Raj Nidimoru : సమంత రెండో భర్త రాజ్ నిడిమోరు బ్యాక్‌గ్రౌండ్ తెలుసా!

టాలీవుడ్ స్టార్ హీరోయిన్ సమంత మరోసారి పెళ్లి చేసుకున్నారు. కోయంబత్తూరులోని ఈషా ఫౌండేషన్‌లో ఎంతో సింపుల్‌గా, కుటుంబ సభ్యులు, సన్నిహితుల సమక్షంలో దర్శకుడు రాజ్ నిడిమోరును వివాహం చేసుకున్నారు. ‘ఫ్యామిలీ మ్యాన్ 2’ షూటింగ్ సమయంలో వీరి మధ్య ఏర్పడ్డ స్నేహం ప్రేమగా మారి, ఇప్పుడు పెళ్లిగా మారింది. సమంత సోషల్ మీడియాలో పంచుకున్న ఫోటోలు, ఇద్దరూ పలుమార్లు కలిసి కనిపించడం వీరి రిలేషన్‌ను అప్పటికే హైలైట్ చేశాయి. రాజ్ నిడిమోరు తిరుపతి వాసి, బాలీవుడ్‌లో ‘ఫ్యామిలీ మ్యాన్’ వంటి హిట్ ప్రాజెక్టులతో పేరుప్రఖ్యాతులు పొందిన దర్శకుడు. సమంత–రాజ్ వివాహం సోషల్ మీడియాలో హాట్ టాపిక్‌గా మారింది.

టాలీవుడ్‌ స్టార్‌ హీరోయిన్‌ సమంత మరోసారి వైవాహిక జీవితంలోకి అడుగుపెట్టారు. కోయంబత్తూరు ఈషా ఫౌండేషన్‌లో అత్యంత నిరాడంబరంగా, కొద్దిమంది బంధుమిత్రుల సమక్షంలో సమంత – రాజ్ నిడిమోరు పెళ్లి వేడుక జరిగింది. కొంతకాలంగా దర్శకుడు రాజ్ నిడిమోరుతో సమంతకు ఉన్న స్నేహం, ప్రేమ గురించి సోషల్ మీడియాలో ఎన్నో వార్తలు వచ్చాయి. ఇద్దరూ కలిసి ట్రావెల్ అవుతున్న ఫోటోలు, సోషల్ మీడియా పోస్టులు వారి రిలేషన్‌ను ఎప్పుడో కన్ఫామ్ చేశాయి. వీరు కేవలం డేటింగ్‌తోనే సరిపెట్టేస్తారా? పెళ్లి చేసుకుంటారా? అన్న అనుమానాలకు చెక్ పెడుతూ, సమంత–రాజ్ నిడిమోరు మూడు ముళ్ల బంధంతో ఒక్కటయ్యారు. నాగచైతన్యతో విడాకుల తర్వాత కాస్త బ్రేక్ తీసుకున్న సమంత, ‘ఫ్యామిలీ మ్యాన్ 2’ షూటింగ్ సమయంలో రాజ్‌తో స్నేహం ఆ తర్వాత ప్రేమగా మారినట్టు ఇండస్ట్రీ టాక్. ఇప్పుడు ఆ ప్రేమ పెళ్లిగా మారి ఇద్దరూ జీవిత భాగస్వాములయ్యారు. ఈ నేపథ్యంలోనే సమంత రెండో భర్త రాజ్ నిడిమోరు గురించి నెటిజన్లు తెగ సెర్చ్ చేస్తున్నారు.

