Google Ads -2023 : గూగుల్ యాడ్స్ వ్యయంలో నంబర్ 1 బీజేపీ.. నంబర్ 2 ఏదో తెలుసా ?

Google Ads -2023 : గూగుల్ యాడ్స్‌‌ను ఎక్కువగా రన్ చేస్తున్న రాజకీయ పార్టీలు ఏవి ? అనగానే చటుక్కున మనం బీజేపీ అని చెప్పొచ్చు. ఎందుకంటే ఆ పార్టీయే ఇప్పుడు కేంద్రంలో అధికారంలో ఉంది. సంక్షేమ పథకాలపై ప్రజలను ఆకర్షించడానికి , అసెంబ్లీ ఎన్నికల వేళ ఓటర్లను తమ వైపు తిప్పుకోవడానికి బీజేపీ భారీగా గూగుల్ యాడ్స్‌ను రన్ చేసింది. గూగుల్ యాడ్స్ ప్లాట్‌ఫామ్ ద్వారా న్యూస్ వెబ్‌సైట్లతో పాటు యూట్యూబ్ ఛానళ్లలో యాడ్స్‌ను రన్ చేస్తుంటారు. 2023  సంవత్సరంలో గూగుల్ యాడ్స్ ద్వారా ప్రచారంపై బీజేపీ ఎంత ఖర్చు చేసిందో తెలుసా ? రూ.19 కోట్లు. ఈ ఖర్చు విషయంలో బీజేపీ తర్వాతి స్థానంలో కాంగ్రెస్ పార్టీయే ఉందని అనుకుంటున్నారా ? అయితే మీరు తప్పులో కాలేసినట్టే. గూగుల్ యాడ్స్ ఖర్చులో బీజేపీ తర్వాతి స్థానంలో బీఆర్ఎస్ నిలిచింది. గత ఏడాది బీఆర్ఎస్ పార్టీ రూ. 12.1 కోట్లు ఖర్చు చేసింది. గూగుల్ యాడ్స్ ట్రాన్స్‌పరెన్సీ సెంటర్ ఈవివరాలను(Google Ads -2023) వెల్లడించింది.

We’re now on WhatsApp. Click to Join.

గతేడాది బీఆర్ఎస్ పార్టీ తెలంగాణ రాష్ట్రంలో రూ.11.9 కోట్లు, ఆంధ్రప్రదేశ్‌లో రూ. 16.5 లక్షలు,  కర్ణాటకలో రూ.270,000, తమిళనాడులో రూ.160,000,  మహారాష్ట్రలో రూ.92,000 ఖర్చు చేసింది. గత సంవత్సరం నవంబర్ 24 నుంచి నవంబర్ 28 వరకు మూడు బీఆర్ఎస్ యాడ్స్ ఒక్కొక్కటి 10 మిలియన్ సార్లు వచ్చాయి. ఇంత భారీగా ఖర్చు చేసినప్పటికీ తెలంగాణ అసెంబ్లీ ఎన్నికల్లో కాంగ్రెస్‌ చేతిలో బీఆర్‌ఎస్‌ ఓడిపోయింది. దీన్నిబట్టి బీఆర్ఎస్‌పై ప్రజా వ్యతిరేకత ఎంతగా పెరిగిపోయిందో అర్థం చేసుకోవచ్చు. గతేడాది కాంగ్రెస్ పార్టీ గూగుల్ యాడ్స్‌పై కేవలం రూ.4.59 కోట్లే ఖర్చు చేసింది. తెలంగాణలో గూగుల్ యాడ్స్‌పై కాంగ్రెస్ పార్టీ రూ. 3,250 ఖర్చు చేయగా, బీఆర్‌ఎస్ పార్టీ భారీగా రూ. 11.9 కోట్లు ఖర్చు చేసి ఓడిపోయింది. తెలంగాణ అసెంబ్లీ ఎన్నికల్లో బీజేపీ రూ.1.92 కోట్లు ఖర్చు చేసి ఓడిపోయింది.

Also Read: 50 Years – Single Charge : ఫోన్లలో న్యూక్లియర్ బ్యాటరీ.. ఒక్క ఛార్జ్‌తో 50 ఏళ్లు లైఫ్

రాజస్థాన్, మధ్యప్రదేశ్, ఛత్తీస్‌గఢ్ అసెంబ్లీ ఎన్నికల కోసం కాంగ్రెస్ గూగుల్ యాడ్స్‌పై డబ్బు ఖర్చు చేయలేదు. బహుజన్ సమాజ్ పార్టీ కూడా ఈ అసెంబ్లీ ఎన్నికలలో రూ. 43,250 గూగుల్ యాడ్స్‌పై ఖర్చు చేసింది. కర్ణాటక అసెంబ్లీ ఎన్నికలో గూగుల్ యాడ్స్‌పై రూ. 7.2 కోట్లు ఖర్చు చేసిన బీజేపీ ఓడిపోయింది. రాజస్థాన్‌లో గూగుల్ యాడ్స్‌పై రూ. 2.98 కోట్లు ఖర్చు చేసి బీజేపీ గెలిచింది.  మధ్యప్రదేశ్‌లో గూగుల్ యాడ్స్‌పై రూ.2.81 కోట్లు ఖర్చుచేసి బీజేపీ గెలిచింది. ఛత్తీస్‌గఢ్ అసెంబ్లీ ఎన్నికల్లో రూ.1.48 కోట్లు ఖర్చు చేసి బీజేపీ గెలిచింది. బీజేపీకి చెందిన రెండు యాడ్స్ 10 మిలియన్ల కంటే ఎక్కువ సార్లు నెటిజన్స్‌కు చూపబడ్డాయి.  ఒక్కోదానిపై రూ. 30 లక్షలు ఖర్చు వచ్చింది.