2025లో గూగుల్లో అత్యధికంగా సెర్చ్ చేయబడిన టాప్-10 భారతీయ క్రికెటర్లు వీరే!
లిస్ట్లో 10వ స్థానంలో ఉన్న విఘ్నేష్ తన వెరైటీ లెఫ్ట్ ఆర్మ్ రిస్ట్ స్పిన్ బౌలింగ్ యాక్షన్ ద్వారా వైరల్ అయ్యారు. ఐపీఎల్ అరంగేట్రంలోనే 'మిస్టరీ స్పిన్నర్'గా గుర్తింపు పొంది సెర్చ్ లిస్ట్లో చోటు సంపాదించారు.
- Author : Gopichand
Date : 19-12-2025 - 2:21 IST
Published By : Hashtagu Telugu Desk
Year Ender 2025: ప్రతి సంవత్సరం చివరలో గూగుల్ తన ‘ఇయర్ ఇన్ సెర్చ్’ రిపోర్ట్ను విడుదల చేస్తుంది. గత 12 నెలల్లో ఈ సెర్చ్ ఇంజిన్లో ప్రజలు ఎవరి గురించి ఎక్కువగా వెతికారో ఇందులో వివరిస్తారు. అయితే 2025 సంవత్సరానికి సంబంధించి ఒక షాకింగ్ విషయం ఏమిటంటే.. గూగుల్లో అత్యధికంగా సెర్చ్ చేయబడిన టాప్-10 భారతీయ క్రికెటర్ల జాబితాలో ‘Ro-Ko’ (రోహిత్ శర్మ, విరాట్ కోహ్లీ) ఇద్దరి పేర్లు లేవు.
2025లో గూగుల్లో అత్యధికంగా సెర్చ్ చేయబడిన టాప్-10 భారతీయ క్రికెటర్లు వీరే
వైభవ్ సూర్యవంశీ: ఐపీఎల్ 2025 సమయంలోనే వైభవ్ వార్తల్లో నిలిచారు. టీ-20 చరిత్రలో అత్యంత పిన్న వయస్సులో సెంచరీ చేసిన ఆటగాడిగా గుర్తింపు పొందారు. ఇటీవల అండర్-19 ఆసియా కప్లో 171 పరుగులు చేసి రికార్డు సృష్టించారు. మొత్తంగా ఈ ఏడాది అత్యధికంగా వెతకబడిన భారతీయ వ్యక్తిగా నిలవడమే కాకుండా, ప్రపంచవ్యాప్తంగా 6వ స్థానంలో నిలిచారు. ఈ క్రమంలో ఆయన రోహిత్, విరాట్లను వెనక్కి నెట్టారు.
ప్రియాంశ్ ఆర్య: ఢిల్లీ ప్రీమియర్ లీగ్లో ఒకే ఓవర్లో 6 సిక్సర్లు కొట్టి అందరి దృష్టిని ఆకర్షించారు. ఆ తర్వాత పంజాబ్ కింగ్స్ తరపున ఐపీఎల్లో అద్భుత ప్రదర్శన చేయడంతో అత్యధికంగా సెర్చ్ చేయబడిన క్రికెటర్ల జాబితాలో రెండో స్థానానికి చేరుకున్నారు.
అభిషేక్ శర్మ: టీమ్ ఇండియాలో విధ్వంసకర ఓపెనర్గా తన స్థానాన్ని సుస్థిరం చేసుకున్నారు. ప్రపంచ నంబర్ 1 టీ20 బ్యాటర్గా ఎదగడమే కాకుండా, పాకిస్థాన్లో అత్యధికంగా సెర్చ్ చేయబడిన ఆటగాడిగా నిలిచారు. ఈ ఏడాది భారత్కు పలు విజయాలు అందించారు.
షేక్ రషీద్: ఆంధ్రప్రదేశ్కు చెందిన ఈ యువ ప్రతిభావంతుడు ఈ ఏడాది చెన్నై సూపర్ కింగ్స్ తరపున ఐపీఎల్ అరంగేట్రం చేశారు. ఆర్థిక ఇబ్బందులు ఉన్నప్పటికీ ప్రొఫెషనల్ క్రికెటర్గా ఆయన సాగించిన ప్రయాణం ఎంతో మందికి స్ఫూర్తినిచ్చింది. అందుకే ఆయన సెర్చ్ లిస్ట్లో నాలుగో స్థానంలో నిలిచారు.
Also Read: MGNREGA పథకం మార్పు పై రాహుల్ సంచలన వ్యాఖ్యలు
జెమిమా రోడ్రిగ్స్: మహిళల ప్రపంచకప్ 2025 సెమీఫైనల్లో ఆస్ట్రేలియాపై అద్భుత సెంచరీ చేసి భారత్ను గెలిపించారు. భారత మహిళల జట్టు మొదటిసారి వన్డే ప్రపంచ ఛాంపియన్గా నిలవడంలో ఆమె కీలక పాత్ర పోషించారు. అందుకే అభిమానులు ఆమె గురించి ఎక్కువగా వెతికారు.
ఆయుష్ మ్హత్రే: ముంబై దేశీవాళీ క్రికెట్లో అదరగొట్టిన 18 ఏళ్ల ఆయుష్, 2025 ఐపీఎల్లో చెన్నై సూపర్ కింగ్స్ తరపున ఆడే అవకాశం దక్కించుకున్నారు. అండర్-19 ఆసియా కప్లో భారత జట్టుకు సారథ్యం వహించి తన ప్రతిభను చాటుకున్నారు.
స్మృతి మంధాన: భారత స్టార్ క్రికెటర్ స్మృతి ఈ జాబితాలో 7వ స్థానంలో ఉన్నారు. ఏడాది పొడవునా రికార్డు స్థాయి బ్యాటింగ్తో పాటు, ఆమె నిశ్చితార్థం, పెళ్లి ఆగిపోయిందనే వార్తల కారణంగా సోషల్ మీడియాలో ఎక్కువగా చర్చించబడ్డారు.
కరుణ్ నాయర్: భారత్ తరపున గతంలో ట్రిపుల్ సెంచరీ చేసిన నాయర్ 2025 రంజీ, విజయ్ హజారే ట్రోఫీల్లో వరుస సెంచరీలు బాదారు. భారత టెస్టు జట్టులోకి పునరాగమనం చేయడంతో ఆయన గురించి గూగుల్లో సెర్చ్ పెరిగింది.
ఉర్విల్ పటేల్: 360 డిగ్రీల హిట్టర్గా పేరు తెచ్చుకున్న ఉర్విల్ దేశీవాళీ టీ-20ల్లో తన ఫినిషింగ్ సామర్థ్యంతో మెరిశారు. అభిమానులు ఆయనను దక్షిణాఫ్రికా దిగ్గజం ఏబీ డివిలియర్స్తో పోల్చడం విశేషం.
విఘ్నేష్ పుత్తూరు: లిస్ట్లో 10వ స్థానంలో ఉన్న విఘ్నేష్ తన వెరైటీ లెఫ్ట్ ఆర్మ్ రిస్ట్ స్పిన్ బౌలింగ్ యాక్షన్ ద్వారా వైరల్ అయ్యారు. ఐపీఎల్ అరంగేట్రంలోనే ‘మిస్టరీ స్పిన్నర్’గా గుర్తింపు పొంది సెర్చ్ లిస్ట్లో చోటు సంపాదించారు.
Follow us
