కేసీఆర్ ఉద్దేశ్యం అదేనా ? మొత్తం కేటీఆర్ కనుసన్నల్లో ఉండాల్సిందేనా ?

Kcr Ktr

• కేటీఆర్ చేతిలోకి బిఆర్ఎస్ పార్టీ
• కేసీఆర్ తన రాజకీయ వారసుడిగా కేటీఆర్‌
• పార్టీ వైఫల్యానికి ప్రధాన కారణం అదేనా ?

తెలంగాణ రాజకీయాల్లో ప్రస్తుతం బీఆర్ఎస్ పార్టీ ఒక కీలకమైన సంధి కాలంలో ఉంది. దశాబ్ద కాలం పాటు తిరుగులేని శక్తిగా వెలిగిన ఈ పార్టీ, గత ఎన్నికల ఓటమి తర్వాత తన ఉనికిని చాటుకోవడానికి పోరాడుతోంది. అయితే, పార్టీ వైఫల్యానికి ప్రధాన కారణం క్షేత్రస్థాయిలో కార్యకర్తలకు, ప్రజలకు దూరం కావడమేనన్న విమర్శ బలంగా వినిపిస్తోంది. కేసీఆర్ తన రాజకీయ వారసుడిగా కేటీఆర్‌ను ముందుకు తీసుకురావాలనే పట్టుదలతో ఉండటం. పార్టీలోని ఇతర కీలక నేతల ప్రాధాన్యతను తగ్గించడం వల్ల అంతర్గత అసంతృప్తి జ్వాలలు ఎగిసిపడుతున్నాయి. ముఖ్యంగా కేటీఆర్ శైలి పట్ల కార్యకర్తల్లో ఉన్న అసహనం, ఇప్పుడు బహిరంగంగానే చర్చకు వస్తోంది.

Brs Kcr

శాసనసభలో ప్రతిపక్ష హోదాలో ఉండి ప్రభుత్వాన్ని నిలదీయాల్సిన సమయంలో, కేవలం ఒకే వ్యక్తికి ప్రాధాన్యత ఇవ్వడం పార్టీ ప్రయోజనాలకు గొడ్డలిపెట్టుగా మారుతోంది. ఈ తరుణంలో హరీశ్ రావు గారి పేరు తెరపైకి రావడం కేవలం యాదృచ్ఛికం కాదు. దశాబ్దాలుగా ప్రజలతో మమేకమై, కష్టపడి పనిచేసే నాయకుడిగా ఆయనకు ఉన్న గుర్తింపు ఇప్పుడు పార్టీని కాపాడుకునే ఆఖరి ఆయుధంగా కనిపిస్తోంది. కేటీఆర్ అహంకారం, కార్పొరేట్ తరహా రాజకీయాలకు భిన్నంగా, హరీశ్ రావు కు ఉన్న మాస్ ఇమేజ్ మరియు అసెంబ్లీలో విషయ పరిజ్ఞానంతో ప్రత్యర్థులను ఎదుర్కొనే తీరు కార్యకర్తల్లో కొత్త ఆశలను రేకెత్తిస్తోంది.

చివరికి, ఒక రాజకీయ పార్టీ మనుగడ అనేది కేవలం ఒక కుటుంబం చుట్టూ తిరగకూడదని ప్రజలు స్పష్టమైన తీర్పు ఇచ్చారు. కేటీఆర్ చుట్టూ ఉన్న ఆ బలం కేవలం అధికారం ఉన్నప్పుడు మాత్రమే ఉంటుందని, కష్టకాలంలో పార్టీని గట్టెక్కించేది ప్రజాబలం ఉన్న నాయకులేనని అర్థమవుతోంది. బీఆర్ఎస్ పార్టీ మళ్ళీ పునర్వైభవం సాధించాలంటే, అది కేవలం ‘వారసత్వ రాజకీయాల’ నీడలో సాధ్యం కాదు. హరీశ్ రావు వంటి సమర్థవంతమైన, ప్రజలకు అందుబాటులో ఉండే నాయకత్వానికి పగ్గాలు అప్పగించడం ద్వారానే పార్టీని మళ్ళీ ప్రజల పార్టీగా తీర్చిదిద్దే అవకాశం ఉంటుంది. ఈ మార్పు జరగకపోతే, పార్టీ ఉనికి ప్రశ్నార్థకమయ్యే ప్రమాదం పొంచి ఉంది. మరి బిఆర్ఎస్ లో ఏంజరుగుతుందో చూడాలి.

Follow us