ఒక్కసారిగా పెరిగిన బంగారం వెండి .. ధ‌ర‌లు చూసి పసిడి ప్రియులకు షాక్

Gold Price  మధ్యప్రాచ్యంలో భౌగోళిక రాజకీయ ఉద్రిక్తతలు తీవ్రమవుతున్న నేపథ్యంలో సురక్షిత పెట్టుబడిగా భావించే బంగారం, వెండి ధరలు పరుగులు పెడుతున్నాయి. ఇన్వెస్టర్లు వీటి కొనుగోళ్లకు మొగ్గు చూపడంతో బులియన్ మార్కెట్లో బుల్ రన్ కొనసాగుతోంది. మార్కెట్లో అధిక ఒడుదొడుకులు ఉన్నప్పటికీ పసిడి, వెండి ధరల ట్రెండ్ బలంగా కనిపిస్తోంది.

భారత మార్కెట్లో బుల్ జోరు
భారత మల్టీ కమొడిటీ ఎక్స్ఛేంజ్ (MCX)లో ఏప్రిల్ 2 గోల్డ్ ఫ్యూచర్స్ ధరలు తన జోరును కొనసాగిస్తున్నాయి. ఇప్పటికే రూ. 1,65,000 నిరోధాన్ని దాటిన పసిడి, ప్రస్తుతం రూ. 1,69,880 వద్ద ట్రేడ్ అవుతోంది. శుక్రవారం మాత్రం స్వల్పంగా తగ్గి రూ. 1,61,675 వద్ద ముగిసింది. మరోవైపు, వెండి కూడా అదే బాటలో పయనిస్తోంది. ఎంసీఎక్స్ లో మే 5 సిల్వర్ ఫ్యూచర్స్ ధర రూ. 2,85,000 మార్కును అధిగమించి, రూ. 3,00,000 స్థాయికి చేరువలో ట్రేడ్ అవుతోంది.

నిపుణుల విశ్లేషణ
ఈ ధరల పెరుగుదలపై ఎన్రిచ్ మనీ సీఈఓ పొన్ముడి ఆర్ విశ్లేషించారు. సరఫరా అంతరాయాల భయాలతో ముడిచమురు ధరలు పెరగడంతో పాటు బంగారం, వెండి కూడా రికార్డు స్థాయులకు చేరిన తర్వాత స్వల్పంగా దిద్దుబాటుకు గురయ్యాయని తెలిపారు. ధరలు కీలక స్థాయులను దాటుతున్నప్పుడు ట్రేడర్లు ఎక్కువగా ఆసక్తి చూపుతున్నారని, అయితే మార్కెట్లో అధిక ఒడుదొడుకులు ఉన్నందున రిస్క్ మేనేజ్‌మెంట్ తప్పనిసరి అని ఆయన సూచించారు.

ఆయన అంచనాల ప్రకారం, ప్రస్తుత మద్దతు స్థాయులు కొనసాగితే బంగారం ధర రూ. 1,70,000 వైపు వెళ్లే అవకాశం ఉంది. ఒకవేళ రూ. 1,57,000 కంటే దిగువకు పడిపోతే, దిద్దుబాటు రూ. 1,50,000 వరకు విస్తరించవచ్చని హెచ్చరించారు. వెండికి రూ. 2,55,000– రూ. 2,65,000 మధ్య బలమైన డిమాండ్ ఉందని, ధరలు రూ. 3,00,000–రూ. 3,05,000 శ్రేణికి చేరే అవకాశం ఉందని పొన్ముడి వివరించారు. ఒకవేళ రూ. 2,60,000 కంటే తగ్గితే, స్వల్పకాలికంగా ధరలు ఒకే పరిధిలో కదలాడొచ్చని పేర్కొన్నారు.