IND vs SA 1st ODI: అద‌ర‌గొట్టిన కోహ్లీ, కేఎల్ రాహుల్‌.. సౌతాఫ్రికా ముందు భారీ ల‌క్ష్యం!

ODI Cricket

IND vs SA 1st ODI: సౌతాఫ్రికాతో జ‌ర‌గుతున్న మొద‌టి వ‌న్డేలో భారత్ (IND vs SA 1st ODI) ముందుగా బ్యాటింగ్ చేసి 349 పరుగుల భారీ స్కోరు సాధించింది. రాంచీలో జరుగుతున్న ఈ వన్డే మ్యాచ్‌లో విరాట్ కోహ్లీ తన వన్డే కెరీర్‌లో 52వ సెంచరీ సాధించాడు. అతను 135 పరుగుల ఇన్నింగ్స్ ఆడగా అతనితో పాటు రోహిత్ శర్మ, కేఎల్ రాహుల్ కూడా అర్ధ సెంచరీలు చేశారు. ఈ సిరీస్‌లో భారత జట్టుకు రాహుల్ కెప్టెన్‌గా వ్యవహరిస్తున్నాడు.

టాస్ ఓడిపోయి మొదట బ్యాటింగ్‌కు వచ్చిన భారత జట్టు రోహిత్ శర్మ- యశస్వి జైస్వాల్ ప్రారంభం నుంచే వేగంగా షాట్లు ఆడటానికి ప్రయత్నించారు. అయితే జైస్వాల్ కేవలం 18 పరుగులు మాత్రమే చేసి ఔటయ్యాడు. ఆ తర్వాత విరాట్ కోహ్లీ, రోహిత్ శర్మ ఇన్నింగ్స్‌ను నిలబెట్టి 136 పరుగుల భాగస్వామ్యం నెలకొల్పారు. రోహిత్ శర్మ 51 బంతుల్లో 57 పరుగుల ఇన్నింగ్స్ ఆడాడు. ఈ మ్యాచ్‌లో నాలుగో స్థానంలో రుతురాజ్ గైక్వాడ్‌కు అవకాశం లభించింది. కానీ అతను 8 పరుగులు మాత్రమే చేసి ఔటయ్యాడు. డెవాల్డ్ బ్రెవిస్ అద్భుతమైన క్యాచ్‌తో గైక్వాడ్‌ను ఔట్ చేశాడు. జట్టు మేనేజ్‌మెంట్ అందరినీ ఆశ్చర్యపరుస్తూ వాషింగ్టన్ సుందర్‌ను ఐదో స్థానంలో బ్యాటింగ్‌కు పంపింది. కానీ అతను 13 పరుగులు చేసి పెవిలియన్ చేరాడు.

Also Read: Stomach Worms: మీ పిల్ల‌ల క‌డుపులో నులిపురుగులు ఉంటే తెలుసుకోండిలా?!

కేఎల్ రాహుల్ తాను ఆరో స్థానంలో బ్యాటింగ్ చేస్తానని ముందుగానే ధృవీకరించాడు. రాహుల్ 60 పరుగుల కెప్టెన్ ఇన్నింగ్స్ ఆడి తాను నిజంగానే టీమ్ ఇండియాకు స‌రైన‌వాడ‌న‌ని నిరూపించాడు. ఎందుకంటే అతను ఏ స్థానంలోనైనా ఎప్పుడైనా బ్యాటింగ్‌కు సిద్ధంగా ఉంటాడు. ఇప్పుడు ఆరో స్థానంలో కూడా అతను ఆకట్టుకున్నాడు. రవీంద్ర జడేజా 20 బంతుల్లో 32 పరుగుల ఇన్నింగ్స్ ఆడి టీమ్ ఇండియా స్కోరును 349కి చేర్చడంలో సహాయపడ్డాడు.

విరాట్ కోహ్లీ 52వ సెంచరీ

వన్డే క్రికెట్ చరిత్రలో అత్యధిక సెంచరీలు చేసిన బ్యాట్స్‌మెన్‌గా విరాట్ కోహ్లీ ఇప్పటికే నిలిచాడు. దక్షిణాఫ్రికాతో జరిగిన తొలి వన్డేలో అతను తన కెరీర్‌లో 52వ ODI సెంచరీని సాధించాడు. వన్డే క్రికెట్‌లో దక్షిణాఫ్రికాపై ఇది అతనికి ఆరో సెంచరీ. ఈ విషయంలో అతను సచిన్ టెండూల్కర్, డేవిడ్ వార్నర్‌ల రికార్డును బద్దలు కొట్టాడు.

Follow us