ICC Test Rankings: ఐసీసీ టెస్ట్ ర్యాంకింగ్స్‌ విడుదల.. టాప్‌-10 బ్యాట్స్‌మెన్ లో రోహిత్‌ ఒక్కడే..!

ICC Test Rankings: ఇంగ్లండ్-ఆస్ట్రేలియా మధ్య జరిగిన ఐదు టెస్టు మ్యాచ్‌ల యాషెస్ సిరీస్ తర్వాత ఐసీసీ టెస్ట్ ర్యాంకింగ్స్‌ (ICC Test Rankings)లో చాలా పెద్ద మార్పులు చోటుచేసుకున్నాయి. ఆస్ట్రేలియా మాజీ కెప్టెన్ స్టీవ్ స్మిత్, ఇంగ్లండ్ మాజీ కెప్టెన్ జో రూట్ ర్యాంకింగ్స్‌లో అత్యధికంగా లాభపడ్డారు. బ్యాట్స్‌మెన్ ర్యాంకింగ్స్‌లో కేన్ విలియమ్సన్ నంబర్ వన్ స్థానంలో కొనసాగుతున్నప్పటికీ కేన్ విలియమ్సన్ 883 పాయింట్లతో ఉన్నాడు. బౌలింగ్‌లో ప్రస్తుతం భారత స్టార్‌ స్పిన్నర్‌ అశ్విన్‌ను ఎవరూ అధిగమించేలా కనిపించడం లేదు.

యాషెస్ సిరీస్‌లో అత్యుత్తమ ప్రదర్శన చేసినందుకు గానూ జో రూట్‌కు 859 పాయింట్లతో ర్యాంకింగ్స్‌లో రెండో స్థానంలో నిలిచాడు. స్టీవ్ స్మిత్‌ రెండు స్థానాలు మెరుగుపర్చుకున్నాడు. యాషెస్ తర్వాత స్టీవ్ స్మిత్ 842 పాయింట్లతో ర్యాంకింగ్స్‌లో మూడో స్థానంలో ఉన్నాడు. సిరీస్ ఆరంభానికి ముందు మొదటి స్థానంలో ఉన్న మార్నస్ లాబుస్చాగ్నే ఇప్పుడు ఐదో స్థానానికి చేరుకున్నాడు. హెడ్ ​​కూడా రెండు స్థానాలు కోల్పోయి ఆరో స్థానంలో ఉన్నాడు. బ్యాట్స్‌మెన్ ర్యాంకింగ్స్‌లో భారత కెప్టెన్ రోహిత్ శర్మ 759 పాయింట్లతో 10వ స్థానంలో కొనసాగుతున్నాడు.

బౌలర్ల విషయానికొస్తే అశ్విన్ 879 పాయింట్లతో నంబర్ వన్‌గా ఉన్నాడు. రబడ రెండో స్థానంలో, జడేజా మూడో స్థానంలో కొనసాగుతున్నారు. స్టువర్ట్ బ్రాడ్ తన కెరీర్‌ను నాలుగో ర్యాంక్‌తో ముగించాడు. ఏడాది పాటు క్రికెట్‌కు దూరంగా ఉన్నప్పటికీ జస్ప్రీత్ బుమ్రా టెస్టు ర్యాంకింగ్స్‌లో 10వ స్థానంలో కొనసాగుతున్నాడు.

Also Read: HCA Elections: HCA ఎన్నికల బరిలో అజారుద్దీన్‌

ఆల్‌రౌండర్ల ర్యాంకింగ్స్‌లో జడేజా

ఆల్‌రౌండర్ల ర్యాంకింగ్స్‌లో రవీంద్ర జడేజా, అశ్విన్‌లు ఆధిపత్యం కొనసాగిస్తున్నారు. 455 పాయింట్లతో జడేజా మొదటి స్థానంలో ఉన్నాడు. అశ్విన్ 370 పాయింట్లతో రెండో స్థానంలో ఉన్నాడు. షకీబ్ అల్ హసన్ మూడో స్థానంలో కొనసాగుతున్నాడు. భారత్‌కు చెందిన మరో ఆల్‌రౌండర్ అక్షర్ పటేల్ 298 పాయింట్లతో టాప్ 5లో కొనసాగుతున్నాడు. టీమ్‌ ర్యాంకింగ్‌ విషయానికొస్తే భారత్‌ 118 పాయింట్లతో నంబర్‌వన్‌ స్థానంలో కొనసాగుతోంది. ఆస్ట్రేలియా కూడా 118 పాయింట్లను కలిగి ఉంది. కానీ రెండవ స్థానంలో ఉంది. ఇంగ్లండ్ మాత్రం 115 పాయింట్లతో ర్యాంకింగ్స్‌లో మూడో స్థానంలో ఉంది.