Nellore Collector: నెల్లూరు కలెక్టర్ ప్రేమకు ఫిదా.. తుఫాన్ బాధితులకు అండగా హిమాన్షు శుక్లా!

Nellore Collector: తుఫాన్ ‘మోంతా’ ప్రభావంతో నెల్లూరు జిల్లాలో తీవ్ర నష్టం వాటిల్లిన నేపథ్యంలో జిల్లా కలెక్టర్ (Nellore Collector) హిమాన్షు శుక్లా మానవత్వం, సేవా భావం ఉట్టిపడేలా వ్యవహరించిన తీరు సర్వత్రా ప్రశంసలు అందుకుంటోంది. కలెక్టర్ తన హోదాను పక్కనపెట్టి సాధారణ పౌరుడిలా తుఫాను ప్రభావిత ప్రాంతాలలో పర్యటించి బాధితులకు అండగా నిలబడిన విధానంపై సర్వత్రా హర్షం వ్యక్తమవుతోంది. ఆయన చూపిన ప్రేమ, చొరవకు స్థానిక ప్రజలు ముగ్ధులయ్యారు.

సాధారణ పౌరుడిలా బాధితుల వద్దకు

కలెక్టర్ హిమాన్షు శుక్లా నెల్లూరు రూరల్ మండలం కొండ్లపూడి ప్రాంతంలో ఏర్పాటు చేసిన పునరావాస కేంద్రాన్ని సందర్శించారు. తీవ్ర తుఫాను కారణంగా తమ ఇళ్లను కోల్పోయి భయం, ఆందోళనలో ఉన్న బాధితులకు ఆయన ధైర్యం చెప్పారు. సహాయక చర్యలను పర్యవేక్షించడమే కాకుండా బాధితుల బాధలను స్వయంగా తెలుసుకునే ప్రయత్నం చేశారు.

చిన్నారుల కోసం పాఠాలు, సెల్ఫీలు

పునరావాస కేంద్రంలో వసతి పొందుతున్న చిన్నారులను చూసి కలెక్టర్ శుక్ల భావోద్వేగానికి లోనయ్యారు. పిల్లలకు భయం పోగొట్టి వారిలో ఉత్సాహం నింపడానికి ఆయన ప్రయత్నించారు. ఈ సందర్భంగా ఆయన నేరుగా పిల్లల మధ్య కూర్చొని వారికి ఆసక్తి కలిగేలా పాఠాలు చెప్పారు. ఆపద సమయంలోనూ కలెక్టర్ తమకు పాఠాలు చెప్పడాన్ని, నవ్వించడాన్ని చూసి చిన్నారులు ఆనందం వ్యక్తం చేశారు.

Also Read: Honda Electric SUV: హోండా నుంచి ఎల‌క్ట్రిక్ కారు.. భార‌త్‌లో లాంచ్ ఎప్పుడంటే?

అంతేకాకుండా వారితో గడిపిన ఈ మధుర క్షణాలను గుర్తుగా ఉంచుకోవడానికి కలెక్టర్ వారితో కలిసి సెల్ఫీ కూడా తీసుకున్నారు. ఉన్నత స్థానంలో ఉన్న ఒక అధికారి ఇంతటి ఆపద సమయంలో తమపై చూపిన ప్రేమ, అభిమానం అక్కడి బాధితులను ఎంతగానో కదిలించింది. కొండ్లపూడి పునరావాస కేంద్రంలోని బాధితులు, ముఖ్యంగా మహిళలు, కలెక్టర్ తమపై చూపిన శ్రద్ధకు ఫిదా అయ్యారు.

అధికారులకు ఆదర్శప్రాయం

కలెక్టర్ హిమాన్షు శుక్లా వ్యవహరించిన తీరు ఇతర ప్రభుత్వ అధికారులకు కూడా ఆదర్శంగా నిలిచింది. తుఫాను వంటి విపత్కర పరిస్థితులలో కేవలం అధికారిక సమీక్షలకు పరిమితం కాకుండా ప్రజల్లోకి వెళ్లి, వారి సమస్యలను అర్థం చేసుకుంటూ మానవీయ కోణంలో సహాయం అందించడం అభినందనీయం. జిల్లా కలెక్టర్‌గా తన బాధ్యతలను సక్రమంగా నిర్వహిస్తూనే బాధిత ప్రజల పట్ల ఆయన చూపిన సానుభూతి, ప్రేమ నెల్లూరు జిల్లాలో చర్చనీయాంశమైంది. తుఫాన్ కష్టకాలంలో కలెక్టర్ హిమాన్షు తీసుకున్న చొరవను జిల్లా ప్రజలు స్వాగతిస్తున్నారు.