MLC Kavitha : పసుపు బోర్డును స్వాగతిస్తున్నాం.. కానీ

Mlc Kavitha

MLC Kavitha : బీఆర్ఎస్ ఎమ్మెల్సీ కల్వకుంట్ల కవిత నిజామాబాద్ జిల్లాలో ఏర్పాటు చేసిన పసుపు బోర్డును స్వాగతిస్తున్నానని పేర్కొన్నారు. అయితే, పసుపు బోర్డు ప్రకటన పూర్తిగా బీజేపీ కార్యక్రమంలా మారిందని విమర్శించారు. పార్లమెంట్ సభ్యురాలిగా తన ఐదేళ్ల పదవిలో, పసుపు బోర్డు కోసం కేంద్రంపై ఒత్తిడి చేసేందుకు ఎన్నో ప్రయత్నాలు చేశానని చెప్పారు. దేశంలోని 25 రాష్ట్రాల ముఖ్యమంత్రులకు లేఖలు రాస్తూ, రైతుల అవసరాలను నెరవేర్చేందుకు కేంద్రానికి పలు సార్లు విజ్ఞప్తి చేశానని కవిత తెలిపారు.

కేంద్ర ప్రభుత్వం ఈ ప్రకటనను ప్రోటోకాల్‌కు అనుగుణంగా చేయకుండా, రైతుల సమస్యలను పూర్తిస్థాయిలో పరిష్కరించలేదని ఆమె ఆరోపించారు. “పసుపు బోర్డు రావడం ఒక ప్రారంభం మాత్రమే. రైతులకు కనీస మద్దతు ధర రూ. 15,000 కల్పించాలి. అప్పుడే వారి సంక్షేమానికి న్యాయం జరుగుతుంది,” అని కవిత డిమాండ్ చేశారు.

Hyderabad Data Centers: డేటా సెంటర్ల రాజధానిగా హైదరాబాద్​.. రూ.3500 కోట్ల పెట్టుబడులకు ఒప్పందం!

2014 నుంచి దేశంలో పసుపు దిగుమతులు పెరుగుతున్నాయని, ఇది రైతులపై ప్రతికూల ప్రభావం చూపుతుందని కవిత అన్నారు. “పసుపుకు కనీస మద్దతు ధరను వెంటనే ప్రకటించాలి. అంతేకాకుండా, పసుపు దిగుమతులను నియంత్రించే కఠిన చర్యలు తీసుకోవాలి,” అని ఆమె కోరారు. పసుపు బోర్డులో పసుపు పంటలు ఎక్కువగా సాగు చేసే ప్రాంతాల్లోని ప్రజాప్రతినిధులను ఎక్స్ అఫిషియో సభ్యులుగా చేర్చాలని కవిత డిమాండ్ చేశారు.

“మేము పసుపు బోర్డు కోసం కేంద్రాన్ని డిమాండ్ చేస్తున్నప్పుడు, బీజేపీ ఎంపీ ధర్మపురి అరవింద్ రాజకీయాల్లో ఉండలేదు. ఇప్పుడిక, బోర్డు ప్రకటన చేస్తున్న పద్ధతి సముచితంగా లేదు,” అని కవిత విమర్శించారు. “మా ప్రభుత్వ హయాంలోనే స్పైసెస్ పార్క్ ఏర్పాటైంది. వేల్పూర్‌లో 42 ఎకరాలు కేటాయించడం ద్వారా పసుపు రైతుల ప్రయోజనాలకు దోహదం చేశాం. అయితే, అప్పట్లో ఎంపీ అరవింద్ పసుపు బోర్డు అవసరం లేదని వ్యాఖ్యానించారు. ఆయన మాటలు ఇప్పుడు ప్రజల్లో అవగాహనలోకి రావాలి,” అని కవిత పేర్కొన్నారు.

నిజామాబాద్ జిల్లాకు ఎయిర్‌పోర్ట్ అవసరం ఉందని, దీనిపై ఎంపీ ధర్మపురి అరవింద్ కేంద్రానికి విజ్ఞప్తి చేయాలని కల్వకుంట్ల కవిత సూచించారు. రైతులు, వ్యాపారులు,  పసుపు రైతుల అవసరాలను దృష్టిలో ఉంచుకుని ఎయిర్‌పోర్ట్ ఏర్పాటుకు కృషి చేయాలని ఆమె సూచించారు. “బంగారం లాగే పసుపు ధరలు ప్రతి ఏడాది పెరుగుతూనే ఉంటాయి. అయితే, ఈ పెరుగుదల రైతుల జీవితాల్లో సంతోషాన్ని తీసుకురావాలంటే కేంద్రం మరింత చర్యలు చేపట్టాలి,” అని కవిత తన ప్రసంగంలో వివరించారు.

Gaddar Cine Awards: ఉగాది నుంచి గద్దర్ అవార్డుల పంపిణీ.. డిప్యూటీ సీఎం కీల‌క నిర్ణ‌యం!

Follow us