GST Reforms: జీఎస్టీ 2.0.. ఏ వాహ‌నాలు చౌక‌గా మార‌నున్నాయి?

GST Reforms: పండుగల ముందు కేంద్ర ప్రభుత్వం సామాన్య ప్రజలకు, ఆటోమొబైల్ పరిశ్రమకు పెద్ద ఉపశమనం కల్పించింది. జీఎస్టీ కౌన్సిల్ (GST Reforms) సమావేశంలో పన్నుల వ్యవస్థను సరళీకృతం చేస్తూ కేవలం రెండు స్లాబ్‌లు (5%, 18%) మాత్రమే ఉంచారు. ఈ నిర్ణయం నేరుగా వాహనాల ధరలు, వినియోగదారుల జేబుపై ప్రభావం చూపుతుంది. దీంతో ఏ వాహనాలు చౌకగా మారతాయి? ఏవి ఖరీదైనవిగా మారుతాయనే ప్రశ్నలు ప్రజల్లో తలెత్తుతున్నాయి. కాబట్టి అత్యధికంగా అమ్ముడయ్యే వాహనాలపై దీని ప్రభావం ఎలా ఉంటుందో ఈ నివేదికలో చూద్దాం.

చిన్న, మధ్య తరహా కార్ల ధరలు తగ్గుతాయి

గతంలో చిన్న, మధ్య తరహా కార్లపై 28% వరకు జీఎస్టీ ఉండేది. కానీ ఇప్పుడు కేవలం 18% పన్ను మాత్రమే చెల్లించాలి. ఈ మార్పులు 1200 సీసీ వరకు ఉన్న పెట్రోల్ కార్లకు, 1500 సీసీ వరకు ఉన్న డీజిల్ కార్లకు వర్తిస్తాయి. వాటి పొడవు 4 మీటర్ల కంటే తక్కువగా ఉండాలి. ఉదాహరణకు దీనివల్ల మారుతి సుజుకి ఆల్టో, టాటా నెక్సాన్, హ్యుందాయ్ i10, i20, వెన్యూ, కియా సోనెట్, ఆరా వంటి కార్ల కొనుగోలుదారులకు నేరుగా ప్రయోజనం లభిస్తుంది.

బైకులు, స్కూటర్ల కొనుగోలుకు మంచి సమయం

ప్రభుత్వం 350 సీసీ వరకు ఉన్న బైక్‌లు, స్కూటర్లపై జీఎస్టీని 28% నుంచి 18%కి తగ్గించింది. ఈ విభాగంలో దేశంలో అత్యధికంగా అమ్ముడయ్యే హీరో స్ప్లెండర్, హోండా షైన్, బజాజ్ పల్సర్, టీవీఎస్ అపాచీ, కేటీఎం డ్యూక్ వంటి బైక్‌లు ఉన్నాయి. అంటే సామాన్య ప్రజల రోజువారీ బైక్‌లు పన్ను తగ్గినందున ఇప్పుడు మునుపటి కంటే చౌకగా లభిస్తాయి. అయితే 350 సీసీ కంటే ఎక్కువ ఇంజిన్ ఉన్న ప్రీమియం బైక్‌లపై ఇప్పుడు 40% జీఎస్టీ చెల్లించాల్సి ఉంటుంది. దీనివల్ల వాటి ధర పెరుగుతుంది.

Also Read: Gold Rates : జీఎస్టీ రేట్ల సవరణతో బంగారం ప్రియులకు శుభవార్త..ఎంతవరకు తగ్గే చాన్స్ అంటే? 

మహీంద్రా థార్, ఎస్‌యూవీలపై ప్రభావం

వాహనాలపై జీఎస్టీ వాటి పొడవు, ఇంజిన్ ఆధారంగా నిర్ణయించబడుతుంది. మహీంద్రా థార్ త్రీ-డోర్ మోడల్ 4 మీటర్ల కంటే చిన్నది. ఇందులో 1.5 లీటర్ ఇంజిన్ కూడా అందుబాటులో ఉంది. కాబట్టి దీనిపై 18% జీఎస్టీ వర్తిస్తుంది. ఇది చౌకగా మారుతుంది. కానీ థార్ రాక్స్ (ఫైవ్-డోర్ మోడల్) పొడవు 4 మీటర్ల కంటే ఎక్కువ. ఇది 2.0 లీటర్ ఇంజిన్‌తో వస్తుంది. దీనిపై 40% పన్ను విధించబడుతుంది. దీనివల్ల ఇది ఖరీదైనదిగా మారుతుంది. అదేవిధంగా టాటా నెక్సాన్ పొడవు 3,995 మి.మీ. ఇందులో 1.2 లీటర్ పెట్రోల్, 1.5 లీటర్ డీజిల్ ఇంజిన్ ఉన్నాయి. రెండు ఇంజిన్‌లు 1,500 సీసీ కంటే తక్కువ కాబట్టి.. ఇప్పుడు దీనిపై కూడా కేవలం 18% జీఎస్టీ మాత్రమే ఉంటుంది.

ఆటో పార్ట్స్ చౌకగా మారుతాయి

జీఎస్టీ కౌన్సిల్ కేవలం వాహనాలపై మాత్రమే కాకుండా ఆటో పార్ట్స్‌పై కూడా ముఖ్యమైన నిర్ణయం తీసుకుంది. ఇప్పుడు అన్ని ఆటో విడిభాగాలపై వాటి హెచ్‌ఎస్ కోడ్ ఏదైనా సరే 18% ఏకరీతి పన్ను వర్తిస్తుంది. దీనివల్ల స్పేర్ పార్ట్స్ తయారుచేసే కంపెనీలకు ప్రయోజనం లభిస్తుంది. అలాగే వాహనాల నిర్వహణ ఖర్చు కూడా వినియోగదారులకు తగ్గుతుంది.

ప్రభుత్వ ప్రణాళిక

జీఎస్టీ స్లాబ్‌లలో ఈ మార్పులు సామాన్య ప్రజలకు ఉపశమనం కల్పించడానికి, పన్ను వ్యవస్థలోని సంక్లిష్టతలను తొలగించడానికి ఉద్దేశించినవని ఆర్థిక మంత్రి నిర్మల సీతారామన్ అన్నారు. ఈ చర్య వల్ల ఆటోమొబైల్, వ్యవసాయం, కార్మిక-ఆధారిత రంగాలకు బలం చేకూరుతుంది. పండుగల సీజన్‌లో మార్కెట్‌కు కొత్త ఊపు వస్తుంది.