Jada Sravan Kumar : జడ శ్రవణ్ కు సంబంధించి మరో మోసం బట్టబయలు

Jada Sravan

జడ శ్రవణ్ కు సంబదించిన నేరాలు ఒక్కటిగా బయటకు వస్తున్నాయి. ఇప్పటికే పలువురు బాధితులను తమను శ్రవణ్ మోసం చేశాడంటూ మీడియా ముందుకు రాగా..తాజాగా మరో మోసం బట్టబయలైంది. ప్రజా సమస్యలపై గళం విప్పుతానని చెప్పుకునే న్యాయవాది జడ శ్రవణ్ కుమార్ చుట్టూ వివాదాలు ముదురుతున్నాయి. ఇప్పటికే పలు ఆరోపణలు ఎదుర్కొంటున్న ఆయనపై తాజాగా ఒక బీసీ మహిళ సంచలన ఆరోపణలు చేశారు. బాధితురాలు గోగుల నాగ జ్యోతి తెలిపిన వివరాల ప్రకారం.. తమను నమ్మించి, మాయమాటలు చెప్పి లక్ష రూపాయల నగదును గూగుల్ పే ద్వారా తన ఖాతాకు బదిలీ చేయించుకున్నారని ఆమె ఆరోపించారు. ఒక సామాన్య మధ్యతరగతి కుటుంబంపై ఇలాంటి మోసానికి పాల్పడటం ఇప్పుడు స్థానికంగా తీవ్ర చర్చనీయాంశంగా మారింది.

బెదిరింపులు మరియు రౌడీయిజం

కేవలం డబ్బు తీసుకోవడంతోనే ఆగకుండా, ఆ డబ్బు తిరిగి అడిగినందుకు జడ శ్రవణ్ కుమార్ తమను తీవ్రంగా వేధిస్తున్నారని నాగ జ్యోతి భర్త ధనుంజయ వాపోయారు. తమ డబ్బులు తమకు ఇవ్వమని అడిగితే చంపేస్తానని బెదిరింపులకు దిగుతున్నారని, ఈ విషయాన్ని ఎవరికైనా చెబితే లేదా పోలీసులను ఆశ్రయిస్తే తీవ్ర పరిణామాలు ఉంటాయని హెచ్చరిస్తున్నారని బాధితులు ఆవేదన వ్యక్తం చేస్తున్నారు. ఒక న్యాయవాదిగా ఉండి రౌడీయిజం, గూండాయిజం చేయడం ఏంటని వారు ప్రశ్నిస్తున్నారు.

న్యాయం కోసం అధికారులకు విన్నపం

బీసీ కులానికి చెందిన తమకు జరిగిన ఈ అన్యాయంపై ఉన్నతాధికారులు స్పందించాలని నాగ జ్యోతి కోరుతున్నారు. వరుసగా వెలుగులోకి వస్తున్న ఈ అక్రమాలపై పూర్తిస్థాయి విచారణ జరిపి, తమకు రావలసిన డబ్బును ఇప్పించడంతో పాటు తమ ప్రాణాలకు రక్షణ కల్పించాలని ఆమె వేడుకుంటున్నారు. త్వరలోనే పోలీసులకు అధికారికంగా ఫిర్యాదు చేసేందుకు బాధితురాలు సిద్ధమవుతున్నారు. ఈ ఘటనపై మరింత స్పష్టత రావాలంటే పోలీసు విచారణ జరగాల్సి ఉంది.

Follow us