TGSRTCలో భారీగా కండక్టర్ ఉద్యోగ ఖాళీలు…నియామకాలకు రెడీ

తెలంగాణ ఆర్టీసీలో కండక్టర్ల కొరత తీవ్రంగా వేధిస్తోంది. దశాబ్ద కాలంగా నియామకాలు లేకపోవడంతో 2,059 మంది కండక్టర్ల కొరత ఏర్పడింది. కొత్త బస్సులొచ్చినా.. డ్రైవర్లపైనే కండక్టర్ల బాధ్యతలు, డబుల్ డ్యూటీలతో ఒత్తిడి పెరుగుతోంది. మొత్తం ఉద్యోగుల సంఖ్య కూడా 11 ఏళ్లలో 18,025 తగ్గింది. తక్షణమే 1500 కండక్టర్ల నియామకానికి ఆర్టీసీ యాజమాన్యం ప్రభుత్వ అనుమతి కోరుతోంది.

తెలంగాణ రాష్ట్ర రోడ్డు రవాణా సంస్థ (TGSRTC)లో సిబ్బంది కొరత తీవ్ర స్థాయిలో ఉంది. ముఖ్యంగా కండక్టర్ల పోస్టుల్లో ఈ సమస్య అత్యధికంగా ఉండటంతో సంస్థ కార్యకలాపాలు నిర్వహించడానికి తాత్కాలిక సర్దుబాట్లపై ఆధారపడాల్సి వస్తుంది. కండక్టర్ల నియామకం జరిగి దాదాపు దశాబ్దం దాటడంతో.. ఈ సమస్య ఏటా పెరుగుతూ వస్తోంది. ప్రస్తుతం రాష్ట్రవ్యాప్తంగా ఇప్పటికే 2,059 మంది కండక్టర్ల కొరత ఉంది. మార్చి 2026 లోపు మరో 140 మంది ఉద్యోగ విరమణ చేయనున్నారు.

ఇటీవల కాలంలో కొత్తగా 388 బస్సులను TGSRTC రోడ్డెక్కించింది. వీటి నిర్వహణ కోసం అదనంగా 1,009 మంది కండక్టర్లు అవసరమని అధికారులు గుర్తించారు. ఈ లెక్కల ప్రకారం.. ఆర్టీకికి తక్షణమే 3,208 మంది కండక్టర్లు అవసరం. ఈ నేపథ్యంలో, తక్షణ అవసరాలను దృష్టిలో ఉంచుకుని కనీసం 1500 కండక్టర్ పోస్టుల భర్తీకి అనుమతి ఇవ్వాలని ఆర్టీసీ యాజమాన్యం కొద్దిరోజుల క్రితం రవాణాశాఖ మంత్రి పొన్నం ప్రభాకర్ దృష్టికి తీసుకెళ్లింది. కండక్టర్ల కొరత తీవ్రంగా ఉండటంతో.. ఆర్టీసీ యాజమాన్యం తాత్కాలికంగా సర్దుబాట్లను అమలు చేస్తోంది.

దూరప్రాంతాలకు వెళ్లే ఎక్స్‌ప్రెస్ బస్సుల్లో డ్రైవర్లకే కండక్టర్ల బాధ్యతలు కూడా అప్పగిస్తున్నారు. దీనివల్ల డ్రైవర్లపై పని భారం పెరిగి, భద్రత విషయంలో ఆందోళనలు పెరుగుతున్నాయి. అందుబాటులో ఉన్న కండక్టర్లకు వీలున్నంత వరకు డబుల్ డ్యూటీలు వేస్తున్నారు. ఇది సిబ్బందిపై ఒత్తిడిని పెంచుతోంది. కొద్దిమంది సిబ్బందిని ఔట్‌సోర్సింగ్ పద్ధతిలో తీసుకుని నెట్టుకొస్తున్నారు. ఆర్టీసీలో సిబ్బంది కొరత కేవలం కండక్టర్ల పోస్టులకే పరిమితం కాలేదు. గత దశాబ్దంలో ఉద్యోగుల సంఖ్య కూడా గణనీయంగా తగ్గింది.

2014-15లో మొత్తం ఉద్యోగుల సంఖ్య 56,740 కాగా.. ప్రస్తుతం (2025) మొత్తం ఉద్యోగుల సంఖ్య 38,715. 11 ఏళ్లలో దాదాపు 18,025 మంది ఉద్యోగులు తగ్గారు. గతంలో పోలిస్తే బస్సుల సంఖ్య తగ్గినప్పటికీ ఉద్యోగుల నిష్పత్తిలో వచ్చిన భారీ మార్పు సంస్థ నిర్వహణపై తీవ్ర ప్రభావాన్ని చూపుతోంది. అయితే.. తాజాగా కొత్త బస్సుల రాకతో 2025 అక్టోబరు నాటికి బస్సుల సంఖ్య మళ్లీ పెరిగింది. ప్రభుత్వం నుంచి తక్షణమే అనుమతి వస్తే.. కండక్టర్ల భర్తీ ప్రక్రియను వేగవంతం చేయాలని ఆర్టీసీ యాజమాన్యం ఎదురుచూస్తోంది. దీనికి ముందు 1000 డ్రైవర్ పోస్టులు, 743 శ్రామిక్ పోస్టుల భర్తీకి ప్రభుత్వం అనుమతి ఇవ్వగా.. పోలీస్ నియామక మండలి ఇప్పటికే నోటిఫికేషన్ విడుదల చేసింది.