నటుడు ప్రభాకర్ కుమారుడు..యాటిట్యూడ్ స్టార్ చంద్రహాస్పై కేసు నమోదు
- Author : Vamsi Chowdary Korata
Date : 05-02-2026 - 11:03 IST
Published By : Hashtagu Telugu Desk
Attitude Star Chandrahas బరాబార్ ప్రేమిస్తా మూవీ హీరో, యాటిట్యూడ్ స్టార్ చంద్రహాస్పై పోలీస్ కేసు నమోదైంది. ఇటీవల ఈ సినిమా ప్రీ రిలీజ్ ఈవెంట్ సందర్భంగా ఓ అసభ్యకరమైన పాటను చంద్రహాస్ పాడారు. దానిపై ఓ జర్నలిస్టు అభ్యంతరం వ్యక్తం చేస్తూ వీడియో రిలీజ్ చేశాడు. జర్నలిస్టుకు కౌంటర్ ఇచ్చిన చంద్రహాస్ అంతుచూస్తానంటూ బెదిరింపులకు పాల్పడ్డాడు. దీంతో బాధితుడు పోలీసులకు ఫిర్యాదు చేయగా.. మాదాపూర్ పీఎస్లో కేసు నమోదైంది.
సీరియల్ నటుడు, బుల్లితెర మెగాస్టార్గా పాపులర్ అయిన ప్రభాకర్ కుమారుడు చంద్రహాస్ హీరోగా వెండి తెరకు పరిచయమైన సంగతి తెలిసిందే. రామ్ నగర్ బన్నీ అనే చిత్రంతో ప్రేక్షకుల ముందుకొచ్చిన చంద్రహాస్ ఆ సినిమా ప్రమోషన్ల సమయంలో చూపించిన యాటిట్యూడ్తో ‘యాటిట్యూడ్ స్టార్’గా సోషల్ మీడియాలో వైరల్ అయిపోయాడు. తాజాగా ‘బరాబర్ ప్రేమిస్తా’ అనే సినిమాతో మరోసారి ప్రేక్షకుల ముందుకొచ్చాడు. అయితే ఈసారి కూడా అతడు వివాదాల్లో చిక్కుకున్నాడు. ఏకంగా అతిడిపై పోలీసు కేసు కూడా నమోదైంది. ఓ జర్నలిస్టు ఇచ్చిన ఫిర్యాదు మేరకు మాదాపూర్ పోలీసులు కేసు నమోదుచేశారు.
మాదాపూర్ సీఐ తెలిపిన వివరాల ప్రకారం.. చంద్రహాస్ హీరోగా నటించిన బరాబర్ ప్రేమిస్తా సినిమా ప్రీ రిలీజ్ వేడుక రెండ్రోజుల క్రితం నగరంలో జరిగింది. ఈ సందర్భంగా చంద్రహాస్ వేదికపై ఓ పాట పాడాడు. అందులో అసభ్యకర పదాలు ఉండటంతో అశోక్ కుమార్ అనే జర్నలిస్టు అభ్యంతరం వ్యక్తం చేశాడు. ఈ భాష సరైంది కాదని హెచ్చరిస్తూ ఓ వీడియో విడుదల చేశాడు. దీనికి స్పందించిన చంద్రహాస్.. తన ఇన్స్టాగ్రామ్ ఖాతాలో జర్నలిస్టును బెదిరిస్తూ వీడియో పోస్ట్ చేశారు.
ఎన్నో సార్లు ఎన్నో సందర్భాల్లో రీజన్ లేకుండా.. నన్ను ట్రోల్ చేశారు. అసలు నా తప్పే లేకుండా నన్ను అనరాని మాటలు అన్నారు. మీ సమాజంలో వాడాల్సిన మాటలు, బూతులు అప్పుడు ఏమైపోయాయి?. మీరు నాపై వాడిన పదాల్లో.. నేను రెండు పదాలు మాత్రమే వాడా. అవేమీ అంత పెద్ద పదాలు కూడా కాదు. అయినా నన్ను కావాలని గెలికారు. నీకు 24 గంటలు టైం ఇస్తున్నా. నీ నుంచి నాకు 24 గంటల్లో క్షమాపణలు రాకపోతే నీ సంగతి చూస్తా అని చంద్రహాస్ వీడియోలో బెదిరించాడు. దీంతో బాధితుడు అశోక్ కుమార్ పోలీసులకు ఫిర్యాదు చేశాడు. ఈ మేరకు పోలీసులు కేసు నమోదు చేసి దర్యాప్తు చేస్తున్నారు.
కాగా, ఈ పాటపై నెటిజన్లు కూడా భిన్నంగా స్పందిస్తున్నారు. సమాజంలో ఇలాంటి పాటలు పాడటం సరైంది కాదని హెచ్చరిస్తున్నారు. కుటుంబ సభ్యులు, మహిళల ముందే బూతు పదాలతో పాట పాడటమేంటని ప్రశ్నిస్తున్నారు. యాటిట్యూడ్ స్టార్ చంద్రహాస్పై చర్యలు తీసుకోవాలని నెటిజన్లు సైతం డిమాండ్ చేస్తున్నారు.
Follow us
