Today Gold Silver Rate: పసిడి ప్రియులకు షాక్.. భారీగా పెరిగిన బంగారం, వెండి ధరలు

Today Gold Silver Prices

బంగారం కొనుగోలు చేయాలనుకునే వారికి అలర్ట్. కేంద్ర ప్రభుత్వం బంగారం, వెండి దిగుమతులపై సుంకాల్ని 6 నుంచి 15 శాతానికి పెంచగా, కిందటి రోజు బంగారం ధరలు భారీగా పెరిగిన సంగతి తెలిసిందే. అయితే ఇది ఒక్కరోజుకే పరిమితమైంది. మళ్లీ అక్కడి నుంచి రూ. 5 వేల వరకు బంగారం ధర తగ్గింది. వెండి రేటు కూడా రూ. 5 వేలు తగ్గుముఖం పట్టింది.

భారతీయులకు బంగారం అంటే ఎంత ఇష్టమో ప్రత్యేకంగా చెప్పాల్సిన పని లేదు. పండగలు, వివాహాలు, ఇతర శుభకార్యాలు ఏదైనా బంగారం ఉండాల్సిందే. ముఖ్యంగా మహిళలు బంగారు ఆభరణాల్ని ఎక్కువగా కొనుగోలు చేసి ధరించేందుకు ఆసక్తి చూపిస్తుంటారు. అంతలా బంగారం మన సంస్కృతి, సంప్రదాయాలతో ముడిపడిపోయింది. అయితే బంగారం ధరల్ని ఎన్నో అంశాలు ప్రభావితం చేస్తుంటాయి. ముఖ్యంగా అంతర్జాతీయ పరిణామాలు, రాజకీయ భౌగోళిక ఉద్రిక్తతలు, ఫెడ్ వడ్డీ రేట్లు, క్రూడాయిల్ ధరలు, యూఎస్ డాలర్, అమెరికా ప్రభుత్వం తీసుకునే నిర్ణయాలు, వాణిజ్య ఒప్పందాలు, టారిఫ్స్ ఇలా అన్నీ బంగారం ధరల హెచ్చుతగ్గులకు కారణం అవుతుంటాయి. అందుకే ఎప్పటికప్పుడు బంగారం ధరలు ఎలా ఉన్నాయో తెలుసుకోవాల్సి ఉంటుంది.

బంగారం కేవలం అలంకరణ సామగ్రిగానే కాకుండా పెట్టుబడికి కూడా మంచి సాధనంగా ఉంది. బంగారంతో పాటు వెండికి కూడా డిమాండ్ బాగానే ఉంటుంది. గతేడాది బంగారం, వెండి ధరలు విపరీతంగా పెరిగిన సంగతి తెలిసిందే. ఈ ఏడాది చూస్తే పశ్చిమాసియాలో ఉద్రిక్తతల నేపథ్యంలో క్రూడాయిల్ ధరలు పెరగ్గా ఇటీవల వరుసగా తగ్గుతూ వచ్చాయి. కానీ మళ్లీ కేంద్రం షాక్ ఇవ్వడంతో బంగారం ధరలు కిందటి రోజు భారీగా పెరిగిన సంగతి తెలిసిందే.

విదేశీ మారకాన్ని పొదుపుగా వాడుకునేందుకు భారతీయులు ఏడాది పాటు బంగారం కొనుగోళ్లను నిలిపివేయాలని ప్రధాని నరేంద్ర మోదీ స్వయంగా పిలుపునిచ్చారు. ఇదే సమయంలో మళ్లీ కేంద్ర ప్రభుత్వం బంగారం, వెండిపై దిగుమతి సుంకాల్ని 6 శాతం నుంచి ఒకేసారి 15 శాతానికి పెంచింది. దీంతో మే 13న బంగారం, వెండి ధరలు భారీగా పెరిగాయి. 22 క్యారెట్ల పసిడి ధర రూ. 12,750 పెరిగి 10 గ్రాములకు రూ. 1,53,900కు చేరిన సంగతి తెలిసిందే. అక్కడి నుంచి చూస్తే ఇవాళ రూ. 5,100 తగ్గి తులం రూ. 1,48,800కు చేరింది. మరోవైపు 24 క్యారెట్ల గోల్డ్ రేటు కిందటి రోజు తులం రూ. 1,67,890 వద్ద ఉండగా ఇవాళ అది రూ. 1,62,330కి పడిపోయింది.

బంగారం ధరలతో పాటుగానే వెండి రేట్లు కూడా తగ్గుముఖం పట్టాయి. హైదరాబాద్ నగరంలో చూస్తే ఇవాళ సిల్వర్ రేటు రూ.5 వేలు తగ్గి ప్రస్తుతం కేజీకి రూ.3.15 లక్షలకు చేరింది. కిందటి రోజు చూస్తే ఒక్కరోజులోనే రూ.20 వేలు పెరిగింది. ఇక ఇంటర్నేషనల్ మార్కెట్లో స్పాట్ గోల్డ్ రేటు ప్రస్తుతం ఔన్సుకు 4700 డాలర్ల దిగువన ఉండగా.. సిల్వర్ రేటు 87 డాలర్ల వద్ద ట్రేడ్ అవుతోంది.

Follow us