పవన్ కళ్యాణ్ వల్లే ఆ పేరు వచ్చింది..అంబటి రాంబాబు

Ambati Rambabu

Ambati Rambabu  గుంటూరులో మాజీ మంత్రి అంబటి రాంబాబు ఆధ్వర్యంలో భోగి వేడుకలు ఘనంగా జరిగాయి. మెడికల్ కాలేజీ ప్రైవేటీకరణ జీవోలను భోగి మంటల్లో వేసి నిరసన తెలిపారు. వచ్చే ఎన్నికల్లో గుంటూరు నుంచే పోటీ చేస్తానని ప్రకటించారు. సంక్రాంతి సంబరాలకు, ‘సంబరాల రాంబాబు’ అనే పేరుకు పవన్ కళ్యాణే కారణమని, తనపై గేలి చేసే ప్రయత్నమే తనకు ఈ పేరు తెచ్చిందని వ్యాఖ్యానించారు. ఈసారి కూడా అంబటి రాంబాబు డ్యాన్స్ చేశారు.

• గుంటూరు భోగి వేడుకల్లో అంబటి రాంబాబు
• మరోసారి డ్యాన్స్‌తో దుమ్ము రేపారు
• పవన్ వల్లే సంక్రాంతి సంబరాలకు ప్రాధాన్యత

రాష్ట్రవ్యాప్తంగా ప్రజలు సంక్రాంతి పండుగలో భాగంగా నేడు భోగి పండుగను సంతోషంగా జరుపుకుంటున్నారు. ఈ క్రమంలో గుంటూరులో మాజీ మంత్రి అంబటి రాంబాబు ఆధ్వర్యంలో భోగి వేడుకలు ఘనంగా జరిగాయి. బుధవారం తెల్లవారుజామునే ఆయన భోగి వేడుకలు జరిగే ప్రాంతానికి చేరుకున్నారు. ఈసారి అంబటి ఆధ్వర్యంలో గుంటూరు జిల్లా కేంద్రంలో భోగి సంబరాలు అంబరాన్ని అంటాయి. డప్పు చప్పుళ్లతో వేడుకలు నిర్వహించిన ఆయన.. తనదైన శైలిలో హుషారుగా స్టెప్పులేశారు. మెడికల్ కాలేజీల ప్రైవేటీకరణకు సంబంధించిన జీవోలను భోగి మంటల్లో వేశారు.

అనంతరం అంబటి రాంబాబు మాట్లాడుతూ.. తాను ఎక్కడుంటే అక్కడే సంబరాలు జరగాలి. వచ్చే ఎన్నికల్లో గుంటూరు నుంచి పోటీ చేస్తున్నాను కాబట్టి ఇక్కడ నిర్వహిస్తున్నాను అని చెప్పుకొచ్చారు. సంక్రాంతి సంబరాలు అనగానే తాను గుర్తుకు రావడానికి కారణం పవన్ కళ్యాణ్ అని వెల్లడించారు. తాను సంక్రాంతికి డ్యాన్స్ చేస్తే.. పవన్ కళ్యాణ్ తనను ‘సంబరాల రాంబాబు’ అన్నారని గుర్తు చేశారు. దీంతో పాటు ‘బ్రో’ సినిమాలో తన పాత్రను పెట్టి గేలి చేసే ప్రయత్నం చేశారని, కానీ మొన్ననే ఆయన కూడా డ్యాన్స్ చేశారని విమర్శించారు. తాను రాజకీయ నాయకుడినని, ఆయన సినిమా యాక్టర్ అని, ఆయన తన మీద కౌంటర్ చేయడం వల్లే సంక్రాంతి సంబరాలకు అంత ప్రాముఖ్యత వచ్చిందని, తనకు ‘సంబరాల రాంబాబు’ అనే పేరు వచ్చిందని చెప్పుకొచ్చారు.

తాను సంక్రాంతికి సంబరాలు చేస్తాను కాబట్టే తనకు సంక్రాంతి సంబరాల రాంబాబు అనే పేరు వచ్చిందని తెలిపారు. తాను సంబరాల రాంబాబు అనే విషయాన్ని అంగీకరిస్తానని అంబటి రాంబాబు స్పష్టం చేశారు. అదే విషయాన్ని పవన్ కళ్యాణ్ అంగీకరిస్తారా అని ఆయన ప్రశ్నించారు.

అంబటి రాంబాబు భోగి పండుగ సందర్భంగా ఇలా డ్యాన్స్ చేయడం ఇదే ప్రథమం కాదు. గత కొన్ని సంవత్సరాలుగా ఆయన భోగి పండుగ వేళ ఇలా డ్యాన్స్ చేస్తున్నారు. గతంలో ఆయన చేసిన డ్యాన్స్ వీడియోలు విపరీతంగా వైరల్ అయ్యాయి. అయితే అంబటి రాంబాబు సత్తెనపల్లి నుంచి ఇదివరకు ఎమ్మెల్యేగా ఎన్నికైన కారణంగా.. అక్కడ భోగి వేడుకలు నిర్వహించి డ్యాన్స్ చేసేవారు. ఈసారి గుంటూరులో నిర్వహించారు. 2024 ఎన్నికల్లో వైఎస్ఆర్‌సీపీ అధికారం కోల్పోయిన తర్వాత కూడా, అంబటి రాంబాబు పార్టీ కార్యకర్తలతో కలిసి ఇలాంటి సాంస్కృతిక కార్యక్రమాల్లో చురుకుగా పాల్గొంటున్నారు.

Follow us