Happy Birthday NBK: బాలయ్యకు వెల్లువెత్తుతున్న శుభాకాంక్షలు..

Wishes pouring in for Balayya...
Wishes pouring in for Balayya...

‘గాడ్ ఆఫ్ మాసెస్’ నందమూరి బాలకృష్ణ జన్మదినాన్ని పురస్కరించుకుని అటు కుటుంబ సభ్యులు, ఇటు సినీ ప్రపంచం సోషల్ మీడియా వేదికగా పండుగ వాతావరణాన్ని సృష్టించారు. నందమూరి కుటుంబ సభ్యులతో పాటు సినీ సెలబ్రిటీలు, అభిమానులు ఆయనకు శుభాకాంక్షలు తెలియజేస్తున్నారు. బాక్సాఫీస్ వద్ద ఆయన చూపించే అన్‌స్టాపబుల్ ఎనర్జీని, నిజజీవితంలో ఆయనకున్న పసివాడి మనస్తత్వాన్ని కొనియాడుతూ… నటుడిగా, ప్రజాసేవకుడిగా ఆయన మరిన్ని విజయాలు అందుకోవాలని ఆకాంక్షిస్తూ ఇండస్ట్రీ వర్గాలు పోస్ట్ చేసిన బర్త్‌డే విషెస్ ప్రస్తుతం నెట్టింట వైరల్ అవుతున్నాయి.

వెండితెరపై ఆయన అడుగుపెడితే బాక్సాఫీస్ సింహ గర్జనతో దద్దరిల్లుతుంది.. ఆయన నోట డైలాగ్ వస్తే థియేటర్లలో పూనకాలు వస్తాయి. ఆయనే మాస్ పల్స్‌ను పక్కాగా తెలిసిన ‘గాడ్ ఆఫ్ మాసెస్’ నందమూరి బాలకృష్ణ. అరవై ఏళ్లు దాటినా కుర్ర హీరోలకు సైతం అసూయ పుట్టించే అన్‌స్టాపబుల్ ఎనర్జీతో, పౌరుషానికి నిలువెత్తు రూపంగా నిలిచిన బాలయ్య ట్రేడ్‌మార్క్ మేనరిజమ్స్, ఊరమాస్ యాక్షన్‌కు టాలీవుడ్‌లోనే ప్రత్యేకమైన బ్రాండ్ ఇమేజ్ ఉంది. ‘అఖండ’, ‘వీరసింహారెడ్డి’, ‘భగవంత్ కేసరి’, ‘డాకు మహరాజ్’, ‘అఖండ 2’ వంటి చిత్రాలతో వరుసగా బాక్సాఫీస్‌ను షేక్ చేస్తూ తిరుగులేని విజయాలతో దూసుకుపోతున్న బాలయ్య, నటనతోనే కాదు, పసివాడి లాంటి స్వచ్ఛమైన మనస్తత్వంతోనూ అందరి గుండెల్లో ప్రత్యేక స్థానాన్ని సంపాదించుకున్నారు. నేడు ఆయన పుట్టినరోజు (జూన్ 10) సందర్భంగా సినీ, రాజకీయ రంగాలకు చెందిన ప్రముఖులు ఆయనతో తమకున్న అనుబంధాన్ని గుర్తుచేసుకుంటూ, ఆయన రాయల్టీని ఎలివేట్ చేస్తూ సోషల్ మీడియా వేదికగా జన్మదిన శుభాకాంక్షలు తెలుపుతున్నారు.

తెలుగు ఆత్మగౌరవానికి ప్రతీక… అభిమానుల ఆరాధ్య దైవం… స్వచ్ఛతకు, అమాయకత్వానికి నిలువెత్తు నిదర్శనమైన మా బాల మావయ్యకు హృదయపూర్వక జన్మదిన శుభాకాంక్షలు. అభిమానుల గుండెల్లో మాస్ దేవుడిగా నిలిచిన మీరు, క్యాన్సర్ బాధితులకు అండగా నిలిచే అభయహస్తంగా, హిందూపురం ప్రజల గెలుపు వీరుడిగా కోట్లాది మంది ప్రేమాభిమానాలు సంపాదించారు. మీరు నిండు నూరేళ్లు ఆరోగ్యంగా, ఆనందంగా జీవించాలని, మరెన్నో విజయాలతో ప్రజలకు సేవ చేస్తూ ముందుకు సాగాలని భగవంతుడిని ప్రార్థిస్తున్నాను. – ఏపీ మంత్రి నారా లోకేష్

