప్రతీకగా భావిస్తారు. ఇదిలా ఉండగా కొత్త ఏడాదిలో శుక్రుని సంచారం వేళ ఈ రాశి వారి జీవితంలో గణనీయమైన మార్పులు సంభవించే అవకాశం ఉంది. ఈ కాలంలో శని మీనంలో, రాహువు కుంభం, మకరంలో, కేతువు సింహం, కర్కాటకంలో, గురువు ఏడాది మధ్యలో కర్కాటక రాశిలో హంస రాజయోగాన్ని ఏర్పరుస్తాడు. మరోవైపు సూర్యుడు, కుజుడు, బుధుడు, చంద్రుడు నిర్దిష్ట కాలం తమ స్థానాలను మారుస్తూనేఉంటారు. ఈ సమయంలో మీ వ్యక్తిగత జీవితంపై కొంత ప్రభావం పడుతుంది. అంతేకాదు కొత్త ఏడాదిలో గజకేసరి, మహలక్ష్మీ, కేంద్ర త్రికోణ, నవపంచమ రాజయోగాలు ఏర్పడతాయి. ఈ సందర్భంగా వృషభ రాశి వారికి కెరీర్, వ్యాపారం, కుటుంబం, ఆరోగ్యం, ఆర్థిక పరంగా 2026 సంవత్సరంలో ఎలాంటి ఫలితాలు రానున్నాయో ఇప్పుడు తెలుసుకుందాం.

ఆర్థిక పరిస్థితి..

​వృషభ రాశి వారికి కొత్త ఏడాది 2026లో ఆర్థిక పరిస్థితి బలపడుతుంది. ఈ రాశి నుంచి గురువు లాభ స్థానంలో ఉండటం కారణంగా ఏడాది పొడవునా వీరి ఆర్థిక పరంగా మెరుగ్గా ఉంటుంది. మీకు కొత్త ఆదాయ వనరులు లభించే అవకాశం ఉంది. ఈ కాలంలో మీరు కొత్త వాహనం లేదా ఇల్లు లేదా జంతువుల కొనుగోలు కోసం డబ్బులు ఖర్చు చేయొచ్చు. జూన్ 2 తర్వాత గురుడి శక్తివంతమైన ప్రభావంతో మీకు అనేక ఆదాయ వనరులు పెరగనున్నాయి.

కెరీర్ పరంగా..

​కొత్త ఏడాది 2026లో వృషభ రాశి వారికి కెరీర్ పరంగా గురుడి ప్రభావంతో శుభ ఫలితాలు రానున్నాయి. నిరుద్యోగులకు కొత్త ఉద్యోగం గురించి శుభవార్తలు వినిపిస్తాయి. ఇప్పటికే ఉద్యోగం చేస్తున్న వారికి ప్రమోషన్ కూడా లభించొచ్చు. గురుడు లాభ స్థానంలో సంచారం చేసే సమయంలో కార్యాలయంలో మీకు వాతావరణం అనుకూలంగా ఉంటుంది. అయితే పదో స్థానం నుంచి రాహువు ప్రభావం డిసెంబర్ 5వ తేదీ వరకు ఉంటుంది. ఈ సమయంలో చాలా జాగ్రత్తగా ఉండాలి. ఈ కాలంలో ఎవరితోనూ గొడవలు పెట్టుకోకుండా ఉండాలి. లేదంటే మీకు హాని కలగొచ్చు.

వ్యాపార పరంగా..

వృషభ రాశి వారికి కొత్త ఏడాది 2026లో వ్యాపార రంగంలో మంచి లాభాలొచ్చే అవకాశం ఉంది. గురుడి ప్రభావంతో మీ వ్యాపారాన్ని విస్తరించుకునే అవకాశం ఉంది. ఈ కాలంలో పెండింగులో ఉన్న మీ పనులన్నీ పూర్తి చేస్తారు. వ్యాపారంలో గణనీయమైన మార్పులు సాధిస్తారు. మీరు కొత్త ఆర్డర్లు, కొత్త ప్రాజెక్టులు పొందొచ్చు. జూన్ 2 నుంచి అక్టోబర్ 31వ తేదీ వరకు గురుడు లాభ స్థానంలో సంచారం చేయడం వల్ల మీ కోరికలన్నీ నెరవేరే అవకాశం ఉంది. అయితే రాహువు, కేతువు ప్రభావంతో వ్యాపారంలో కొన్ని సవాళ్లు ఎదురవుతాయి. ఏదైనా కొత్త వ్యాపారం లేదా పెట్టుబడి పెట్టేటప్పుడు చాలా తెలివిగా నిర్ణయాలు తీసుకోవాలి. అప్పుడే మీరు మంచి విజయాలు సాధించే అవకాశం ఉంటుంది.

