AP : ఏపీలో 3 నెలల ముందే స్థానిక ఎన్నికలు..సన్నాహకాల్లో రాష్ట్ర ఎన్నికల సంఘం!
చట్టంలో ఉన్న నిబంధనల ప్రకారం, ఐదేళ్ల పదవీకాలం ముగిసే ముందు మూడునెలలకే ఎన్నికల ప్రక్రియ పూర్తి చేయాల్సిన అవసరం ఉందని, ఈ నేపథ్యంలో ముందస్తు ఏర్పాట్లు చేస్తున్నట్లు రాష్ట్ర ఎన్నికల కమిషనర్ నీలం సాహ్నీ తెలిపారు. ఈ మేరకు ఆమె బుధవారం పంచాయతీరాజ్, పురపాలక శాఖల కమిషనర్లకు లేఖలు పంపారు.
- By Latha Suma Published Date - 10:16 AM, Thu - 4 September 25
AP : ఆంధ్రప్రదేశ్‌లో మరోసారి ఎన్నికల హోరు మొదలుకాబోతోంది. రాష్ట్రంలోని పలు మున్సిపల్ కార్పొరేషన్లు, మున్సిపాలిటీల పాలకవర్గాల పదవీకాలం త్వరలో ముగియనుండటంతో, స్థానిక సంస్థల ఎన్నికలను మూడునెలల ముందుగానే 2026 జనవరిలో నిర్వహించేందుకు రాష్ట్ర ఎన్నికల సంఘం (ఎస్ఈసీ) ప్రణాళికలు సిద్ధం చేస్తోంది. చట్టంలో ఉన్న నిబంధనల ప్రకారం, ఐదేళ్ల పదవీకాలం ముగిసే ముందు మూడునెలలకే ఎన్నికల ప్రక్రియ పూర్తి చేయాల్సిన అవసరం ఉందని, ఈ నేపథ్యంలో ముందస్తు ఏర్పాట్లు చేస్తున్నట్లు రాష్ట్ర ఎన్నికల కమిషనర్ నీలం సాహ్నీ తెలిపారు. ఈ మేరకు ఆమె బుధవారం పంచాయతీరాజ్, పురపాలక శాఖల కమిషనర్లకు లేఖలు పంపారు.
ప్రస్తుతం గ్రామీణ ప్రాంతాల్లో ఉన్న సర్పంచుల పదవీకాలం 2026 ఏప్రిల్‌లో ముగియనుండగా, మున్సిపల్ కార్పొరేషన్లు, మున్సిపాలిటీలు, నగర పంచాయతీల్లో కార్పొరేటర్లు, కౌన్సిలర్లు నిర్వహిస్తున్న పదవీకాలం వచ్చే ఏడాది మార్చి 17తో ముగియనుంది. నీలం సాహ్నీ లేఖలో, ఎన్నికల నిర్వహణకు సంబంధించి ఇప్పటికే షెడ్యూల్‌ను రూపొందించినట్లు తెలిపారు. ముఖ్యంగా, వార్డుల పునర్విభజన (డీలిమిటేషన్), రిజర్వేషన్ల ఖరారు వంటి కీలక ప్రక్రియలను అక్టోబరు 15 నాటికి పూర్తిచేయాలని సూచించారు.
ఎన్నికల షెడ్యూల్‌లో ప్రధాన తేదీలు ఇలా ఉన్నాయి:
. అక్టోబర్ 15: వార్డుల పునర్విభజన మరియు రిజర్వేషన్ల ఖరారు పూర్తి
. నవంబర్ 15: ఓటర్ల జాబితాలను వార్డుల వారీగా సిద్ధం
. నవంబర్ 30: పోలింగ్ కేంద్రాల ఖరారీ
. డిసెంబర్ 15: రిజర్వేషన్ల ప్రక్రియ ముగింపు
. డిసెంబర్ చివరివారం: రాజకీయ పార్టీలతో సమావేశం
ఈ కార్యక్రమాలన్నీ పూర్తయిన తర్వాత, జనవరి 2026 నాటికి ఎన్నికల ప్రక్రియను పూర్తిచేసే లక్ష్యంగా రాష్ట్ర ఎన్నికల సంఘం కృషి చేస్తోంది. 2021లో ఎన్నికలు జరిగిన 12 మున్సిపల్ కార్పొరేషన్లు, 75 మున్సిపాలిటీలు/నగర పంచాయతీల పాలకవర్గాల పదవీకాలం వచ్చే మార్చితో ముగియనుండటంతో, అక్కడికి సంబంధించిన ఏర్పాట్లు మొదలయ్యాయి. ఇక, మరోవైపు, 2021 నవంబరులో ఎన్నికలు జరిగిన నెల్లూరు కార్పొరేషన్‌తో పాటు 12 ఇతర స్థానిక సంస్థల పదవీకాలం కూడా వచ్చే నవంబరుతో ముగియనుంది. వీటిపై త్వరలో ఎన్నికల షెడ్యూల్ ప్రకటించే అవకాశం ఉంది. అలాగే, న్యాయపరమైన అంశాల కారణంగా ఎన్నికలు జరగని శ్రీకాకుళం, రాజమహేంద్రవరం, మంగళగిరి-తాడేపల్లి వంటి నగరాల్లోనూ ఎన్నికల నిర్వహణకు చర్యలు తీసుకుంటున్నట్లు లేఖలో పేర్కొన్నారు.
గ్రామ పంచాయతీ, జడ్పీటీసీ, ఎంపీటీసీలకు షెడ్యూల్ త్వరలో
మున్సిపల్ ఎన్నికల తర్వాత, 2026 జనవరి నుంచి గ్రామ పంచాయతీలకు, జూలై నుంచి జడ్పీటీసీ, ఎంపీటీసీలకు ఎన్నికల నిర్వహణకు సన్నాహాలు చేస్తామని నీలం సాహ్నీ వెల్లడించారు. మొత్తంగా చూస్తే, 2026 ఎన్నికలకు సంబంధించిన మౌలిక సన్నాహకాలు ఇప్పటికే ప్రారంభమయ్యాయి. ఈసారి ఎన్నికల నిర్వహణను చట్టబద్ధంగా, సమయానుసారంగా పూర్తి చేయడానికి ఎన్నికల సంఘం అన్ని స్థాయిల్లో కార్యాచరణకు రంగం సిద్ధం చేస్తోంది. స్థానిక పరిపాలనలో ప్రజాప్రాతినిధ్యం కల్పించే ఈ ఎన్నికలు రాష్ట్ర రాజకీయాల్లో కీలక మలుపుగా మారే అవకాశం ఉన్నది.
Read Also: Bigg Boss: బిగ్‌బాస్ 9 కంటెస్టెంట్ల జాబితా లీక్.? సోషల్ మీడియాలో చర్చ హీట్..!
