Tri-Service Guard Of Honour: త్రి-సేవా గార్డ్ ఆఫ్ ఆనర్.. దాని అర్థం ఏమిటి?

Tri-Service Guard Of Honour: రష్యా అధ్యక్షుడు పుతిన్ రెండు రోజుల భారత పర్యటనలో ఉన్నారు. పుతిన్ గురువారం సాయంత్రం ఢిల్లీకి చేరుకున్నారు. పాలెం విమానాశ్రయంలో పుతిన్‌కు స్వాగతం పలకడానికి ప్రోటోకాల్‌ను బ్రేక్ చేస్తూ స్వయంగా ప్రధాని మోదీ చేరుకున్నారు. పుతిన్ విమానం దిగగానే ప్రధానమంత్రి ఆయనను ఆలింగనం చేసుకుని స్వాగతించారు. ఆ తర్వాత ఆయనకు గార్డ్ ఆఫ్ ఆనర్ (Tri-Service Guard Of Honour) కూడా ఇచ్చారు. ఆ తర్వాత ప్రధాని మోదీ ఆయన్ను తన నివాసంలో ప్రైవేట్ విందు కోసం తీసుకువెళ్లారు.

అనంతరం శుక్రవారం ఉదయం పుతిన్ తన కార్యక్రమం ప్రకారం రాష్ట్రపతి భవన్‌కు చేరుకున్నారు. రాష్ట్రపతి భవన్‌లో పుతిన్‌కు లాంఛనప్రాయ స్వాగతం లభించింది. అక్కడ ఆయన రాష్ట్రపతి ద్రౌపది ముర్మును కలిశారు. ఈ సందర్భంగా ప్రధానమంత్రి నరేంద్ర మోదీ, విదేశాంగ మంత్రి ఎస్. జైశంకర్, ఢిల్లీ లెఫ్టినెంట్ గవర్నర్ వీకే సక్సేనా, సీడీఎస్ అనిల్ చౌహాన్ కూడా పాల్గొన్నారు. ఇక్కడ పుతిన్‌కు త్రి-సేవా గార్డ్ ఆఫ్ ఆనర్ కూడా అందించారు. ఇప్పుడు ప్రశ్న ఏమిటంటే త్రి-సేవా గార్డ్ ఆఫ్ ఆనర్ అంటే ఏమిటి? దానిని ఎవరికి, ఎప్పుడెప్పుడు ఇస్తారు? అనే ప్ర‌శ్న‌లు వ‌స్తున్నాయి.

Also Read: Telangana Global Summit 2025 : తెలంగాణ గ్లోబల్ సమ్మిట్ కు సామాన్యులకు సైతం ఆహ్వానం

త్రి-సేవా గార్డ్ ఆఫ్ ఆనర్ అంటే ఏమిటి?

ఇది ఒక ప్రత్యేకమైన వందనం. దాని పేరులోనే ఉన్నట్లుగా ఇందులో మూడు సేనల (త్రి-సేవా) జవాన్లు ఉంటారు. ఇందులో భారతదేశ భూసేన (Army), నౌకాదళం (Navy), వైమానిక దళం (Air Force) జవాన్లను కలిపి ఒక దళాన్ని తయారు చేస్తారు. ఈ దళం దేశ ఐక్యతను, మూడు సేనల మధ్య సమన్వయాన్ని ప్రదర్శిస్తుంది. ఈ దళం ప్రధాన కార్యాలయం ఢిల్లీలోనే ఉంటుంది.

దీనిని ఎవరికి ఇస్తారు?

ఈ గార్డ్ ఆఫ్ ఆనర్‌ను భారతదేశ రాష్ట్రపతికి ఇస్తారు. ఎందుకంటే రాష్ట్రపతియే భారతదేశ మూడు సేనలకు సుప్రీమ్ కమాండర్. మరొక దేశం అధ్యక్షుడు, రాజు లేదా రాణి వస్తే వారికి ఈ గౌరవం ఇవ్వబడుతుంది. దీనితో పాటు ఈ గౌరవాన్ని మరొక దేశం ప్రధానమంత్రికి లేదా మరేదైనా విశిష్ట అతిథికి కూడా ఇస్తారు. భారతదేశ ఉపరాష్ట్రపతి, ప్రధానమంత్రికి కూడా గార్డ్ ఆఫ్ ఆనర్ ఇస్తారు. కానీ ప్రోటోకాల్ ప్రకారం జవాన్ల సంఖ్య కొద్దిగా తక్కువగా ఉంటుంది.

ఈ గౌరవాన్ని ఎలా ఇస్తారు?

మూడు సేనల నుండి ఎంపిక చేయబడిన జవాన్ల ఈ దళం ఒక ప్రత్యేక ప్రదేశంలో నిలబడి ఉంటుంది. ఈ దళంలో సాధారణంగా 100 నుండి 150 మంది జవాన్లు ఉంటారు. వీవీఐపీ హోదాను బట్టి జవాన్ల సంఖ్య మారుతూ ఉంటుంది. ముఖ్య అతిథి అక్కడకు చేరుకోగానే.. వారిని ఒక ఎత్తైన ప్రదేశానికి అంటే వేదికపైకి తీసుకువెళతారు. ఆ తర్వాత బ్యాండ్ జాతీయ గీతం ట్యూన్‌ను వాయిస్తుంది. తరువాత గార్డ్ ఆఫ్ ఆనర్ కమాండర్ ముఖ్య అతిథిని మొత్తం దళాన్ని తనిఖీ చేయమని ఆహ్వానిస్తారు. వీవీఐపీ నెమ్మదిగా జవాన్ల లైన్ వెంట నడుస్తారు. జవాన్లు ఒక ప్రత్యేక పద్ధతిలో తమ ఆయుధాన్ని గౌరవం ఇచ్చే భంగిమలో ఉంచుతారు. దీనిని సలామీ శస్త్ర అని అంటారు.