GHMC : రికార్డు స్థాయిలో ఆస్తిప‌న్ను వ‌సూలు చేసిన జీహెచ్ఎంసీ.. ఆరు నెల‌ల్లో.. ?

GHMC

గ్రేటర్ హైదరాబాద్ మున్సిపల్ కార్పొరేషన్( జీహెచ్ఎంసీ) రికార్డు స్థాయిలో ఆస్తిప‌న్ను వ‌సూళ్లు చేసింది. ఆరు నెలల్లోనే రూ.1,000 కోట్లను వ‌సూళ్లు చేసింది. జీహెచ్ఎంసీలో 30 సర్కిళ్లు ఉండగా.. ఈ ఏడాది ఏప్రిల్ 28వ తేదీ వరకు మొత్తంగా రూ.1,165.17 కోట్లు వసూలయ్యాయి. శేరిలింగంపల్లి సర్కిల్ రూ. 171.23 కోట్లతో అగ్రస్థానంలో నిలవగా, జూబ్లీహిల్స్ సర్కిల్ రూ. 119.49 కోట్లు వ‌సూళ్లు చేసి రెండోస్థానంలో నిలిచింది. ఇటు ఖైరతాబాద్ సర్కిల్ రూ.92 కోట్లు వ‌సూళ్లు చేసి మూడో స్థానంలో నిలిచింది. ఈ ఏడాది చాలా మంది ఆస్తి యజమానులు ఆన్‌లైన్‌లో పన్ను చెల్లించగా, మరికొందరు మీ సేవా కేంద్రాల ద్వారా చెల్లించారు. పలువురు ఆస్తి యజమానుల నుంచి బిల్లు కలెక్టర్లు పన్ను వసూలు చేయడమే కాకుండా జీహెచ్‌ఎంసీ సిటిజన్ సర్వీస్ సెంటర్లను సందర్శించి చెల్లించిన వారు కూడా ఉన్నారు.

జూలైలో ప్రవేశపెట్టిన వన్-టైమ్ స్కీమ్ (OTS)తో 47,205 అసెస్‌మెంట్ల ద్వారా రూ.92.78 కోట్లు వసూలు చేయబడ్డాయి. ఈ సంవత్సరం ఏప్రిల్ నుండి అక్టోబర్ 28 వరకు వచ్చిన రూ.1,165 కోట్ల ఆదాయంలో ఈ ఆదాయం భాగ‌మైంది. ఆస్తి పన్ను బకాయిలతో ఇబ్బంది పడుతున్న వారికి OTS ఉపశమనం అందించింది. ఈ పథకం అక్టోబర్ 31తో ముగుస్తుంది. ఈ పథకం కింద రాష్ట్ర ప్రభుత్వం ఆస్తి పన్నుపై 90 శాతం పేరుకుపోయిన బకాయి వడ్డీని మాఫీ చేయాలని ఆదేశించింది. అయితే పన్ను చెల్లింపుదారు 2021-22 వరకు పన్ను బకాయిల అసలు మొత్తాన్ని, 10 శాతం కూడబెట్టిన వడ్డీతో పాటు ఒకేసారి క్లియర్ చేయాలి. ఓటీఎస్‌ కింద వసూలు చేసే పన్నును మరింత పెంచే యోచనలో ప్ర‌భుత్వం ఉంది.

Follow us