విద్యా రంగంలో..

వృషభ రాశి వారికి కొత్త ఏడాది 2026లో విద్యా పరంగా అనేక మార్పులు జరగనున్నాయి. విదేశాలలో చదువుకోవాలనుకునే మీ కల నెరవేరొచ్చు. జూన్ 2 నుంచి అక్టోబర్ 31 వరకు గురుడు లాభ స్థానంలో సంచారం చేయడం వ్ల ఉన్నత విద్యకు సంబంధించిన అవకాశాలు లభిస్తాయి. మొత్తానికి కొత్త ఏడాదిలో విద్యా రంగంలో మీరు గణనీయమైన ప్రయోజనాలు పొందే అవకాశం ఉంది.
ఈ కాలంలో మీరు గురువులు, సీనియర్ల నుంచి సంపూర్ణ మద్దతు లభిస్తుంది.

ఆరోగ్య పరంగా..

వృషభ రాశి వారికి కొత్త ఏడాది 2026లో ఆరోగ్య పరంగా మిశ్రమ ఫలితాలు రానున్నాయి. జూన్ 2వ తేదీ వరకు గురుడి ప్రభావంతో మీ శక్తి, రోగనిరోధక శక్తి బలోపేతం అవుతుంది. అక్టోబర్ 31వ తేదీ తర్వాత గురుడి స్థానం మారడంతో కొంత ఇబ్బంది ఉంటుంది. ఈ సమయంలో శని దేవుని ప్రభావంతో శారీరక సమస్యలు ఎదురవుతాయి. రాహువు, కేతువు ప్రభావంతో ఆరోగ్యం క్షీణించే అవకాశం ఉంది. ఈ కాలంలో బయటి ఆహారం తీసుకోవడం మానేయాలి. ఎందుకంటే శని, రాహు గ్రహాలు మీ ఆరోగ్యాన్ని ప్రభావితం చేస్తాయి.

వివాహం, ప్రేమ జీవితంలో..

వృషభ రాశి వారికి ఆంగ్ల నూతన సంవత్సరం 2026లో ప్రేమ జీవితంలో మిశ్రమ ఫలితాలు రానున్నాయి. ఈ రాశి నుంచి బుధుడు పంచమ స్థానంలో ఉండే సమయంలో కొన్ని సమస్యల నుంచి ఉపశమనం లభిస్తుంది. అయితే మీ ప్రేమ జీవితాన్ని తేలిగ్గా తీసుకోకూడదు. మీ భాగస్వామి పట్ల చాలా శ్రద్ధ వహించాలి. శని దేవుడు నిజమైన ప్రేమికులకు అనుగ్రహాన్ని కలిగిస్తాడు. అయితే మోసం చేసే వారికి మాత్రం చుక్కలు చూపించే అవకాశం ఉంది. మరోవైపు మీ వైవాహిక జీవితంలో అనుకూలంగా ఉంటుంది. కొత్తగా పెళ్లైన వారికి సంతానం గురించి శుభవార్తలు వినిపిస్తాయి. అవివాహితులకు మంచి వివాహ సంబంధాలొచ్చే అవకాశం ఉంది. జూన్ 2 నుంచి అక్టోబర్ 31వ తేదీ వరకు గురుడి ప్రభావంతో వివాహానికి సమయం అనుకూలంగా ఉంటుంది.

ఏ పరిహారాలు పాటించాలంటే..

* వృషభ రాశి వారు కొత్త ఏడాదిలో ప్రతిరోజూ సూర్య భగవానుడికి నీటిని అర్ఘ్యం సమర్పించాలి.
* చంద్రుడికి, వేణు మాధవుడు, శ్రీరాముడికి ప్రత్యేక పూజలు చేయాలి.
* ప్రతిరోజూ శివ మంత్రాలను జపించాలి.
* ఈ పరిహారాలు పాటించడం వల్ల మీ కోరికలన్నీ నెరవేరుతాయి.

Follow us