ఏపీలోని టాప్-10 బీచ్‌ల గురించి మీకు తెలుసా..

సముద్రం దగ్గరకు వెళ్తే చాలు..మనసు గాల్లో తేలిపోతుంది. అల్లంత దూరం నుంచే తీరాన్ని తాకే అలలను చూస్తుంటే చిన్నపిల్లలు అయిపోతాం. అక్కడ ఎంత సేపు గడిపినా ఇంటికి తిరిగి వెళ్లాలనే అనిపించదు. అందుకే, బీచ్‌కు వెళ్దామంటే చాలు..చిన్నపిల్లలే కాదు.. పెద్దవాళ్లు కూడా ఎగిరి గంతేస్తారు. ఏపీలో ఉన్న విశాల సముద్రతీరంలో ఆహ్లాదాన్ని పంచే బీచ్‌లు చాలానే ఉన్నాయి. వీటిలో అత్యధిక బీచ్‌లు విశాఖ జిల్లాలోనే ఉన్నాయి.

బరువా బీచ్:
శ్రీకాకుళం జిల్లాలోని మహేంద్రతనయ నది సమీపంలో ఉన్న బరువా బీచ్‌.. ప్రకృతి అందాలకు పెట్టింది పేరు. ఇక్కడి సూర్యోదయం, సూర్యాస్తమయాలు ఎంతో అద్భుతంగా ఉంటాయి. సోంపేటకు ఈ బీచ్ చాలా దగ్గరగా ఉంటుంది. ఈ బీచ్ సమీపంలోని పురాతన ఆలయాలు, లైట్ హౌస్‌లు మిమ్మల్ని తప్పకుండా ఆకట్టుకుంటాయి.

భీమునిపట్నం బీచ్..
విశాఖ జిల్లాలో ఉన్న భీమునిపట్నాన్ని భీమిలి అని కూడా పిలుస్తారు. గోస్తానీ నది పాయ ఇక్కడ బంగాళాఖాతంలో కలుస్తుంది. విశాఖపట్నం నుంచి 20 కిమీలు ప్రయాణిస్తే ఈ భీమిలికి చేరుకోవచ్చు. ఇక్కడి బీచ్ అందాలు మిమ్మల్ని కట్టిపడేస్తాయి.

మంగినపూడి బీచ్..
విజయవాడకు 75 కిలోమీటర్ల దూరంలో మచిలీపట్నం సమీపంలో ఈ బీచ్ ఉంది. సెలవు దినాల్లో ఈ బీచ్‌లో ఇసుక కూడా కనిపించనంత జనం ఉంటారు. 2004 సునామీ తర్వాత ఈ బీచ్ అత్యంత ప్రమాదకరంగా మారింది. దీంతో ఇందులో స్నానాలు చేయడం ప్రమాదకరమని ప్రభుత్వం హెచ్చరికలు జారీ చేసింది. ఈ బీచ్ సమీపంలో ఉన్న చిలకలపూడి గిల్ట్ నగల తయారీకి ప్రసిద్ధి.
మేపాడు బీచ్..
నెల్లూరుకు 25 కిలోమీటర్ల దూరంలో ఈ బీచ్ ఉంది. అందమైన బీచ్‌లలో ఇదీ ఒకటి. ఇక్కడ తీరంలో స్నానం చేస్తూ, నడుస్తూ ఎంత సేపైనా సమయం గడిపేయవచ్చు. ఇక్కడ పర్యటకుల కోసం పర్యాటక బోట్లను కూడా అందుబాటులోకి తెచ్చారు.

ఆర్కే బీచ్..
విశాఖలో ముఖ్యమైన బీచ్ ఇది. నిత్యం పర్యటకులతో కిటకిటాలడే ఈ బీచ్‌లో స్నానం చేయడం ప్రమాదకరం. ఈ బీచ్ సమీపంలో ఉన్న రామకృష్ణ మిషన్ పేరునే ఈ బీచ్‌కు పెట్టారు. ఇక్కడి నుంచి డోల్ఫిన్ నోస్ పర్వతం చాలా అందంగా కనిపిస్తుంది.

రుషికొండ బీచ్..
విశాఖకు 8 కిలోమీటర్ల దూరంలో ఉన్న రుషికొండ బీచ్.. మీకు సరికొత్త అనుభూతిని పంచుతుంది. అర్ధచంద్రాకారంలో ఉండే ఈ బీచ్‌లో రిసార్టులు, వినోద కేంద్రాలు, స్పీడ్ బోట్లు, వాటర్ స్కీ, విండ్ సర్ఫింగ్ వంటివి అందుబాటులో ఉంటాయి.

యారాడ బీచ్..
విశాఖకు 15 కి.మీ.ల దూరంలో ఈ బీచ్ ఉంది. ఈ బీచ్ మిగతా సముద్రతీరాలు కంటే భిన్నంగా ఉంటుంది.
సూర్యలంక బీచ్..
గుంటూరు జిల్లాలోని బాపట్ల సమీపంలో ఈ బీచ్ ఉంది. ఇది నగరానికి దూరంగా ఉండటం వల్ల సాధారణ రోజుల్లో రద్దీ ఉండదు. కేవలం వారాంతాల్లో మాత్రమే రద్దీ కనిపిస్తుంది.

ఓడరేవు బీచ్..
విజయవాడకు 100 కి.మీ.ల దూరంలో చీరాలకు 6 కి.మీ.ల దూరంలో ఈ బీచ్ ఉంది. ఉదయం సాయంత్రం వేళల్లో ఈ బీచ్‌కు సమీపంలో ఉన్న జాలర్లు సముద్రంలోకి వేటకు వెళ్తుంటారు. వారు పట్టుకున్న చేపలను ఇక్కడికి వచ్చే పర్యటకులకు అమ్ముతారు. జాలర్లు పర్యటకులను సైతం పడవల్లో ఎక్కించుకుని సముద్రంలోకి తీసుకెళ్తారు.

వాకలపూడి బీచ్..
కాకినాడ సమీపంలో ఉన్న ఈ బీచ్ నిత్యం రద్దీగా ఉంటుంది. ఇది మడా అడవులకు సమీపంలో ఉంది. ప్రభుత్వ ఏటా ఇక్కడ కాకినాడ బీచ్ ఫెస్టివల్ నిర్వహిస్తుంది.

Follow us