చెక్ బౌన్స్ అయితే ఎంత న‌ష్టమో తెలుసా?!

Cheque Bounce Rule

Cheque Bounce Rule: భారతదేశంలో చెక్ బౌన్స్ అవ్వడం అనేది తీవ్రమైన చట్టపరమైన నేరంగా పరిగణించబడుతుంది. దీనిని నెగోషియబుల్ ఇన్‌స్ట్రుమెంట్స్ యాక్ట్, 1881లోని సెక్షన్ 138 కింద చేర్చారు. మీరు ఇచ్చిన చెక్ బ్యాంక్ నుండి రిజెక్ట్ అయితే మీరు జరిమానా, జైలు శిక్ష రెండింటినీ ఎదుర్కోవాల్సి రావచ్చు. చెక్ బౌన్స్ అయినప్పుడు జరిగే చట్టపరమైన చర్యలు, శిక్షల వివరాలు ఇప్పుడు తెలుసుకుందాం!

చెక్ బౌన్స్ అయినప్పుడు చట్టపరమైన చర్యలు

చెక్ బౌన్స్ అయినప్పుడు బ్యాంక్ మీకు ఒక ‘రిటర్న్ మెమో’ ఇస్తుంది. అందులో బౌన్స్ అవ్వడానికి గల కారణం (ఉదాహరణకు: ఖాతాలో తగినంత డబ్బు లేకపోవడం, సంతకం కలవకపోవడం మొదలైనవి) రాసి ఉంటుంది. ఆ తర్వాత చట్టపరమైన ప్రక్రియ ఇలా సాగుతుంది.

లీగల్ నోటీసు: చెక్ బౌన్స్ అయిన 30 రోజులలోపు, చెక్ పొందిన వ్యక్తి మీకు రిజిస్టర్డ్ లీగల్ నోటీసు పంపాలి. ఇందులో మీకు డబ్బు చెల్లించడానికి 15 రోజుల సమయం ఇస్తారు.

Also Read: తెలంగాణ గ్రామ పంచాయతీలకు కేంద్రం శుభవార్త..

ఫిర్యాదు దాఖలు చేయడం: ఒకవేళ మీరు ఆ 15 రోజులలోపు నగదు చెల్లించకపోతే, ఫిర్యాదుదారుడు తదుపరి 30 రోజులలోపు మెజిస్ట్రేట్ కోర్టులో మీపై కేసు నమోదు చేయవచ్చు.

శిక్ష- జరిమానా

కోర్టులో నేరం రుజువైతే స‌ద‌రు వ్య‌క్తికి కింది శిక్షలు పడే అవకాశం ఉంది.

జైలు శిక్ష: దోషిగా తేలితే 2 ఏళ్ల వరకు జైలు శిక్ష పడవచ్చు.

భారీ జరిమానా: చెక్ మొత్తానికి రెట్టింపు జరిమానాను కోర్టు విధించవచ్చు. ఉదాహరణకు చెక్ రూ. 1 లక్ష అయితే, మీరు రూ. 2 లక్షల వరకు చెల్లించాల్సి రావచ్చు.

కొన్ని సందర్భాల్లో కోర్టు జైలు శిక్ష, జరిమానా రెండింటినీ కలిపి విధించవచ్చు.

ఇతర నష్టాలు

శిక్షలతో పాటు చెక్ బౌన్స్ అవ్వడం వల్ల ఇతర తీవ్ర పరిణామాలు కూడా ఉంటాయి.

సిబిల్ స్కోర్ (CIBIL Score): మీ క్రెడిట్ స్కోర్ దారుణంగా పడిపోతుంది. దీనివల్ల భవిష్యత్తులో హోమ్ లోన్, కార్ లోన్ లేదా పర్సనల్ లోన్ రావడం దాదాపు అసాధ్యం అవుతుంది.

బ్యాంక్ చర్యలు: బ్యాంక్ మీపై చెక్ బౌన్స్ ఛార్జీలు విధిస్తుంది. పదేపదే చెక్ బౌన్స్ అయితే బ్యాంక్ మీ ఖాతాను మూసివేయవచ్చు.

బ్లాక్ లిస్టింగ్: బ్యాంక్ మీకు భవిష్యత్తులో కొత్త చెక్ బుక్ జారీ చేయడానికి నిరాకరించవచ్చు.

జాగ్రత్తలు/ ఎలా తప్పించుకోవాలి?

పొరపాటున చెక్ బౌన్స్ అయితే వెంటనే అవతలి వ్యక్తితో మాట్లాడి నోటీసు వచ్చిన 15 రోజులలోపు నగదు చెల్లించేయండి. దీనివల్ల విషయం కోర్టు వరకు వెళ్లదు.

ఎల్లప్పుడూ బ్యాంక్ రికార్డుల్లో ఉన్న సంతకాన్నే చేయండి.

చెక్ ఇచ్చే ముందు మీ ఖాతాలో తగినంత బ్యాలెన్స్ ఉందో లేదో సరిచూసుకోండి.

Follow us