UPI Payments: పండుగ సీజన్లో యూపీఐదే రికార్డు.. రూ. 17.8 లక్షల కోట్ల లావాదేవీలు!
బ్యాంక్ ఆఫ్ బరోడా కేటగిరీల వారీగా గణాంకాలు సెప్టెంబర్ 2025లో ఆన్లైన్ మార్కెట్ ప్లేస్లు, వస్త్ర దుకాణాలు (Apparel stores), ఎలక్ట్రానిక్ దుకాణాలు, సౌందర్య సాధనాలు, మద్యం దుకాణాలలో ఖర్చు వేగంగా పెరిగినట్లు వెల్లడించాయి.
- Author : Gopichand
Date : 01-11-2025 - 9:25 IST
Published By : Hashtagu Telugu Desk
UPI Payments: బ్యాంక్ ఆఫ్ బరోడా (Bank of Baroda) విడుదల చేసిన ఒక నివేదిక ప్రకారం.. పండుగ సీజన్లో యూనిఫైడ్ పేమెంట్స్ ఇంటర్ఫేస్ (UPI Payments) అత్యంత ప్రజాదరణ పొందిన చెల్లింపు విధానంగా అవతరించింది. ఇది వినియోగదారుల నుంచి బలమైన ఖర్చు, డిమాండ్లో పెరుగుదలను సూచిస్తోంది. నివేదిక వివరాల ప్రకారం. పండుగ సీజన్లో యూపీఐ లావాదేవీల విలువ వేగంగా పెరిగి రూ. 17.8 లక్షల కోట్లకు చేరింది. గత సంవత్సరం ఇదే కాలంలో ఇది రూ. 15.1 లక్షల కోట్లుగా ఉంది. ముఖ్యంగా దసరా, దీపావళి వంటి ప్రధాన పండుగల సమయంలో వినియోగ ధోరణులను డిజిటల్ చెల్లింపులు ఎలా పెంచుతున్నాయో ఈ పెరుగుదల స్పష్టం చేస్తోంది.
యూపీఐతో పాటు పెరిగిన డెబిట్ కార్డు వినియోగం
సెప్టెంబర్ 2025లో యూపీఐ విలువ నెలవారీ ప్రాతిపదికన 2.6 శాతం పెరిగింది. ఇది డిజిటల్ లావాదేవీలలో నిరంతర వృద్ధిని సూచిస్తుంది. యూపీఐతో పాటు డెబిట్ కార్డుల వినియోగం కూడా పెరిగింది. పండుగ కాలంలో డెబిట్ కార్డుల ద్వారా జరిగిన చెల్లింపులు రూ. 65,395 కోట్లకు చేరుకున్నాయి. ఇది అంతకు ముందు ఏడాది రూ. 27,566 కోట్లుగా ఉంది. గతంలో తగ్గుముఖం పట్టినప్పటికీ ఈ సంవత్సరం డెబిట్ కార్డుల వినియోగం మళ్లీ పెరగడం గమనార్హం. అయితే యూపీఐ మాత్రం ప్రధాన ఎంపికగా కొనసాగుతోంది.
క్రెడిట్ కార్డు లావాదేవీలలో సంయమనం
మరోవైపు క్రెడిట్ కార్డు లావాదేవీలలో మాత్రం సంయమనం కనిపించింది. వినియోగదారులు పండుగ షాపింగ్ కోసం నేరుగా డిజిటల్, డెబిట్ ఆధారిత చెల్లింపులకు ప్రాధాన్యత ఇచ్చారని ఇది సూచిస్తుంది. ఈ చెల్లింపు మార్గాల నుంచి అందిన మొత్తం గణాంకాలు (రూ. 18.8 లక్షల కోట్లు) రిటైల్ లావాదేవీలలో సానుకూల ధోరణిని సూచిస్తున్నాయి. దీనిని ప్రస్తుత త్రైమాసికంలో వినియోగంలో మెరుగుదలకు ప్రారంభ సంకేతంగా చూడవచ్చు.
Also Read: Telangana GST : అక్టోబర్ లో తెలంగాణ లో GST వసూళ్లు ఎంత అంటే ..!!
సగటు ఖర్చు- చిన్న లావాదేవీలకు యూపీఐ
ప్రతి లావాదేవీకి అయిన సగటు ఖర్చు పరంగా చూస్తే డెబిట్ కార్డులు రూ. 8,084తో అగ్రస్థానంలో ఉన్నాయి. యూపీఐ సగటు లావాదేవీ విలువ రూ. 1,052 కాగా.. క్రెడిట్ కార్డుల సగటు రూ. 1,932గా ఉంది. దీని ద్వారా యూపీఐ చిన్న, మధ్యస్థ విలువ గల కొనుగోళ్లకు ఇష్టమైన ఎంపికగా ఉందని, అయితే అధిక విలువ గల చెల్లింపుల కోసం డెబిట్ కార్డులు ఇప్పటికీ అందుబాటులో ఉన్నాయని తెలుస్తోంది.
ముఖ్యంగా పెరిగిన ఖర్చు ఎక్కడ?
బ్యాంక్ ఆఫ్ బరోడా కేటగిరీల వారీగా గణాంకాలు సెప్టెంబర్ 2025లో ఆన్లైన్ మార్కెట్ ప్లేస్లు, వస్త్ర దుకాణాలు (Apparel stores), ఎలక్ట్రానిక్ దుకాణాలు, సౌందర్య సాధనాలు, మద్యం దుకాణాలలో ఖర్చు వేగంగా పెరిగినట్లు వెల్లడించాయి. ఈ కేటగిరీలలో గత సంవత్సరంతో పోలిస్తే రెండంకెల వృద్ధి నమోదైంది. పండుగలకు సంబంధించిన బలమైన డిమాండ్తో పాటు ఇటీవల జీఎస్టీ రేట్ల తగ్గింపు ప్రభావం కూడా ఈ వృద్ధికి కారణమై ఉండవచ్చని నివేదిక సూచించింది.
Follow us
