Musi River : మూసీ తీరాల్లో బోటింగ్ సదుపాయం.. హైదరాబాద్‌కు మరో పర్యాటక ఆకర్షణ

Musi River

Musi River : హైదరాబాద్ నగరానికి కొత్త పర్యాటక ఆకర్షణగా చారిత్రక మూసీ నదిలో బోటింగ్ త్వరలో ప్రారంభం కానుంది. హుస్సేన్‌సాగర్, దుర్గం చెరువు తరహాలో మూసీ నది సుందరీకరణ, ప్రక్షాళన కార్యక్రమాల భాగంగా ఈ ప్రతిపాదనను తెలంగాణ ప్రభుత్వం ముందుకు తీసుకువెళ్తోంది. ముఖ్యమంత్రి రేవంత్ రెడ్డి ఇటీవల ఇచ్చిన హామీలతో ఈ ప్రాజెక్ట్ మరోసారి దృష్టిని ఆకర్షించింది. మూసీ నది శతాబ్దాల చరిత్రను కలిగి ఉన్నా, కాలక్రమేణా కలుషితమై నిర్లక్ష్యం పాలైంది. ఇప్పుడు ప్రభుత్వం నదిని పునరుద్ధరించి పర్యాటక కేంద్రంగా తీర్చిదిద్దాలని నిర్ణయించింది. మొదటగా కాలుష్యజలాలను పూర్తిగా తొలగించి, నదిని శుభ్రపరచడం ప్రధాన లక్ష్యంగా పెట్టుకుంది. ఆ తర్వాత కృష్ణా, గోదావరి జలాలను మూసీలోకి తరలించి స్వచ్ఛమైన నీటితో నింపి బోటింగ్‌కు అనువుగా మారుస్తారు.

బోటింగ్ నిర్వహణకు సంవత్సరమంతా నీరు ఉండటం అవసరం. అందుకోసం సుమారు 5–6 కిలోమీటర్ల విస్తీర్ణంలో చెక్‌డ్యామ్‌లు నిర్మించి నీటిని నిల్వ చేయాలని అధికారులు ప్రణాళిక రూపొందించారు. వీటివల్ల నది రూపురేఖలు మారిపోవడంతో పాటు పర్యాటకులు ఆహ్లాదకరమైన వాతావరణంలో బోటింగ్‌ను ఆస్వాదించే అవకాశం ఉంటుంది. ఈ బోటింగ్ ప్రాజెక్ట్‌ను కేవలం పర్యాటక సదుపాయంగా కాకుండా హైదరాబాద్ మెట్రో రైల్ రెండో దశ విస్తరణతో అనుసంధానం చేయనున్నారు. నాగోలు నుంచి గండిపేట వరకు మూసీ వెంట రోడ్ కమ్ మెట్రో రైల్ నిర్మాణాలు చేపట్టబడతాయి. ఇందులో భాగంగా మూసీ సుందరీకరణ, బోటింగ్ ప్రాజెక్టులకు ప్రత్యేక నిధులు కేటాయించనున్నట్లు అధికార వర్గాలు వెల్లడించాయి.

Go Back Marwadi : ‘గో బ్యాక్ మార్వాడీ’ ఉద్యమం.. రేపు తెలంగాణ బంద్

మూసీ నది మార్గం నార్సింగి నుంచి బాపూఘాట్, హైకోర్టు, చాదర్‌ఘాట్ మీదుగా నాగోలు వరకు విస్తరించి ఉంది. ఈ మార్గంలో బోటింగ్‌కు అత్యంత అనుకూలమైన ప్రదేశాలను అధికారులు పరిశీలిస్తున్నారు. తొలుత ఒకే ప్రాంతంలో పైలట్ ప్రాజెక్ట్‌గా బోటింగ్ సదుపాయాన్ని ప్రారంభించి, తర్వాత దానిని విస్తరించే ఆలోచనలో ఉన్నారు. గత సంవత్సరం డిసెంబర్ 13న జరిగిన కీలక సమావేశంలోనే సీఎం రేవంత్ రెడ్డి మూసీ సుందరీకరణ, రోడ్ కమ్ మెట్రో రైల్ కనెక్టివిటీపై మాస్టర్ ప్లాన్ సిద్ధం చేయాలని ఆదేశించారు. ఆ దిశగా అధికారులు క్షేత్రస్థాయిలో పర్యటించి, నిపుణుల సలహాలతో సమగ్ర నివేదికను ప్రభుత్వానికి సమర్పించారు.

ఇప్పుడు సీఎం మరోసారి ఈ ప్రాజెక్టుపై దృష్టి సారించడంతో పనులు వేగవంతం అయ్యే అవకాశం ఉంది. హుస్సేన్‌సాగర్, దుర్గం చెరువు బోటింగ్‌ల మాదిరిగా, మూసీ కూడా పర్యాటకులకు ఆకర్షణీయంగా మారనుందన్న నమ్మకం నగరవాసుల్లో వ్యక్తమవుతోంది. ఒకవైపు పర్యావరణ పరిరక్షణ, మరోవైపు పర్యాటక అభివృద్ధి అనే ద్వంద ప్రయోజనం కలిగించే ఈ ప్రాజెక్ట్ పూర్తి స్థాయిలో అమలు అయితే హైదరాబాద్‌కు ఒక కొత్త గుర్తింపు తీసుకురానుందని పర్యాటక రంగ నిపుణులు అంచనా వేస్తున్నారు.

Earthquake : దక్షిణ అమెరికాలో భారీ భూకంపం… రిక్టర్ స్కేల్‌పై 8 తీవ్రత.. సునామీ హెచ్చరిక!

Follow us