PM Modi : డిజిటల్‌ లావాదేవీల్లో 50 శాతం యూపీఐ ద్వారానే: ప్రధాని మోడీ
దాదాపు 20 ఏళ్ల తర్వాత భారత ప్రధానమంత్రి సైప్రస్ పర్యటించడం ఇదే తొలిసారి కావడం గమనార్హం. లిమాసోల్‌లో నిర్వహించిన భారత్-సైప్రస్ సీఈవో ఫోరమ్‌లో ప్రధాని మోడీ కీలక ప్రసంగం చేశారు. ప్రపంచంలో జరుగుతున్న మొత్తం డిజిటల్‌ లావాదేవీలలో 50 శాతం యూపీఐ (UPI) ద్వారా జరుగుతున్నాయని పేర్కొన్నారు.
- By Latha Suma Published Date - 01:01 PM, Mon - 16 June 25
PM Modi : ప్రధాని నరేంద్ర మోడీ మూడు దేశాల పర్యటనలో భాగంగా ఆదివారం సాయంత్రం ద్వీప దేశమైన సైప్రస్ చేరుకున్నారు. లార్నాకా అంతర్జాతీయ విమానాశ్రయంలో సైప్రస్ అధ్యక్షుడు నికోస్‌ క్రిస్టోడౌలిడెస్‌ స్వయంగా ఆయనకు స్వాగతం పలకడం విశేషం. దాదాపు 20 ఏళ్ల తర్వాత భారత ప్రధానమంత్రి సైప్రస్ పర్యటించడం ఇదే తొలిసారి కావడం గమనార్హం. లిమాసోల్‌లో నిర్వహించిన భారత్-సైప్రస్ సీఈవో ఫోరమ్‌లో ప్రధాని మోడీ కీలక ప్రసంగం చేశారు. ప్రపంచంలో జరుగుతున్న మొత్తం డిజిటల్‌ లావాదేవీలలో 50 శాతం యూపీఐ (UPI) ద్వారా జరుగుతున్నాయని పేర్కొన్నారు. ఈ వ్యవస్థ భారత్‌లో డిజిటల్‌ విప్లవానికి నాంది పలికిందని, ఇది ఆర్థిక రంగంలో గణనీయమైన మార్పులకు దారితీస్తోందని వివరించారు.
Read Also: Census : ‘జన గణన’కు గెజిట్‌ నోటిఫికేషన్‌ జారీ చేసిన హోంశాఖ
దేశ ఆర్థిక వ్యవస్థ వేగంగా అభివృద్ధి చెందుతూ, ఇప్పటికే ప్రపంచంలో ఐదో అతిపెద్ద ఆర్థిక వ్యవస్థగా నిలిచిందని, త్వరలో మూడో స్థానాన్ని చేరుకోవడమే లక్ష్యమని మోడీ స్పష్టం చేశారు. భారత ప్రభుత్వం వ్యాపార వాతావరణాన్ని మెరుగుపరచేందుకు తీసుకుంటున్న చర్యలను కూడా ప్రధాని వివరించారు. జీఎస్టీ అమలు, కార్పొరేట్ పన్నుల సరళీకరణ, స్థిరమైన విధానాలు ఇవన్నీ దేశ వ్యాపార రంగాన్ని గణనీయంగా అభివృద్ధి చేస్తున్నాయని తెలిపారు. ఎలక్ట్రానిక్స్‌, ఐటీ, బయోటెక్నాలజీ, గ్రీన్ ఎనర్జీ, సెమీకండక్టర్లు వంటి రంగాల్లో భారత ప్రభుత్వం మక్కువగా పనిచేస్తోందని చెప్పారు. భారత్ త్వరలో సెమీకండక్టర్ తయారీకి గ్లోబల్ హబ్‌గా మారబోతున్నదన్న ఆశాభావాన్ని ప్రధాని వ్యక్తం చేశారు. నౌకా మరియు వైమానిక రంగాల్లోనూ భారత్ ప్రగతికి కృషి చేస్తున్నదని తెలిపారు.
అంతర్జాతీయ వాణిజ్యంలో విశ్వసనీయతతో పాటు, భాగస్వామ్య దేశాలకు సౌలభ్యం కల్పించడంలోనూ భారత్ ముందుందని మోడీ స్పష్టం చేశారు. సైప్రస్‌ను యూరప్‌లోకి ప్రవేశించేందుకు గేట్వేగా భారతీయ కంపెనీలు చూస్తున్నాయనీ, యూపీఐ వ్యవస్థను సైప్రస్‌లో అమలు చేయాలన్న యోచనలపై చర్చలు జరుపుతున్నామని ప్రధాని తెలిపారు. సైప్రస్ ఈ అవకాశాన్ని స్వాగతిస్తున్నదన్నది ఆసక్తికర అంశం. సైప్రస్ పర్యటన అనంతరం ప్రధాని మోడీ కెనడాలో జరిగే జీ7 సదస్సులో పాల్గొననున్నారు. అక్కడి నుంచి క్రొయేషియా వెళ్లి అక్కడి నేతలతో ద్వైపాక్షిక సంబంధాలపై చర్చించనున్నారు. మూడు దేశాల పర్యటనలో సైప్రస్ ప్రారంభదశగా మారడం గమనించదగ్గ విషయం.
Read Also: Padi kaushik Reddy : బీఆర్‌ఎస్‌ ఎమ్మెల్యే పాడి కౌశిక్‌రెడ్డికి హైకోర్టులో ఎదురుదెబ్బ
