వెంకీ-కళ్యాణ్ రామ్ తో అనిల్ రావిపూడి మల్టీస్టారర్

Venkatesh reunites with Anil Ravipudi

Anil Ravipudi విక్టరీ వెంకటేష్ – అనిల్ రావిపూడి కాంబినేషన్‌లో మరో కొత్త సినిమా తెరకెక్కనున్న సంగతి తెలిసిందే. ఇప్పటికే ‘ఎఫ్2’, ‘ఎఫ్3’ వంటి హిట్ చిత్రాల తర్వాత వస్తున్న ఈ ప్రాజెక్ట్‌పై భారీ అంచనాలు నెలకొన్నాయి. ఈ సినిమాలో వెంకటేష్ సరసన హీరోయిన్‌గా కీర్తి సురేష్ నటించే అవకాశాలు ఉన్నాయని టాలీవుడ్‌లో వార్తలు వినిపిస్తున్నాయి. అలాగే నందమూరి కళ్యాణ్ రామ్ కీలక పాత్రలో కనిపించనున్నారని తెలుస్తోంది. అయితే ఆయనకు జోడీగా నటించే హీరోయిన్ ఎంపిక ఇంకా కొనసాగుతోందని సమాచారం.

టాలీవుడ్‌లో కమర్షియల్ ఎంటర్‌టైనర్‌లతో ప్రత్యేక గుర్తింపు తెచ్చుకున్న దర్శకుడు అనిల్ రావిపూడి వరుస విజయాలతో ఫుల్ జోష్‌లో ఉన్నారు. ముఖ్యంగా సంక్రాంతి సీజన్‌లో ఆయన సినిమాలు వరుసగా విజయాలు సాధించడం ఇప్పుడు టాలీవుడ్‌లో చర్చనీయాంశంగా మారింది. 2025లో విక్టరీ వెంకటేష్ ‌తో, 2026లో మెగాస్టార్ చిరంజీవితో వరుస బ్లాక్‌బస్టర్లు అందుకున్న ఆయన ప్రస్తుతం ఇండస్ట్రీలో తోపు డైరెక్టర్ అనే ముద్ర వేసుకున్నారు. యంగ్ హీరోల నుంచి స్టార్ హీరోల వరకు ఆయనతో ఒక్క సినిమా అయినా చేయాలని తహతహలాడుతున్నారు. తాజాగా ఆయన వెంకటేష్, కళ్యాణ్‌రామ్‌లతో కలిసి ఓ మల్టీస్టారర్ తీస్తున్నట్లు ప్రకటించిన సంగతి తెలిసిందే.

మొదటి "వందకోట్ల బొమ్మ" కొట్టిన హీరో.. Victory @VenkyMama గారితో🔥

"మొదటిసారి బొమ్మ" తీసే అవకాశం ఇచ్చిన హీరో @NANDAMURIKALYAN గారితో కలిసి 💥

2027 మొదటి పండగకి మీ, ముందుకు వస్తున్నాం 😍😍😍#VenkyAnil5 #NKRxAR pic.twitter.com/WRVWdbQpbz

— Anil Ravipudi (@AnilRavipudi) February 26, 2026

గతంలో వెంకటేష్‌తో కలిసి తెరకెక్కించిన ‘ఎఫ్2’, ‘ఎఫ్3’, ‘సంక్రాంతికి వస్తున్నాం’ చిత్రాలు తెరకెక్కించగా.. ఈ ఏడాది వచ్చిన ‘మన శంకర వరప్రసాద్ గారు’లో వెంకీ క్యామియో రోల్ పోషించారు. ఇక అనిల్ రావిపూడికి దర్శకుడిగా ‘పటాస్’తో ఛాన్స్ ఇచ్చారు నందమూరి కల్యాణ్‌రామ్ . ఈ కలయికలో వస్తోన్న తాజా మూవీ గురించి అప్పుడే ఇండస్ట్రీలో చర్చ మొదలైంది. వెంకటేష్‌తో కలిసి కళ్యాణ్ రామ్ స్క్రీన్ పంచుకోబోతున్నారని వార్తలు రావడంతో ఈ ప్రాజెక్ట్‌పై మరింత హైప్ ఏర్పడింది. కథలో కీలక మలుపు తిప్పే పాత్రలో కళ్యాణ్ రామ్ కనిపిస్తారని, అదే సమయంలో ఆయన పాత్రలో వినోదం కూడా ఉండబోతుందని చెబుతున్నారు. ఈ ప్రాజెక్ట్‌ను 2027 సంక్రాంతి సందర్భంగా ప్రేక్షకుల ముందుకు తీసుకురావాలని మేకర్స్ ప్లాన్ చేస్తున్నారు. సంక్రాంతి సీజన్ అనిల్ రావిపూడికి బాగా కలిసొచ్చిన నేపథ్యంలో అదే సెంటిమెంట్‌ను కొనసాగించాలని భావిస్తున్నారని సినీ వర్గాలు చెబుతున్నాయి. కుటుంబ ప్రేక్షకులను ఆకట్టుకునే విధంగా భారీ స్థాయిలో కథను సిద్ధం చేస్తున్నట్లు సమాచారం.

ఇక ఈ సినిమాలో వెంకటేష్ సరసన హీరోయిన్‌గా కీర్తి సురేష్ నటించే అవకాశాలు ఉన్నాయని టాలీవుడ్‌లో వార్తలు వినిపిస్తున్నాయి. ఇప్పటికే ఈ ప్రాజెక్ట్‌కు ఆమె గ్రీన్ సిగ్నల్ ఇచ్చిందని, త్వరలోనే అధికారిక ప్రకటన వచ్చే అవకాశం ఉందని చెబుతున్నారు. ‘మహానటి’ సినిమాతో దేశవ్యాప్తంగా గుర్తింపు పొందిన కీర్తి సురేష్ ప్రస్తుతం తెలుగు, తమిళ చిత్రాల్లో బిజీగా కొనసాగుతున్నారు. రౌడీ స్టార్ విజయ్ దేవరకొండ సరసన ‘రౌడీ జనార్దన్’లో ఆమె నటిస్తున్నారు. ఈ క్రమంలోనే అనిల్ రావిపూడి సినిమాలో ఆమెకు ఛాన్స్ రావడం చర్చనీయాంశమైంది. మరోవైపు నందమూరి కళ్యాణ్ రామ్‌కు జోడీగా నటించే హీరోయిన్ విషయంలో మాత్రం ఇంకా తుది నిర్ణయం తీసుకోలేదని తెలుస్తోంది. ఆ పాత్రకు సరిపోయే నటిని ఎంపిక చేసే ప్రక్రియ కొనసాగుతోందని, త్వరలోనే దీనిపై క్లారిటీ వచ్చే అవకాశం ఉందని తెలుస్తోంది.

ఈ చిత్రాన్ని ప్రముఖ నిర్మాణ సంస్థలు షైన్ స్క్రీన్స్ మరియు సురేష్ ప్రొడక్షన్స్ సంయుక్తంగా నిర్మించనున్నాయి. సంగీతాన్ని భీమ్స్ సిసిరోలియో అందించనుండగా, సినిమాటోగ్రఫీ బాధ్యతలను సమీర్ రెడ్డి నిర్వహించనున్నారు. ప్రస్తుతం ప్రీ ప్రొడక్షన్ పనులు కొనసాగుతున్న ఈ సినిమా షూటింగ్‌ను జూన్ నెల నుంచి ప్రారంభించేలా ప్రణాళికలు సిద్ధం చేస్తున్నట్లు తెలుస్తోంది.

Follow us