1975లో ఆంధ్రప్రదేశ్‌లో తిరుపతిలో జన్మించిన రాజ్ నిడిమోరు శ్రీ వెంకటేశ్వర విశ్వవిద్యాలయంలో బీటెక్ పూర్తి చేసి అమెరికాలో సాఫ్ట్‌వేర్ ఇంజనీర్‌గా పనిచేశారు. చిన్నప్పటి నుంచి సినిమా పట్ల ఆసక్తి, కథలపై ప్రేమ అతడిని ఫిల్మ్ ఇండస్ట్రీ వైపు లాగాయి. అమెరికాలో తన ప్రాంతానికేచెందిన నటుడు-దర్శకుడు డీకే (కృష్ణ దాసరకోతపల్లి) పరిచయం కావడం, ఇద్దరూ కలిసి చేసిన షార్ట్ ఫిల్మ్ సక్సెస్ అవ్వడం అతడి కెరీర్‌కు టర్నింగ్ పాయింట్. ఆ తర్వాత ఇద్దరూ కలిసి Flavors అనే ఇంగ్లీష్ సినిమాతో దర్శకత్వ రంగంలో అడుగుపెట్టారు. కొంతకాలం తర్వాత ఇండియాకు వచ్చి సినీ ప్రయాణం మొదలుపెట్టిన రాజ్–డీకే ద్వయం బాలీవుడ్‌లో స్థిరపడ్డారు. షోర్ ఇన్ ది సిటీ, గో గోవా గాన్ వంటి సినిమాలతో గుర్తింపు తెచ్చుకున్నారు. The Family Man వెబ్ సిరీస్ వీరికి స్టార్‌డమ్ తీసుకొచ్చింది. దేశవ్యాప్తంగా సంచలనం రేపిన ఈ సిరీస్‌కి రాజ్–డీకేలు రెండో సీజన్‌ను రూపొందించారు. ఆ సీజన్‌లో సమంత నటించగా.. షూటింగ్ సమయంలో రాజ్‌తో ఆమెకు ఏర్పడిన పరిచయం చివరకు ప్రేమగా మారినట్టు సమాచారం.

రాజ్-డీకే సినిమాలు మాత్రమే కాదు, వెబ్‌ కంటెంట్‌ రంగంలో కూడా మంచి పేరు సంపాదించారు. ఫ్యామిలీ మ్యాన్, గన్స్ అండ్ గులాబ్స్, సిటాడెల్ ఇండియా వంటి భారీప్రాజెక్ట్‌లను తెరకెక్కించారు. వీరి సొంత బ్యానర్‌ D2R Films ద్వారా సినిమాలు, వెబ్ సిరీస్‌లు నిర్మిస్తున్నారు. కొన్ని రిపోర్ట్స్ ప్రకారం రాజ్ నిడిమోరు నికర ఆస్తులు సుమారు ₹90 కోట్ల వరకు ఉంటాయని చెబుతున్నారు. దర్శకత్వంతో పాటు నిర్మాతగా, స్క్రీన్ ప్లే రైటర్‌గా కూడా కోట్లలో రెమ్యునరేషన్ తీసుకుంటారని ఇండస్ట్రీ వర్గాల సమాచారం. వెబ్ సిరీస్‌లు, ఫిల్మ్స్‌తో పాటు ఫ్రీలాన్స్ స్టోరీ, స్క్రీన్‌ప్లే వర్క్‌కు కూడా భారీగా ఛార్జ్ చేస్తారని టాక్. తిరుపతిలో పుట్టి అమెరికా మీదుగా బాలీవుడ్‌కి చేరిన రాజ్ నిడిమోరు ఇప్పుడు స్టార్ హీరోయిన్ సమంతతో జీవితంలో కొత్త అధ్యాయాన్ని ప్రారంభించారు.

స్టార్ హీరోయిన్ సమంతను వివాహం చేసుకున్న రాజ్ నిడిమోరు గురించి తెలుసుకోవడానికి సినీ అభిమానులు ఆసక్తి కనబర్చారు. తెలంగాణ, ఆంధ్రప్రదేశ్, తమిళనాడు, కర్ణాటక, పుదుచ్చేరిలకు చెందిన వారు ఎక్కువగా రాజ్ నిడిమోరు గురించి గూగుల్‌లో వెతికారు. దీంతో 2 లక్షలకుపైగా సెర్చ్ వాల్యూమ్‌తో రాజ్ నిడిమోరు కీవర్డ్ గూగుల్ ట్రెండ్స్‌లో అగ్రస్థానంలో నిలిచింది.