హ్యాపీ బర్త్‌డే బాలయ్య బాబు.. మిమ్మల్ని తెలుసుకోవడం, మీతో కలిసి పనిచేసే అవకాశం రావడం నిజంగా ఒక ఆశీర్వాదం. మీరు చూపించే చిన్నపిల్లలలాంటి ప్రేమ, ఆప్యాయత, ఆత్మీయత జీవితంలో కనీసం ఒక్కసారైనా ప్రతి ఒక్కరూ అనుభవించాల్సిందే. ఇంతకాలంగా అభిమానులు మోస్తున్న ఆకలి, ఎదురుచూపులు, ఉత్సాహం అన్నింటినీ ఎన్‌బీకే111 పూర్తిగా తీర్చాలని మనస్పూర్తిగా కోరుకుంటున్నాను. – గోపీచంద్ మలినేని

అపారమైన శక్తి, ఉత్సాహం, అంకితభావానికి ప్రతిరూపం బాలయ్య. ఆయనతో కలిసి పనిచేయడం ఎప్పుడూ ఒక ప్రత్యేక అనుభూతి. సినిమాపై ఆయనకు ఉన్న అచంచలమైన నిబద్ధతను ప్రత్యక్షంగా చూడడం నిజంగా ఒక అదృష్టం. మధుర జ్ఞాపకాలు, స్ఫూర్తి, ప్రోత్సాహం అందించినందుకు హృదయపూర్వక ధన్యవాదాలు. మీరు ఎల్లప్పుడూ ఆరోగ్యంగా, ఆనందంగా ఉండాలని, మరెన్నో ఘన విజయాలు సాధించాలని మనస్ఫూర్తిగా కోరుకుంటున్నాను. నా “డాకు మహారాజ్”కు జన్మదిన శుభాకాంక్షలు – బాబీ

హ్యాపీ బర్త్‌డే నాన్నా.. చిన్నప్పటి నుంచి నాకు సూపర్ హీరో కోసం ఎక్కడా వెతకాల్సిన అవసరం రాలేదు. ఎందుకంటే నా కళ్ల ముందే మీరు ఉండేవారు. మీ అభిరుచి, పట్టుదల, ఎన్నడూ వెనక్కి తగ్గని తత్వం నన్ను ఈ స్థాయికి తీసుకొచ్చాయి. నేను ఈరోజు ఇలా ఉండటానికి కారణం మీరే. నా జీవితంలో అండగా నిలిచిన వ్యక్తిగా, మార్గనిర్దేశం చేసిన గురువుగా, ఎప్పటికీ స్ఫూర్తిగా నిలిచిన మీకు హృదయపూర్వక ధన్యవాదాలు. మీ బిడ్డగా పుట్టడం నా అదృష్టంగా భావిస్తున్నాను. మీరు ఎల్లప్పుడూ ఆరోగ్యం, ఆనందం, ప్రశాంతతతో నిండి ఉండాలని మనస్ఫూర్తిగా కోరుకుంటున్నాను. – నారా బ్రాహ్మణి

నటసింహం నందమూరి బాలకృష్ణ గారికి హృదయపూర్వక జన్మదిన శుభాకాంక్షలు. మీరు నిండు నూరేళ్లు ఆయురారోగ్యాలతో, ఆనందంగా, అదే ఉత్సాహంతో జీవించాలని మనస్ఫూర్తిగా కోరుకుంటున్నాను. నటుడిగా, ప్రజానాయకుడిగా మీరు మరిన్ని ఉన్నత శిఖరాలను అధిరోహించి, అద్భుత విజయాలు సాధించి, తెలుగు ప్రజల అభిమానాన్ని మరింతగా పొందాలని ఆకాంక్షిస్తున్నాను. సమాజ సేవ పట్ల మీ అంకితభావం, సేవా కార్యక్రమాలు, ప్రజల కోసం మీరు చేస్తున్న నిరంతర కృషి మరింత విస్తరించి, ఇంకా ఎక్కువ మందికి చేరాలని భగవంతుడిని ప్రార్థిస్తున్నాను. జన్మదిన శుభాకాంక్షలు బాలయ్య బాబు – బండ్ల గణేష్


Follow us

Tags