సుదీర్ఘ నిరీక్షణకు తెర .. కేరళ ఇక పై ‘కేరళం’.. పేరు మార్పుకు కేంద్ర కేబినెట్ ఆమోదం

Union Cabinet approves name change of Kerala to 'Keralam '

Keralam : దేవుడి సొంత భూమిగా పేరుగాంచిన కేరళ రాష్ట్రం అధికారిక పేరులో మార్పు దిశగా కీలక ముందడుగు పడింది. రాష్ట్రాన్ని ఇకపై ‘కేరళం’గా పేర్కొనే ప్రతిపాదనకు మంగళవారం కేంద్ర కేబినెట్ ఆమోదం తెలిపింది. సుదీర్ఘకాలంగా పెండింగ్‌లో ఉన్న ఈ అంశంపై రాష్ట్ర ప్రభుత్వం పలు మార్లు కేంద్రాన్ని అభ్యర్థించగా తాజాగా ఆ ప్రక్రియ వేగం అందుకుంది. ఈ ఏడాది రాష్ట్రంలో అసెంబ్లీ ఎన్నికలు జరగనున్న నేపథ్యంలో ఈ నిర్ణయం రాజకీయంగా కూడా ప్రాధాన్యం సంతరించుకుంది. రాష్ట్ర అధికారిక రికార్డుల్లో ‘కేరళ’ స్థానంలో ‘కేరళం’గా మార్పు చేయాలని కోరుతూ ఇప్పటికే రాష్ట్ర శాసనసభలో పలుమార్లు తీర్మానాలు ఆమోదం పొందాయి. తాజాగా ఆ తీర్మానాన్ని కేంద్రం పరిగణనలోకి తీసుకుని కేబినెట్ ఆమోదం తెలపడం గమనార్హం.

అసెంబ్లీ తీర్మానాల నేపథ్యం

పేరు మార్పు అంశాన్ని తొలిసారిగా 2023లో రాష్ట్ర అసెంబ్లీ అధికారికంగా ప్రస్తావించింది. అప్పట్లో ముఖ్యమంత్రి పినరయి విజయన్ మాట్లాడుతూ.. తమ రాష్ట్రాన్ని మలయాళంలో సంప్రదాయంగా ‘కేరళం’ అని పిలుస్తారని గుర్తుచేశారు. అయితే ఇతర భాషల్లో మాత్రం ‘కేరళ’ అనే రూపం ప్రాచుర్యంలోకి వచ్చిందని తెలిపారు. రాష్ట్ర అసలు సాంస్కృతిక, భాషా స్వరూపానికి అనుగుణంగా అధికారిక పేరును సవరించాలని ప్రభుత్వం భావించింది. ఈ ప్రతిపాదనకు రాజకీయ వర్గాల్లో విభిన్న స్పందనలు వచ్చినప్పటికీ రాష్ట్ర ప్రయోజనాల దృష్ట్యా ముందుకు తీసుకెళ్లాలని నిర్ణయించారు. ఈ విషయంపై రాష్ట్ర ప్రభుత్వం తరఫున కేంద్రానికి పలుమార్లు లేఖలు పంపించగా అసెంబ్లీ తీర్మానాన్ని కేంద్రం సానుకూలంగా పరిగణించింది. తాజాగా కేబినెట్ ఆమోదం తెలపడంతో తదుపరి రాజ్యాంగ ప్రక్రియకు మార్గం సుగమమైంది.

బీజేపీ మద్దతు .. రాజకీయ ప్రాధాన్యం

పేరు మార్పు అంశంలో రాష్ట్ర ప్రభుత్వానికి బీజేపీ మద్దతు లభించడం విశేషం. ఈ మేరకు ఆ పార్టీ రాష్ట్ర అధ్యక్షుడు రాజీవ్ చంద్రశేఖర్ ముఖ్యమంత్రికి లేఖ రాసి మద్దతు తెలిపారు. దానికి స్పందించిన ముఖ్యమంత్రి విజయన్ “రాష్ట్ర అసలు పేరు ‘కేరళం’. కాలక్రమంలో బ్రిటిష్ పాలకులు తమ సౌలభ్యం కోసం ‘కేరళ’గా మార్చారు. ఇప్పుడు ఆ చారిత్రక మార్పులను రాష్ట్ర సంస్కృతికి అనుగుణంగా సరిదిద్దుతున్నాం” అని పేర్కొన్నారు. ఎన్నికల సంవత్సరం కావడంతో ఈ నిర్ణయం రాజకీయంగా కూడా ప్రభావం చూపే అవకాశం ఉందని విశ్లేషకులు భావిస్తున్నారు.

పేరు మార్పు ప్రక్రియ ఎలా?

ఒక రాష్ట్రం పేరు మార్చాలంటే ముందుగా ఆ రాష్ట్ర శాసనసభలో తీర్మానం ఆమోదం పొందాలి. అనంతరం ఆ ప్రతిపాదనను కేంద్రానికి పంపిస్తారు. రాష్ట్రపతి సిఫార్సుతో ఆ బిల్లును పార్లమెంట్‌లో ప్రవేశపెడతారు. పార్లమెంట్ ఉభయ సభల్లో సాధారణ మెజార్టీతో బిల్లు ఆమోదం పొందితే రాష్ట్రపతి ఆమోదం తర్వాత పేరు అధికారికంగా మారుతుంది. ఈ ప్రక్రియకు రాజ్యాంగ సవరణ అవసరం లేదు. భారత రాజ్యాంగంలోని భారత రాజ్యాంగంలోని ఆర్టికల్ 3 ప్రకారం సాధారణ చట్టం ద్వారానే రాష్ట్రాల పేర్ల మార్పు చేయవచ్చు. అనంతరం రాజ్యాంగంలోని ఎనిమిదో షెడ్యూల్‌లో పేర్కొన్న అన్ని భాషల్లో కొత్త పేరును ప్రతిబింబించేలా మార్పులు చేస్తారు. అన్ని అధికారిక రికార్డులు, పత్రాలు, చట్టపరమైన పుస్తకాలలో ‘కేరళం’ అనే పేరును అమలు చేస్తారు. ఈ పరిణామంతో దేవుడి సొంత భూమిగా ఖ్యాతిగాంచిన ఈ రాష్ట్రం త్వరలోనే కొత్త అధికారిక పేరుతో చరిత్రలో కొత్త అధ్యాయం ప్రారంభించనుంది.

Follow us