RAAKA: అల్లు అర్జున్ ‘రాకా’.. రిలీజ్ డేట్‌ ఎప్పుడంటే?

Allu Arjun's 'Raka' – When is the release date?

ఐకాన్ స్టార్ అల్లు అర్జున్, కోలీవుడ్ స్టార్ డైరెక్టర్ అట్లీ కాంబినేషన్‌లో ఎంతో ప్రతిష్టాత్మకంగా తెరకెక్కుతున్న భారీ పాన్-ఇండియా చిత్రం ‘రాకా’కి సంబంధించి వచ్చే ప్రతి అప్‌డేట్ ఫ్యాన్స్‌కి పూనకాలు తెప్పిస్తోంది. సైన్స్ ఫిక్షన్, హై-వోల్టేజ్ యాక్షన్ థ్రిల్లర్ జోనర్‌లో రూపొందుతున్న ఈ సినిమాపై ఇప్పటికే ఇండస్ట్రీ వర్గాలతో పాటు ప్రేక్షకుల్లోనూ ఆకాశాన్నంటే అంచనాలు నెలకొన్నాయి. ప్రస్తుతం ఈ సినిమాకు సంబంధించిన షూటింగ్ శరవేగంగా సాగుతోంది. అయితే తాజాగా ఈ క్రేజీ ప్రాజెక్ట్ విడుదల తేదీకి సంబంధించి ఫిల్మ్‌నగర్ వర్గాల్లో ఒక ఆసక్తికరమైన ప్రచారం మొదలైంది.

నిజానికి ఈ సినిమాను 2027 మొదటి త్రైమాసికంలోనే ప్రేక్షకుల ముందుకు తీసుకురావాలని చిత్ర బృందం తొలుత భావించింది. ఇందుకు సంబంధించి రిలీజ్ డేట్‌ను కూడా త్వరలోనే ప్రకటిస్తారన్న ప్రచారం జరిగింది. కానీ తాజా సమాచారం ప్రకారం ‘రాకా’ విడుదల అనుకున్న సమయం కంటే మరింత ఆలస్యం కానున్నట్లు తెలుస్తోంది. ఈ చిత్రంలో పునర్జన్మలు, సమాంతర ప్రపంచాలు వంటి వినూత్న కాన్సెప్ట్‌లు ఉన్నాయి. దీనివల్ల కథలో విజువల్ ఎఫెక్ట్స్, గ్రాఫిక్స్ అత్యంత కీలకమైన పాత్ర పోషించనున్నాయి. హాలీవుడ్ స్థాయి నాణ్యతతో కూడిన గ్రాఫిక్స్ కోసం మేకర్స్ అంతర్జాతీయ స్టూడియోలతో కలిసి పనిచేస్తున్నారు. ఈ పోస్ట్ ప్రొడక్షన్ పనులకు భారీగా సమయం పట్టేలా ఉండటంతో, నిర్మాతలు ఎక్కడా రాజీ పడకూడదని నిర్ణయించుకున్నారట. అందువల్ల ఈ సినిమాను 2027 డిసెంబర్ 2న భారీ ఎత్తున విడుదల చేసేలా సరికొత్త ప్రణాళికలు సిద్ధం చేస్తున్నట్లు వినికిడి.

దాదాపు రూ.800 కోట్ల భారీ బడ్జెట్‌తో సన్ పిక్చర్స్ సంస్థ నిర్మిస్తున్న ఈ చిత్రంలో అల్లు అర్జున్ తన కెరీర్‌లోనే మొదటిసారిగా మూడు విభిన్న పాత్రల్లో కనిపించబోతున్నట్లు వార్తలు వస్తున్నాయి. ఇప్పటికే విడుదలైన టైటిల్ పోస్టర్‌లో గుండు, తోడేలు చేయి, నుదుటిపై గాయాలతో బన్నీ కనిపించిన భీకరమైన వైల్డ్ అవతార్ సోషల్ మీడియాలో రికార్డులు సృష్టించింది. ఈ చిత్రంలో బాలీవుడ్ స్టార్ బ్యూటీ దీపికా పదుకొణె కథానాయికగా నటిస్తుండగా, మృణాల్ ఠాకూర్, జాన్వీ కపూర్, రష్మిక మందానా, రమ్యకృష్ణ వంటి భారీ తారాగణం కీలక పాత్రలు పోషిస్తున్నారు. సాయి అభ్యంకర్ సంగీతాన్ని అందిస్తున్నారు. షూటింగ్‌ను వీలైనంత త్వరగా పూర్తి చేసి, సుదీర్ఘమైన వీఎఫ్ఎక్స్ పనులను మొదలుపెట్టేలా అట్లీ ప్లాన్ చేస్తున్నారు. త్వరలోనే ఈ రిలీజ్ డేట్‌పై అధికారిక ప్రకటన వచ్చే అవకాశం ఉంది.

Follow us