Lulu Malls : ఆంధ్రప్రదేశ్‌కు లులుమాల్‌ .. విశాఖపట్నం, విజయవాడలో భారీ మాల్స్‌కు ప్రభుత్వం గ్రీన్‌సిగ్నల్

Lulumal for Andhra Pradesh.. Government green signal for huge malls in Visakhapatnam and Vijayawada

Lulu Malls : ఆంధ్రప్రదేశ్‌లో వాణిజ్య, పర్యాటక రంగాల్లో మరో కీలక ముందడుగు పడింది. అంతర్జాతీయ స్థాయిలో పేరుపొందిన లులు గ్రూప్‌, రాష్ట్రంలోని రెండు ప్రధాన నగరాల్లో విశాఖపట్నం మరియు విజయవాడలో ప్రపంచ స్థాయి షాపింగ్ మాల్స్‌ నిర్మాణానికి సన్నద్ధమవుతోంది. ఈ ప్రాజెక్టులకు ఏపీ ప్రభుత్వం గ్రీన్‌సిగ్నల్ ఇస్తూ, భూముల కేటాయింపుకు సంబంధించిన ఉత్తర్వులను జారీ చేసింది.

విశాఖపట్నంలో 13.5 లక్షల చదరపు అడుగుల విస్తీర్ణంలో లులు మాల్

లులు గ్రూప్‌ మొదటి మాల్‌ను విశాఖపట్నంలో నిర్మించనుంది. బీచ్ రోడ్డులోని హార్బర్ పార్క్ ప్రాంతంలో 13.74 ఎకరాల విలువైన భూమిని సంస్థకు 99 ఏళ్ల లీజుకు కేటాయించారు. ఆంధ్రప్రదేశ్ ఇండస్ట్రియల్ ఇన్ఫ్రాస్ట్రక్చర్ ఇన్వెస్ట్‌మెంట్ కార్పొరేషన్ (APIIIC) ద్వారా ఈ కేటాయింపు జరిగింది. ఈ ప్రాంగణంలో లులు సూపర్ మార్కెట్, లులు ఫ్యాషన్, కుటుంబ వినోద కేంద్రం (ఫ్యామిలీ ఎంటర్‌టైన్‌మెంట్ సెంటర్), లులు కనెక్ట్ వంటి వాణిజ్య సంస్థలు ఏర్పాటుకాబోతున్నాయి. మొత్తం 13.5 లక్షల చదరపు అడుగుల విస్తీర్ణంలో ఈ మాల్ నిర్మితమవుతుండటంతో విశాఖపట్నం పర్యాటక రంగానికి మరో కొత్త చెలిమి కలవనున్నది. ఈ ప్రాజెక్టును ఏపీ ప్రభుత్వం ప్రత్యేక వర్గంగా పరిగణించడంతో, ప్రారంభ మూడు సంవత్సరాలపాటు లీజు మాఫీ వర్తింపజేయాలని నిర్ణయించింది. 2024–29 పర్యాటక భూముల కేటాయింపు విధానం ప్రకారం భూముల ధర నిర్ణయించనున్నారు. భూమిపై ఉన్న కోర్టు కేసులు పరిష్కరించేందుకు APIIIC, రెవెన్యూ శాఖ సంయుక్తంగా చర్యలు తీసుకోనున్నట్లు ప్రభుత్వం తెలిపింది.

విజయవాడకు మరో ప్రీమియర్ మాల్‌

లులు గ్రూప్‌ రెండో మాల్‌ను విజయవాడ సమీపంలో ఏర్పాటు చేయనుంది. ఈ మాల్‌ను 2.23 లక్షల చదరపు అడుగుల విస్తీర్ణంలో నిర్మించనున్నట్లు సమాచారం. ఇందుకోసం ఆర్టీసీకి చెందిన 4.15 ఎకరాల భూమిని ప్రభుత్వ సూత్రప్రాయ ఆమోదంతో లీజుకు ఇవ్వనున్నారు. అయితే, ఈ స్థలంలో ప్రస్తుతం ఉన్న ఆర్టీసీ నిర్మాణాలను వేరే ప్రదేశానికి తరలించాలని ఎన్టీఆర్ జిల్లా కలెక్టర్‌కు ప్రభుత్వం ఆదేశాలు జారీ చేసింది. ప్రత్యామ్నాయంగా RTCకి మరొక స్థలాన్ని కేటాయించి, ప్రస్తుత భూమిని పర్యాటక శాఖకు అప్పగించనున్నది.

సమయానికి పూర్తి చేయాలని స్పష్టమైన ఆదేశాలు

ఈ రెండు ప్రాజెక్టుల నిర్మాణాలను పరిశ్రమలు, వాణిజ్య శాఖలు మరియు APIIIC నిర్ణీత కాల వ్యవధిలో పూర్తి చేయాలని ప్రభుత్వం స్పష్టం చేసింది. పర్యాటక భూముల కేటాయింపు విధానానికి అనుగుణంగా మాల్స్, రెస్టారెంట్లు వంటి ప్రాజెక్టుల్నీ చేర్చాలని ఉత్తర్వుల్లో పేర్కొన్నారు. ప్రభుత్వ వైఖరి ప్రకారం, ఈ ప్రాజెక్టులు రాష్ట్రానికి పర్యాటకంగా, ఆర్థికంగా గణనీయమైన లాభాలు తీసుకురానున్నాయని భావిస్తున్నారు. ఈ లుల్ మాల్స్ పూర్తి కాగానే స్థానిక ఉద్యోగావకాశాలు, పెట్టుబడుల ఆకర్షణ, పర్యాటక రంగ అభివృద్ధికి అనేక మార్గాలు తెరుచుకోనున్నాయి. అంతర్జాతీయ స్థాయిలో ఉండే ఈ మాల్స్, రాష్ట్రానికి కొత్త గుర్తింపు తీసుకురావడంలో కీలకపాత్ర పోషించనున్నాయి.

Read Also: KTR : ఇందిరమ్మ రాజ్యంలో ఇంటింటికీ మద్యం..! : కాంగ్రెస్‌ నిర్ణయంపై కేటీఆర్‌ ఆగ్రహం

Follow us