Aadhaar Update: ఉచిత ఆధార్ అప్డేట్ చేసుకునే అవకాశం.. గడువు అప్పటి వరకు మాత్రమే!
ఆధార్ కార్డు ని ఉచితంగా అప్డేట్ చేసుకోవాలి అనుకుంటున్నా వారికి గుడ్ న్యూస్ ని చెబుతూ ఉచిత ఆధార్ గడువును పెంచింది యుఐడిఏఐ.
- By Anshu Published Date - 10:34 AM, Tue - 18 February 25
భారతదేశంలో నివసించే ప్రతి ఒక్క భారతీయుడికి ఆధార్ కార్డు తప్పనిసరిగా ఉండాల్సిందే. ప్రస్తుత రోజుల్లో ఆధార్ కార్డు లేకుండా చాలా వరకు పనులు పూర్తి కావడం లేదు. అయితే ఆధార్ కార్డును వినియోగించే ప్రతి ఒక్కరికి యుఐడీఏఐ ఎప్పటికప్పుడు హెచ్చరికలు జారీ చేస్తూ వస్తున్న విషయం తెలిసిందే.. ఎలాంటి పొరపాట్లు లేకుండా చూసుకోమని చెబుతూనే ఉంది. ఆధార్ కార్డులో ఏవైనా తప్పులు ఉంటే వెంటనే సవరించుకోమని చెబుతూనే ఉంది. అందుకోసం ఇప్పటికే చాలాసార్లు ఉచిత ఆధార్ కార్డు అప్డేట్ అవకాశాన్ని కల్పించిన విషయం తెలిసిందే. ఇటీవల ఆ గడువు పూర్తి కాగా మరోసారి ఆధార్ వినియోగదారులకు శుభవార్త చెబుతూ ఆ గడువుని పెంచింది. పది సంవత్సరాలు అయినట్లయితే ఆధార్‌లోని వివరాలను అప్డేట్ చేసుకోవాలి.
ఈ అప్డేట్ అనేది పూర్తిగా ఉచితం. ఎలాంటి రుసుము చెల్లించాల్సిన అవసరం లేదు. గడువు దాటిన తర్వాత అప్డేట్ కోసం రూ.50 చొప్పున ఛార్జ్‌ చెల్లించాల్సి ఉంటుంది. ఉచిత ఆధార్ కార్డ్ అప్డేట్ కోసం కేంద్ర ప్రభుత్వం గడువును పొడిగిస్తూ నిర్ణయం తీసుకుంది. ఉచిత ఆధార్ కార్డ్ అప్‌డేట్‌కు గత ఏడాది డిసెంబర్ 14 వరకు చివరి రోజు ఉండేది. కానీ ఆ తర్వాత కేంద్రం మరోసారి గడువు పెంచింది. ఈ ఉచిత ఆధార్ అప్డేట్ కోసం గడువు ఈ ఏడాది జూన్ 14 వరకు ఉంది. మీరు మీ ఆధార్ కార్డ్, పేరు, చిరునామా మొదలైనవాటిని ఉచితంగా మార్చాలనుకుంటే, మీరు ఎటువంటి డబ్బులు చెల్లించాల్సిన అవసరం లేదు. అయితే ఆధార్ సెంటర్‌ లో అప్డేట్ చేయడానికి ఎటువంటి రుసుము ఉండదు.
యుఐడీఏఐ వెబ్‌సైట్ నుండి ఆధార్ కార్డ్ డెమోగ్రాఫిక్ సమాచారాన్ని ఆన్‌లైన్‌ లో అప్డేట్ చేయవచ్చు. ఆధార్ కార్డు తీసుకుని పదేళ్లు గడుస్తున్న వారు తప్పనిసరిగా ఆధార్ ను అప్డేట్ చేసుకోవాల్సి ఉంటుంది. గత ఏడాది జూన్ 14, 2024 గడువు ఉండేది. తర్వాత ఈ గడువును డిసెంబర్ 14 వరకు పొడిగించారు. యూనిక్ ఐడెంటిఫికేషన్ అథారిటీ ఆఫ్ ఇండియా మరోసారి ఈ గడువును పొడిగించింది. అంటే జూన్ 14 వరకు ఉచితంగా అప్డేట్ చేసుకోవచ్చట. మరి ఎందుకు ఆలస్యం వెంటనే ఆధార్ కేంద్రాన్ని సంప్రదించి ఆధార్ కార్డును అప్డేట్ చేసుకోండి.
ఇంతకీ ఆన్‌లై న్‌లో ఆధార్ కార్డును ఎలా అప్డేట్ చేయాలి? అన్న విషయానికి వస్తే.. ముందుగా యుఐడీఏఐ అధికారిక వెబ్‌సైట్ myaadhaar.uidai.gov.in సెల్ఫ్ సర్వీస్ పోర్టల్‌లో సందర్శించాలి. మీ ఆధార్ నంబర్, క్యాప్చా కోడ్, మీ మొబైల్ నంబర్‌కు పంపిన ఓటీపీ ని నమోదు చేయడం ద్వారా మీ ప్రొఫైల్ ఓపెన్‌ అవుతుంది. ఇప్పుడు మీరు డాక్యుమెంట్ అప్డేట్ విభాగంలో అప్డేట్ చేయాలనుకుంటున్న మొత్తం సమాచారాన్ని నమోదు చేయాలి. డ్రాప్ డౌన్ జాబితా నుండి తగిన డాక్యుమెంట్ రకాన్ని ఎంచుకోవడం ద్వారా ధృవీకరణ కోసం మీ పత్రాలను స్కాన్ చేసి అప్డేట్ చేయాలి. ఆ తర్వాత మీకు సర్వీస్ రిక్వెస్ట్ నంబర్ వస్తుంది. ఈ నంబర్ తో మీరు ఈ పోర్టల్ నుండి అప్డేట్ స్థితిని తెలుసుకోవచ్చట.
