War : ఇంకో 6 నెలల పాటు యుద్ధం కొనసాగబోతుందా..? ఇరాన్ అదే చెపుతుందా ?

Iran-US War

పశ్చిమ ఆసియాలో శాంతి నెలకొంటుందని ఆశించిన ప్రపంచ దేశాలకు ఇరాన్ షాకింగ్ న్యూస్ చెప్పింది. ఇజ్రాయెల్ మరియు అమెరికా కూటమితో తలపడేందుకు తాము సిద్ధంగా ఉన్నామని, కనీసం మరో ఆరు నెలల పాటు యుద్ధాన్ని కొనసాగించగల సామర్థ్యం తమకు ఉందని ఇరాన్ ఇస్లామిక్ రెవల్యూషనరీ గార్డ్ కార్ప్స్ (IRGC) స్పష్టం చేసింది. తమ దేశ సార్వభౌమాధికారంపై దాడి జరిగితే వెనక్కి తగ్గబోమని, సుదీర్ఘ పోరాటానికైనా వెనుకాడబోమని స్టేట్ మీడియా ద్వారా హెచ్చరించింది. ఇరాన్ నుంచి వచ్చిన ఈ ప్రకటనతో గల్ఫ్ రీజియన్‌లో భయాందోళనలు మరింత పెరిగాయి.

ట్రంప్ సీరియస్ వార్నింగ్.. చర్చలకు తావులేదన్న ఇరాన్!

మరోవైపు అమెరికాతో దౌత్యపరమైన చర్చలు జరిపే ప్రసక్తే లేదని ఇరాన్ తెగేసి చెప్పింది. దీనిపై అమెరికా అధ్యక్షుడు డొనాల్డ్ ట్రంప్ అత్యంత తీవ్రంగా స్పందించారు. చర్చలకు నిరాకరించడం ద్వారా ఇరాన్ తన వినాశనాన్ని తానే కోరుకుంటోందని, ఆ దేశంపై దాడులను మరింత తీవ్రతరం చేస్తామని ఆయన హెచ్చరించారు. అమెరికా సైనిక బలగాలను అప్రమత్తం చేస్తూనే, ఇరాన్ ఆర్థిక మూలాలను దెబ్బతీసేలా వ్యూహాలు రచిస్తోంది. అగ్రరాజ్యం నుంచి వస్తున్న ఈ హెచ్చరికలు యుద్ధం త్వరలోనే అదుపు తప్పే ప్రమాదం ఉందని సూచిస్తున్నాయి.

ఇజ్రాయెల్ విధ్వంసం.. 300 లక్ష్యాలపై విరుచుకుపడ్డ ఐఏఎఫ్!

ఇరాన్ మద్దతు ఉన్న గ్రూపులే లక్ష్యంగా ఇజ్రాయెల్ తన దాడులను ముమ్మరం చేసింది. కేవలం శనివారం ఒక్కరోజే దాదాపు 300 కీలక లక్ష్యాలపై క్షిపణులతో విరుచుకుపడినట్లు ఇజ్రాయెల్ రక్షణ దళం ప్రకటించింది. ఇరాన్ యొక్క ఆయుధ గిడ్డంగులు, కమ్యూనికేషన్ కేంద్రాలే లక్ష్యంగా ఈ దాడులు జరిగాయి. ఇజ్రాయెల్ ప్రధాని నెతన్యాహు కూడా వెనక్కి తగ్గేది లేదని స్పష్టం చేయడంతో, ఇరు దేశాల మధ్య ప్రత్యక్ష యుద్ధం అనివార్యంగా కనిపిస్తోంది. ఈ పరిణామాలు గల్ఫ్ దేశాల ఆర్థిక వ్యవస్థపైనే కాకుండా, ప్రపంచ ఇంధన సరఫరాపై కూడా తీవ్ర ప్రభావం చూపే అవకాశం ఉంది.

Follow us