Gold Price: పసిడి ప్రియులకు గుడ్‌న్యూస్.. పాతాళానికి బంగారం ధరలు

Today Gold Rate

Gold Price Today  బంగారం కొనుగోలు చేయాలనుకునే వారికి ఇది అదిరిపోయే శుభవార్త. ప్రతిరోజూ బంగారం ధరలు దిగొస్తూనే ఉన్నాయి. కిందటి రోజు భారీగా తగ్గగా.. ఇవాళ కూడా రూ. 1000 కి పైగానే ధర తగ్గుముఖం పట్టింది. వెండి ధర రూ. 5 వేలు తగ్గింది. ఇంటర్నేషనల్ మార్కెట్లో మరోసారి బంగారం, వెండి ధరల్లో కరెక్షన్ కనిపించింది. స్పాట్ గోల్డ్ రేటు ఒక్కరోజులోనే 200 డాలర్లకు పైగా పతనమైంది.

22k Gold Rate Today: అంతర్జాతీయంగా ఉద్రిక్త పరిస్థితులు నెలకొన్నప్పటికీ.. పశ్చిమాసియాలో ఇరాన్- ఇజ్రాయెల్ మధ్య భీకర యుద్ధం తీవ్రత కొనసాగుతున్నప్పటికీ.. బంగారం, వెండి ధరలు రోజురోజుకూ దిగొస్తుండటం గమనార్హం. సాధారణంగా ఇలాంటి ప్రతికూల పరిస్థితుల్లో.. సంక్షోభాల సమయంలో సురక్షిత పెట్టుబడి సాధనంగా ఈ విలువైన లోహాలకు డిమాండ్ మరింత పెరిగి ధరలు ఇంకా పెరుగుతుంటాయి. కానీ ఇప్పుడు అలా జరగట్లేదు.. ఇంకా సీన్ రివర్స్‌లో ఉంది. ధర పెరగడం కాదు కదా స్థిరంగా కూడా ఉండట్లేదు.. ఇదే క్రమంలో భారీగా పతనం అవుతోంది. యుద్ధం ఫిబ్రవరి 28న ప్రారంభం కాగా.. ఈ 20 రోజుల్లో 3-4 రోజులు మాత్రమే అది కూడా ధర స్వల్పంగానే పెరిగింది. మిగతా రోజుల్లో భారీగా తగ్గుముఖం పట్టింది. ఇప్పుడు మార్చి 21న ఉదయం 7 గంటల సమయంలో కూడా ధర తగ్గినట్లే చూపిస్తోంది.

హైదరాబాద్ మార్కెట్లో 22 క్యారెట్ల గోల్డ్ రేటు ఇవాళ (మార్చి 21) రూ. 1200 తగ్గడంతో తులం ప్రస్తుతం రూ. 1,36,550 కి దిగొచ్చింది. ముందటి రోజు ఇది రూ. 6550 తగ్గింది. దానికి ముందు కూడా వారం వ్యవధిలో వరుసగా రూ. 600, రూ. 2050, రూ. 950, రూ. 1400, రూ. 1000 ఇలా వరుసగా తగ్గుతూ వచ్చింది. మధ్యలో మార్చి 17న రూ. 600 పెరిగింది. అంతకుముందు కూడా ధరలు తగ్గుతూనే వచ్చాయి. 24 క్యారెట్ల పుత్తడి ధర చూస్తే మార్చి 21 ఉదయం 7 గంటల సమయంలో రూ. 1370 తగ్గి 10 గ్రాములకు రూ. 1,48,910 వద్ద ట్రేడ్ అవుతోంది. కిందటి రోజు ఇది రూ. 7 వేలకు పైగా తగ్గుముఖం పట్టింది.

బంగారం ధరల మాదిరిగానే వెండి ధరలు కూడా దిగొచ్చాయి. మార్చి 21న ప్రస్తుతం వార్త రాసే సమయంలో చూస్తే సిల్వర్ రూ. 5 వేలు తగ్గి కేజీకి హైదరాబాద్ నగరంలో రూ. 2.60 లక్షల వద్ద ఉంది. దీనికి ముందు కూడా వరుసగా రూ. 10 వేలు, రూ. 5 వేల చొప్పున తగ్గింది. ఇది వారం వ్యవధిలో రూ. 30 వేల వరకు తగ్గుముఖం పట్టింది.

మరోవైపు ఇంటర్నేషనల్ మార్కెట్లో ఒక్కసారిగా కరెక్షన్ కనిపించిందని చెప్పొచ్చు. స్పాట్ గోల్డ్ రేటు ఔన్సుకు ప్రస్తుతం 4492 డాలర్ల వద్ద ఉంది. కిందటి రోజు ఉదయం ఇది 4700 డాలర్ల స్థాయిలో ఉండగా.. ఒక్కరోజులోనే 200 డాలర్లకు పైగా పడిపోయింది. సిల్వర్ రేటు 67.97 డాలర్ల వద్ద ఉంది. కిందటి రోజు ఇది 75 డాలర్ల స్థాయిలో ఉండేది. 10 శాతం వరకు తగ్గిందన్నమాట. ఇదే సమయంలో డాలరుతో పోలిస్తే రూపాయి మారకం విలువ ప్రస్తుతం రూ. 93.57 వద్ద ఉంది. ఇది ఆల్ టైమ్ కనిష్ఠ స్థాయి కావడం గమనార్హం.

Follow us