Unemployment: భారతదేశంలో నిరుద్యోగ రేటు తగ్గుతోంది: CMIE

భార‌త‌దేశంలో నిరుద్యోగ రేటు త‌గ్గుతోంద‌ని సెంట‌ర్ ఫ‌ర్ మానిట‌రింగ్ ఇండియన్ ఎకాన‌మీ తెలిపింది. ఫిబ్రవరి 2022లో భారతదేశంలో మొత్తం నిరుద్యోగిత రేటు 8.10 శాతంగా ఉందని.. ఇది మార్చిలో 7.6 శాతానికి పడిపోయిందని వెల్లడించింది. ఏప్రిల్ 2న ఈ నిష్పత్తి మరింతగా 7.5 శాతానికి పడిపోయింది, పట్టణ నిరుద్యోగిత రేటు 8.5 శాతం మరియు గ్రామీణ ప్రాంతాల్లో 7.1 శాతంగా ఉంద‌ని తెలిపింది. ఇండియన్ స్టాటిస్టికల్ ఇన్‌స్టిట్యూట్‌లో రిటైర్డ్ ఎకనామిక్స్ ప్రొఫెసర్ అభిరూప్ సర్కార్ మాట్లాడుతూ.. మొత్తం నిరుద్యోగిత రేటు తగ్గుతున్నప్పటికీ, భారతదేశం వంటి పేద దేశానికి ఇది ఇంకా ఎక్కువగానే ఉందని అన్నారు.

రెండేళ్లుగా కోవిడ్-19 బారిన పడిన తర్వాత ఆర్థిక వ్యవస్థ మళ్లీ ట్రాక్‌లోకి వస్తోందని నిష్పత్తిలో తగ్గుదల తెలియజేస్తోందని ఆయన అన్నారు. అయితే ఇప్పటికీ పేద దేశంగా ఉన్న భారతదేశానికి ఈ నిరుద్యోగిత రేటు ఎక్కువగా ఉందని… పేద ప్రజలు, ముఖ్యంగా గ్రామీణ ప్రాంతాల్లో, నిరుద్యోగులుగా ఉండలేరన్నారు. దీని కోసం వారు తమ మార్గంలో వచ్చే ఏదైనా ఉద్యోగాన్ని తీసుకుంటున్నారని ఆయ‌న పేర్కోన్నారు. డేటా ప్రకారం హర్యానాలో మార్చిలో అత్యధికంగా 26.7 శాతం నిరుద్యోగిత రేటు నమోదైంది. రాజస్థాన్, జమ్మూ కాశ్మీర్ లో 25 శాతం, బీహార్‌లో 14.4 శాతం, త్రిపురలో 14.1 శాతం, పశ్చిమ బెంగాల్‌లో 5.6 శాతంగా ఉంది. ఏప్రిల్ 2021లో, మొత్తం నిరుద్యోగిత రేటు 7.97 శాతం కాగా.. గత ఏడాది మేలో 11.84 శాతానికి పెరిగింది.
మార్చి, 2022లో కర్నాటక, గుజరాత్‌లు 1.8. శాతం చొప్పున తక్కువ నిరుద్యోగిత రేటును నమోదు చేశాయి.