Drugs : హైద‌రాబాద్‌లో అంత‌ర్జాతీయ డ్ర‌గ్స్ స‌ప్ల‌య‌ర్స్ అరెస్ట్‌

హైదరాబాద్ నార్కోటిక్ ఎన్‌ఫోర్స్‌మెంట్ వింగ్ (హెచ్-న్యూ) ఇద్దరు అంతర్జాతీయ డ్రగ్స్ రవాణాదారులను అరెస్టు చేసి సుమారు రూ.3 కోట్ల విలువైన డ్రగ్స్‌ను స్వాధీనం చేసుకుంది. అక్రమంగా సూడో ఎఫెడ్రిన్‌ను కలిగి ఉన్న చెన్నైకి చెందిన ఇద్దరు వ్యక్తులను బేగంపేట పోలీసులతో కలిసి ప‌ట్టుకున్నారు. రూ. 3.1 కోట్ల విలువైన 3.1 కిలోల సూడో ఎఫిడ్రిన్, 23 సిమ్ కార్డులు, 12 నకిలీ ఆధార్ కార్డులు, ఆరు మొబైల్ ఫోన్‌లు స్వాధీనం చేసుకున్నట్లు నార్త్ జోన్ డిప్యూటీ పోలీస్ కమిషనర్ చందన దీప్తి తెలిపారు. చెన్నైకి చెందిన ఖాదర్ మొహిదీన్, అతని బావమరిది ఇబ్రహీం షా గత రెండేళ్లుగా అక్రమ అంతర్జాతీయ డ్రగ్స్ రవాణా చేస్తున్నారు. ఆస్ట్రేలియా, న్యూజిలాండ్‌లలో ఉంటున్న అంతర్జాతీయ డ్రగ్ డీలర్లతో పరిచయాలు ఏర్పరుచుకుని హైదరాబాద్ నుంచి నిర్వహిస్తున్న పలు కొరియర్ సర్వీసుల ద్వారా ఈ దేశాలకు నిత్యం సూడో ఎఫిడ్రిన్‌ను రవాణా చేస్తున్నట్టు పోలీసులు తెలిపారు.

విమానాశ్రయాల్లో కస్టమ్స్ చెకింగ్ నుండి తప్పించుకోవడానికి, నిందితులు వివిధ కొరియర్ సర్వీస్ ప్రొవైడర్ల సహకారంతో బ్యాంగిల్ హోల్డర్లు, ఫోటో ఫ్రేమ్‌లు, చీరలు మరియు ఇతర దుస్తులు లైనింగ్‌లలో ప్యాక్ చేసి రహస్యంగా డ్రగ్స్ పంపుతున్నారు. రవాణాదారులకు డ్రగ్స్ సరఫరా చేస్తున్న ఇద్దరు పరారీలో ఉన్నారు. ఫెడ్ ఎక్స్‌, మదర్ ఇండియా కొరియర్ సర్వీస్, వరల్డ్ ఫస్ట్ డొమెస్టిక్ & ఇంటర్నేషనల్ కొరియర్ సర్వీసెస్, అవ‌కాయ‌.కామ్ కొరియర్ సర్వీసెస్, అథెంటిక్ షిప్ 24/7 కొరియర్ సర్వీసెస్, పోస్ట్ బాక్స్ ఎక్స్‌ప్రెస్ కొరియర్ సర్వీసెస్, MNR కొరియర్ సర్వీస్‌లతో సహా ఆరుగురు కొరియర్ ఉద్యోగులపై కూడా పోలీసులు కేసు బుక్ చేశారు.

కొరియర్ సర్వీస్ ప్రొవైడర్లు డ్రగ్ డీలర్ల ఒరిజినల్ కేవైసీని సేకరించకుండా, నకిలీ ఫోన్ నంబర్లు, నకిలీ కేవైసీని పెట్టుకుని నకిలీ ఇన్‌వాయిస్‌లు తయారు చేస్తూ డ్రగ్ డీలర్లకు సహకరిస్తున్నారని డీసీపీ తెలిపారు. మాదకద్రవ్యాల రవాణాదారులు నకిలీ ఆధార్ కార్డులను ఉపయోగిస్తున్నారు. దర్యాప్తు సంస్థల నిఘా నుండి తప్పించుకోవడానికి అనేక సిమ్ కార్డులను నకిలీ గుర్తింపులపై తీసుకున్నారు. విశ్వసనీయ సమాచారం మేరకు హెచ్‌ఎన్‌డబ్ల్యూ, బేగంపేట పోలీసులు ఖాదర్‌ మొహిదీన్‌, ఇబ్రహీం షాలను శుక్రవారం హైదరాబాద్‌కు వచ్చి బేగంపేటలో కొరియర్‌ సర్వీసుల ద్వారా రవాణా చేసేందుకు యత్నిస్తుండగా అరెస్టు చేశారు.