RCB vs CSK: కీలక మ్యాచ్ లో రాణించిన విరాట్ కోహ్లి, ఫాఫ్ డు ప్లెసిస్

RCB vs CSK: బెంగళూరులో చెన్నై సూపర్ కింగ్స్ తో జరుగుతున్న హై-వోల్టేజ్ మ్యాచ్‌లో విరాట్ కోహ్లి అటాకింగ్ బ్యాటింగ్ తో అలరించాడు. కీలక సమయంలో అద్భుత ఇన్నింగ్స్ ఆడి జట్టు స్కోరును పరుగులు పెట్టించాడు. అయితే ప్లేఆఫ్ రేసులో కోహ్లీ మరింత రాణించి ఉండాల్సింది. ఇక కోహ్లీకి తోడు ఫాఫ్ డు ప్లెసిస్ ధనాధన్ బ్యాటింగ్ చేశాడు. దీంతో విరాట్ కోహ్లీ, ఫాఫ్ డు ప్లెసిస్ జోడీ చెన్నై బౌలర్లపై విధ్వంసం సృష్టిస్తోంది.

పవర్‌ప్లే ముగిసిన వెంటనే ఆర్సీబీ స్కోరు 50 పరుగులు దాటింది. ఇన్నింగ్స్ 13వ ఓవర్‌ని మిచెల్ సాంట్నర్ బౌలింగ్ చేశాడు. ఐదు బంతుల్లో ఐదు సింగిల్స్ ఇచ్చిన ఫాఫ్ డు ప్లెసిస్ చివరి బంతికి నాటకీయంగా రనౌట్ అయ్యాడు. సాంట్నర్ వేసిన బంతిని రజత్ పాటిదార్ స్ట్రెయిట్ షాట్ ఆడాడు. సాంట్నర్ బంతిని ఆపడానికి ప్రయత్నించాడు, కానీ బంతి అతని చేతికి తగిలి స్టంప్‌లను తాకింది. చాలాసార్లు రీప్లేలు చూసిన తర్వాత థర్డ్ అంపైర్ ఫాఫ్ డు ప్లెసిస్ రనౌట్‌గా ప్రకటించాడు. డు ప్లెసిస్ 39 బంతుల్లో మూడు ఫోర్లు, మూడు సిక్సర్ల సాయంతో 54 పరుగులు చేశాడు. కోహ్లీని డారిల్ మిచెల్ క్యాచ్ అవుట్ చేశాడు. సాంట్నర్ బౌలింగ్ లో బంతి కోహ్లి బ్యాట్ పై అంచుకు తగిలి లాంగ్ ఆన్ వైపు వెళ్లింది. అక్కడ మిచెల్ క్యాచ్ పట్టాడు. కోహ్లీ 29 బంతుల్లో మూడు ఫోర్లు, నాలుగు సిక్సర్ల సాయంతో 47 పరుగులు చేశాడు.

పాయింట్ల పట్టికలో సీఎస్‌కే జట్టు నాలుగో స్థానంలో ఉంది. ప్రస్తుత సీజన్‌లో ఇప్పటివరకు 13 మ్యాచ్‌లు ఆడిన చెన్నై ప్రస్తుతం 14 పాయింట్లతో ఉంది. మరోవైపు ఆర్సీబీ జట్టు 12 పాయింట్లతో పాయింట్ల పట్టికలో ఏడో స్థానంలో ఉంది. కాగా ఆర్సీబీ జట్టు ప్లేఆఫ్‌కు అర్హత సాధించాలంటే ముందుగా చెన్నైతో జరిగే మ్యాచ్‌లో గెలవాలి. ఇక ఈ మ్యాచ్ లో ఆర్సీబీ 200 పరుగులు చేస్తే, అది చెన్నైని 182 పరుగులకు పరిమితం చేసి 18 పరుగుల తేడాతో గెలవాలి, తద్వారా ప్లేఆఫ్‌లకు టిక్కెట్‌ను పొందవచ్చు. దీంతో ఈ మ్యాచ్ ఇరు జట్లకు కీలకంగా మారింది. ఇంతకుముందు కేకేఆర్, రాజస్థాన్ రాయల్స్ మరియు సన్‌రైజర్స్ హైదరాబాద్ జట్లు ప్లేఆఫ్స్ అర్హత సాధించాయి.

Also Read: Kalki 2898 AD : ‘కల్కి’ నుంచి బుజ్జి ప్రోమో వచ్చేసింది.. నీ టైం స్టార్ట్ అయ్యింది బుజ్జి..