రెండు రోజుల్లో మున్సిపల్ ఎన్నికల షెడ్యూల్!

Municipal Elections In Tg

తెలంగాణ రాష్ట్రంలో సంక్రాంతి సంబరాలు ముగియకముందే రాజకీయ సందడి మొదలుకానుంది. రాష్ట్ర ఎన్నికల సంఘం (SEC) మున్సిపల్ ఎన్నికల నిర్వహణకు సర్వం సిద్ధం చేసింది. ఇప్పటికే మున్సిపల్ ఓటర్ల తుది జాబితాను విడుదల చేసిన అధికారులు, ఎన్నికల షెడ్యూల్‌ను ప్రకటించడానికి ముహూర్తం ఖరారు చేస్తున్నారు. విశ్వసనీయ వర్గాల సమాచారం ప్రకారం, మరో ఒకటి రెండు రోజుల్లోనే ఎన్నికల నోటిఫికేషన్ వెలువడే అవకాశం ఉంది. ఫిబ్రవరి రెండో వారంలో పోలింగ్ నిర్వహించేలా ఎన్నికల సంఘం ప్రణాళికలు సిద్ధం చేస్తోంది. పండగ సెలవుల తర్వాత రాష్ట్రవ్యాప్తంగా మున్సిపల్ ఎన్నికల కోడ్ అమల్లోకి రానుండటంతో రాజకీయ పార్టీలన్నీ అప్రమత్తమయ్యాయి.

Municipal Elections In Tela

ఎన్నికల ప్రక్రియలో అత్యంత కీలకమైన రిజర్వేషన్ల ఖరారుపై ప్రభుత్వం ప్రస్తుతం తీవ్ర కసరత్తు చేస్తోంది. ఈ నెల 20వ తేదీ నాటికి వార్డుల వారీగా రిజర్వేషన్లను ప్రకటించాలని లక్ష్యంగా పెట్టుకుంది. 2011 జనాభా లెక్కల ప్రాతిపదికన ఎస్సీ (SC), ఎస్టీ (ST) రిజర్వేషన్లను కేటాయించనుండగా, బీసీ (BC) రిజర్వేషన్ల కోసం ప్రభుత్వం ప్రత్యేకంగా ఏర్పాటు చేసిన ‘డెడికేటెడ్ కమిషన్’ నివేదికను ఆధారం చేసుకోనుంది. ఈ కమిషన్ క్షేత్రస్థాయిలో సేకరించిన గణాంకాల ఆధారంగా వెనుకబడిన తరగతుల వాటాను ఖరారు చేయనున్నారు. రిజర్వేషన్ల ప్రక్రియ పూర్తయిన వెంటనే అభ్యర్థుల ఎంపికపై స్పష్టత వచ్చే అవకాశం ఉంది.

ఈ ఎన్నికలు అటు అధికార కాంగ్రెస్ పార్టీకి, ఇటు ప్రతిపక్ష పార్టీలకు అత్యంత ప్రతిష్టాత్మకంగా మారాయి. రాష్ట్రంలో కొత్త ప్రభుత్వం కొలువుదీరిన తర్వాత జరుగుతున్న మొదటి మున్సిపల్ ఎన్నికలు కావడంతో, తమ పట్టును నిరూపించుకోవాలని అన్ని పార్టీలు వ్యూహప్రతివ్యూహాల్లో మునిగిపోయాయి. ముఖ్యమంత్రి రేవంత్ రెడ్డి ఇప్పటికే జిల్లాల పర్యటనలు ఖరారు చేసుకుని పార్టీ శ్రేణులకు దిశా నిర్దేశం చేస్తున్నారు. పట్టణ ప్రాంత ఓటర్ల నాడిని పట్టుకునేందుకు ఈ ఎన్నికలు ఒక సెమీ ఫైనల్‌గా నిలవనున్నాయి. వార్డుల విభజన, ఓటర్ల జాబితా సవరణ వంటి ప్రక్రియలు పూర్తి కావడంతో ఇక యుద్ధం మొదలవ్వడమే తరువాయి.

Follow us