Nandamuri Balakrishna : ఏయ్ నువ్వెందుకు వచ్చావ్.. ఎవడు రమ్మన్నాడు.. ఎయిర్‌పోర్టులో బాలకృష్ణ ఫైర్ .. అసలేమైంది?

Nandamuri Balakrishna

సినీ నటుడు, ఎమ్మెల్యే బాలకృష్ణ మరోసారి వార్తల్లో నిలిచారు. విశాఖ ఎయిర్‌పోర్టులో బాలయ్య కోపంతో ఉన్న వీడియో సోషల్ మీడియాలో వైరల్ అవుతోంది. అఖండ 2 సినిమా ప్రమోషన్లలో భాగంగా చిత్ర బృందం విశాఖపట్నం వచ్చింది. ఈ సందర్ఫంగా కొంతమంది అభిమానులు విశాఖ విమానాశ్రయంలో బాలకృష్ణను కలిసేందుకు ఉత్సాహం చూపించారు. ఈ సందర్భంగా బాలయ్య ఓ వ్యక్తిపై చిందులు వేశారు. నువ్వెందుకు వచ్చావ్ ఇక్కడకు అంటూ కోపగించుకున్నారు. వెనక్కి వెళ్లు, సాయంత్రం కూడా రాకూడదంటూ కోపం ప్రదర్శించారు. ఈ వీడియో ప్రస్తుతం వైరల్ అవుతోంది.

సినీ హీరో, హిందూపురం ఎమ్మెల్యే నందమూరి బాలకృష్ణ మరోసారి కోపగించుకున్నారు. సాధారణంగా ఎప్పుడూ ఉల్లాసంగా, ఉత్సాహంగా కనిపిస్తుంటారు బాలయ్య. అలాంటి బాలయ్యకు కోపం వస్తే ఎలాం ఉంటుందో అందరికీ తెలిసిన సంగతే. ఆగ్రహంతో ఊగిపోతుంటారు. అయితే బాలకృష్ణ ఎంత కోప్పడినా.. అది మా బాలయ్య ప్రేమ అంటూ మురిసిపోతుంటారు. బాలకృష్ణ కోపానికి సంబంధించి గతంలో ఎన్నో ఘటనలు చూశాం. తాజాగా మరోసారి ఇలాంటి ఘటనే చోటుచేసుకుంది. విశాఖపట్నం విమానాశ్రయంలో ఈ ఘటన జరిగింది. అయితే ఏం జరిగిందనే దానిపై క్లారిటీ లేదు కానీ.. ఓ వ్యక్తిని చూసి బాలయ్య చిందులేశారు. నువ్వెందుకు వచ్చావ్ ఇక్కడికీ అంటూ కోపంతో ఊగిపోయారు.

నిన్ను ఇక్కడికి ఎవడు రమ్మన్నాడు అంటూ ఆగ్రహం వ్యక్తం చేశారు. వెంటనే వెళ్లిపో.. సాయంత్రం కూడా వాడు కనిపించకూడదు అంటూ పక్కనున్న వారికి సూచించారు. అయితే ఎవరా వ్యక్తి.. ఏం జరిగిందనేదీ తెలియడం లేదు కానీ.. ఈ వీడియో సోషల్ మీడియాలో వైరల్ అవుతోంది. అయితే తనను పలకరించడానికి వచ్చిన మహిళలతో అభిమానంగా మాట్లాడారు బాలకృష్ణ. సెల్ఫీలు కూడా దిగారు.

మరోవైపు బాలకృష్ణ నటిస్తున్న లేటెస్ట్ మూవీ అఖండ 2 తాండవం.. డిసెంబర్ నెలలో విడుదల కానుంది. ఈ నేపథ్యంలో చిత్ర బృందం ప్రమోషన్స్ నిర్వహిస్తోంది. ఈ క్రమంలోనే అఖండ 2 టీమ్ విశాఖలో ఈవెంట్ నిర్వహిస్తోంది. ఈ ఈవెంట్ కోసం నందమూరి బాలకృష్ణ, డైరెక్టర్ బోయపాటి శ్రీనివాస్, నిర్మాత రామ్ ఆచంట విశాఖకు చేరుకున్నారు. ఎయిర్ పోర్టులో ఈ ఘటన చోటుచేసుకుంది. మరోవైపు విశాఖ చేరుకున్న బాలకృష్ణ.. సింహాచలం అప్పన్నను దర్శించుకున్నారు. డైరెక్టర్ బోయపాటి శ్రీను, ప్రొడ్యూసర్ రామ్ ఆచంటతో కలిసి సింహాచలం శ్రీ వరాహ లక్ష్మీనరసింహ స్వామి వారినిదర్శించుకున్నారు. ప్రత్యేక పూజలు నిర్వహించారు.

అంతకుముందు ఆలయానికి వచ్చిన అఖండ 2 చిత్ర బృందానికి ఆలయ అధికారులు, అర్చకులు ఆలయ మర్యాదలతో స్వాగతం పలికారు. అనంతరం కప్పస్తంభ ఆలింగనం, బేడా మండపం చుట్టూ చిత్ర బృందం ప్రదక్షిణలు చేసింది. ఆ తరువాత శ్రీ వరాహ లక్ష్మీనరసింహస్వామి వారి మూల విరాట్టును దర్శించుకున్నారు. అనంతరం ప్రత్యేక పూజలు నిర్వహించారు. ఆలయ అర్చకులు సినిమా యూనిట్‌కు వేద ఆశీర్వచనం అందించారు. మరోవైపు అఖండ 2 సినిమాలోని తాండవం పాట ఇటీవల విడుదలైన సంగతి తెలిసిందే. దీనికి మంచి స్పందన లభిస్తోంది.

Follow us