టీ20 వ‌ర‌ల్డ్ క‌ప్‌లో సంచ‌ల‌నం.. శ్రీలంక‌పై జింబాబ్వే ఘ‌న‌విజ‌యం!

ZIM Beat SL

ZIM Beat SL: టీ20 వరల్డ్ కప్ 2026లో జరిగిన 38వ మ్యాచ్‌లో జింబాబ్వే జట్టు శ్రీలంకను 6 వికెట్ల తేడాతో ఓడించింది. కొలంబోలోని ఆర్. ప్రేమదాస స్టేడియంలో జరిగిన ఈ మ్యాచ్‌లో శ్రీలంక జట్టు మొదట బ్యాటింగ్ చేసి 179 పరుగుల లక్ష్యాన్ని నిర్దేశించింది. దానికి సమాధానంగా జింబాబ్వే జట్టు అద్భుతమైన బ్యాటింగ్‌తో 19.3 ఓవర్లలో లక్ష్యాన్ని ఛేదించి విజయం సాధించింది.

టీ20 వరల్డ్ కప్ చరిత్రలో ఇది రెండో అత్యుత్తమ రన్ ఛేజ్. అంతేకాకుండా టోర్నీ చరిత్రలో జింబాబ్వే శ్రీలంకను ఓడించడం ఇదే తొలిసారి. టీ20 వరల్డ్ కప్ 2026లో జింబాబ్వే సృష్టించిన రెండో అతిపెద్ద సంచలనం ఇది. అంతకుముందు ఆ జట్టు బలమైన ఆస్ట్రేలియాను 23 పరుగుల తేడాతో ఓడించింది.

పత్తుమ్ నిస్సంక పోరాటం వృథా

ఈ మ్యాచ్‌లో శ్రీలంక టాస్ గెలిచి మొదట బ్యాటింగ్ ఎంచుకుంది. పత్తుమ్ నిస్సంక, కుసాల్ పెరీరా శ్రీలంకకు మంచి ఆరంభాన్ని ఇచ్చారు. మొదటి వికెట్‌కు 54 పరుగులు జోడించారు. పెరీరా 14 బంతుల్లో 22 పరుగులు చేసి అవుట్ అవ్వగా ఆ తర్వాత కుసాల్ మెండిస్ 14 పరుగులు చేసి పెవిలియన్ చేరాడు. అయితే నిస్సంక ఒక చివర పట్టుదలగా నిలబడి అర్ధ సెంచరీతో మెరిశాడు.

నిస్సంక 41 బంతుల్లో 8 ఫోర్ల సాయంతో 62 పరుగులు చేశాడు. ఆయనతో పాటు పవన్ రత్నాయకే 25 బంతుల్లో 3 ఫోర్లు, 2 సిక్సర్లతో 44 పరుగులు రాబట్టాడు. వీరిద్దరూ మినహా మిగిలిన శ్రీలంక బ్యాటర్లు ఎవరూ రాణించలేకపోవడంతో జట్టు 20 ఓవర్లలో 7 వికెట్ల నష్టానికి 178 పరుగులు చేసింది. జింబాబ్వే బౌలర్లలో బ్లెస్సింగ్ ముజరబానీ, బ్రాడ్ ఎవాన్స్ మరియు గ్రేమ్ క్రీమర్ తలో 2 వికెట్లు తీశారు.

Also Read: రంజాన్ మాసంలో 5 కిలోల బరువు తగ్గడం ఎలా?

బ్రియాన్ బెన్నెట్, సికందర్ రజా అద్భుత ప్రదర్శన

179 పరుగుల లక్ష్యంతో బరిలోకి దిగిన జింబాబ్వేకు ఓపెనర్లు బ్రియాన్ బెన్నెట్, తదివానాషే మారుమని 69 పరుగుల భాగస్వామ్యంతో అదిరిపోయే ఆరంభాన్ని ఇచ్చారు. మారుమని 26 బంతుల్లో 34 పరుగులు చేసి అవుట్ అయ్యాడు. బెన్నెట్ ఒక చివర ఇన్నింగ్స్‌ను కొనసాగిస్తూ ర్యాన్ బర్ల్‌తో కలిసి రెండో వికెట్‌కు 29 పరుగులు జోడించాడు. ర్యాన్ 12 బంతుల్లో 23 పరుగులు చేసి పెవిలియన్ చేరాడు. ఆ తర్వాత క్రీజులోకి వచ్చిన కెప్టెన్ సికందర్ రజా, బెన్నెట్‌కు సహకరిస్తూ మూడో వికెట్‌కు 69 పరుగులు జోడించి జింబాబ్వే విజయాన్ని ఖాయం చేశాడు.

రజా 26 బంతుల్లో 45 పరుగులు చేసి అవుట్ అవ్వగా, బెన్నెట్ 48 బంతుల్లో 63 పరుగులతో నాటౌట్‌గా నిలిచి జట్టుకు చిరస్మరణీయ విజయాన్ని అందించాడు. జింబాబ్వే 19.3 ఓవర్లలో 4 వికెట్లు కోల్పోయి 182 పరుగులు చేసింది. శ్రీలంక బౌలర్లలో దుషన్ హేమంత 2 వికెట్లు తీయగా దసున్ షనక, దునిత్ వెల్లలాగేలకు చెరో వికెట్ దక్కింది.

ఫిబ్రవరి 26న భారత్‌తో తలపడనున్న జింబాబ్వే

టీ20 వరల్డ్ కప్ 2026లో జింబాబ్వే జట్టు ఇప్పటివరకు అజేయంగా (ఓటమి లేకుండా) కొనసాగుతోంది. మూడు గ్రూప్ స్టేజ్ మ్యాచ్‌ల్లో గెలిచి సూపర్-8లో చోటు ఖాయం చేసుకుంది. ఐర్లాండ్‌తో జరగాల్సిన మ్యాచ్ వర్షం కారణంగా రద్దయ్యింది. జింబాబ్వే తన మొదటి సూపర్-8 మ్యాచ్‌ను ఫిబ్రవరి 23న వెస్టిండీస్‌తో ముంబైలోని వాంఖడే స్టేడియంలో ఆడనుంది. ఆ తర్వాత ఫిబ్రవరి 26న టీమ్ ఇండియాను చెన్నైలోని ఎంఏ చిదంబరం స్టేడియంలో ఢీకొంటుంది. ఇక మార్చి 1న ఢిల్లీలోని అరుణ్ జైట్లీ స్టేడియంలో సౌతాఫ్రికాతో జింబాబ్వే తన చివరి సూపర్-8 మ్యాచ్ ఆడనుంది.

Follow us