CM Revanth Reddy: టీ ఫైబ‌ర్‌పై స‌మ‌గ్ర నివేదిక స‌మ‌ర్పించండి: CM రేవంత్ రెడ్డి

CM Revanth Reddy

తెలంగాణలోని ప్రతి గ్రామానికి, ప్రతి ఇంటికి ఇంటర్నెట్ సేవలు అందించాలనే లక్ష్యంతో చేపట్టిన టీ ఫైబర్ (T-Fiber) ప్రాజెక్ట్‌పై ముఖ్యమంత్రి రేవంత్ రెడ్డి తీవ్రంగా దృష్టి సారించారు. ఈ ప్రాజెక్టు పనులు, ప్రస్తుత పరిస్థితి, భవిష్యత్తు కార్యాచరణ ప్రణాళికపై సమగ్ర నివేదిక సమర్పించాలని ఆయన అధికారులను ఆదేశించారు. సోమవారం రాత్రి తన నివాసంలో టీ ఫైబర్‌పై జరిగిన ఉన్నత స్థాయి సమీక్షా సమావేశంలో సీఎం ఈ ఆదేశాలు జారీ చేశారు.

అసమర్థ పనితీరుపై చర్యలు

ఈ ప్రాజెక్టు పనులు చేసిన కాంట్రాక్ట్ సంస్థల పనితీరుపై సీఎం అసంతృప్తి వ్యక్తం చేశారు. గతంలో పనులు చేసిన కాంట్రాక్ట్ సంస్థలకు వెంటనే నోటీసులు జారీ చేసి, వారు పనులు చేసిన తీరుపై నివేదిక కోరాలని అధికారులను ఆదేశించారు. అలాగే, టీ ఫైబర్ సంస్థలో ప్రస్తుతం ఉన్న ఉద్యోగుల సంఖ్య మరియు వారి పనితీరును కూడా సమీక్షించాలని సీఎం సూచించారు. ప్రతీ పల్లెకు ఇంటర్నెట్ సేవలు అందించాలనే లక్ష్యం ఉన్నందున, అందుకు అనుగుణంగా పూర్తి స్థాయి కార్యాచరణ ప్రణాళిక రూపొందించాలని ఆయన అధికారులకు దిశానిర్దేశం చేశారు.

Also Read: Minister Lokesh: ఉపరాష్ట్రపతి అభ్యర్థి సీపీ రాధాకృష్ణన్‌కు మంత్రి లోకేష్, ఎంపీ శివనాథ్ అభినందనలు

ప్రజలకు మెరుగైన సేవలే లక్ష్యం

టీ ఫైబర్ ప్రాజెక్ట్ ద్వారా ప్రజలకు మెరుగైన సేవలు అందించడమే ప్రధాన లక్ష్యంగా ప్రణాళికలు ఉండాలని సీఎం రేవంత్ రెడ్డి ఆకాంక్షించారు. ఇప్పటికే ఈ ప్రాజెక్టు కోసం ఎంత వ్యయం అయింది? దాన్ని పూర్తి చేయడానికి ఇంకా ఎంత నిధులు అవసరం, ఆ నిధులను ఎలా సేకరించాలి అనే అంశాలను నివేదికలో స్పష్టంగా పేర్కొనాలని అధికారులకు సూచించారు. అలాగే ఈ కార్యక్రమం విజయవంతం కావడానికి ఎలాంటి చర్యలు తీసుకోవాలనే అంశాలను కూడా నివేదికలో పొందుపరచాలని సీఎం ఆదేశించారు.

ఈ సమీక్షా సమావేశంలో రాష్ట్ర ఐటీ శాఖ మంత్రి దుద్దిళ్ల శ్రీధర్ బాబు, రాష్ట్ర ప్రభుత్వ ప్రధాన కార్యదర్శి కె. రామకృష్ణారావు, ముఖ్యమంత్రి ప్రిన్సిపల్ సెక్రెటరీ వి. శేషాద్రి, సీఎం ప్రత్యేక కార్యదర్శి అజిత్ రెడ్డి, ఆర్థిక శాఖ ముఖ్య కార్యదర్శి సందీప్ కుమార్ సుల్తానియా, ఐటీ శాఖ ప్రత్యేక ముఖ్య కార్యదర్శి జయేశ్ రంజన్, ఐటీ శాఖ స్పెషల్ చీఫ్ సెక్రెటరీ సంజయ్ కుమార్, డిప్యూటీ కార్యదర్శి భవేష్ మిశ్రా, టీ ఫైబర్ ఎండీ వేణు ప్రసాద్ తదితరులు పాల్గొన్నారు. ఈ సమావేశం టీ ఫైబర్ ప్రాజెక్ట్‌ను వేగవంతం చేయడానికి, పారదర్శకంగా ముందుకు తీసుకెళ్లడానికి ప్రభుత్వం కట్టుబడి ఉందని సూచిస్తుంది.

Follow us