DSC Counselling : తెలంగాణలో రాష్ట్ర వ్యాప్తంగా డీఎస్సీ టీచర్ల కౌన్సెలింగ్ వాయిదా ..

DSC Counselling : తెలంగాణ వ్యాప్తంగా డీఎస్సీ (DSC) ద్వారా ఎంపికైన అభ్యర్థులకు అనూహ్యంగా విద్యాశాఖ భారీ షాక్ ఇచ్చింది. అభ్యర్థులంతా నేడు (మంగళవారం) నిర్వహించాల్సిన కౌన్సెలింగ్ కోసం ఆసక్తిగా ఎదురుచూస్తున్న సమయంలో, విద్యాశాఖ అధికారిక ప్రకటనను విడుదల చేస్తూ కౌన్సెలింగ్‌ వాయిదా వేస్తున్నట్లు ప్రకటించింది. ఈ ప్రకటనతో రాష్ట్ర వ్యాప్తంగా డీఎస్సీ ద్వారా ఎంపికైన ఉపాధ్యాయులు తీవ్ర నిరాశకు గురయ్యారు. ఇక కౌన్సెలింగ్‌కు సంబంధించిన కొత్త తేదీలను త్వరలోనే ప్రకటిస్తామని విద్యాశాఖ తెలియజేసింది.

గత నెల డీఎస్సీ – 2024 ద్వారా 10,006 మంది అభ్యర్థులు ఉపాధ్యాయులుగా ఎంపికయ్యారు. వీరికి అక్టోబర్ 9న తెలంగాణ ముఖ్యమంత్రి రేవంత్ రెడ్డి స్వయంగా నియామక పత్రాలను అందజేశారు. దీంతో అభ్యర్థులందరూ తమ పోస్టింగ్‌లు త్వరగా ఖరారవుతాయని భావిస్తూ ఆనందంలో మునిగిపోయారు. కౌన్సెలింగ్ తరువాత విధులలో చేరతామని భావించిన కొత్త ఉపాధ్యాయులకు, కౌన్సెలింగ్ వాయిదా వార్త ఊహించని విధంగా పెద్ద దెబ్బలా మారింది.

గ్రూప్-1 ప్రిలిమ్స్‌పై హైకోర్టు తీర్పుకు కోసం అభ్యర్థులు
మరోవైపు, తెలంగాణలో గ్రూప్-1 ప్రిలిమినరీ పరీక్ష రద్దు చేస్తారా లేదా అన్న ఉత్కంఠ నేటితో తీరనుంది. ఈ పరీక్షలో 7 ప్రశ్నలు తప్పుగా ఉన్నాయంటూ 10 మందికి పైగా అభ్యర్థులు హైకోర్టులో పిటిషన్లు దాఖలు చేశారు. ఈ పిటిషన్లపై నేడు (మంగళవారం) మధ్యాహ్నం 2:30 గంటలకు హైకోర్టు తీర్పును వెలువరించనుంది. ఇప్పటికే పలు పిటిషన్లపై విచారణ పూర్తయిన నేపథ్యంలో, ఈ తీర్పు అభ్యర్థుల భవిష్యత్తు తేల్చనుంది.

గ్రూప్-1 మెయిన్స్ పరీక్షలు ఈ నెల 21న ప్రారంభమవుతున్నాయి. ఈ పరీక్షలు జరగాలని నిరీక్షిస్తున్న అభ్యర్థులు, హైకోర్టు తీర్పు కోసం ఉత్కంఠగా ఎదురు చూస్తున్నారు. ఎలాంటి తీర్పు వెలువడుతుందోనన్న ఆతృతతో, అభ్యర్థులంతా తమ భవిష్యత్తుపై ఆందోళనలో ఉన్నారు.

తెలంగాణ విద్యాశాఖ చర్యలపై విమర్శలు
ఈ నేపథ్యంలో, డీఎస్సీ కౌన్సెలింగ్ వాయిదా వేయడం పట్ల కొందరు అభ్యర్థులు , విద్యా సంఘాలు అసంతృప్తి వ్యక్తం చేస్తున్నాయి. ప్రభుత్వం నియామక పత్రాలు అందజేసిన వెంటనే ఉపాధ్యాయులు తమ విధుల్లో చేరుతారని భావించారు. కానీ, అనూహ్యంగా కౌన్సెలింగ్ వాయిదా వేయడం పట్ల అభ్యర్థులు నిరాశ వ్యక్తం చేస్తున్నారు. ఇదే సమయంలో, ప్రభుత్వ విధానంపై నమ్మకం కోల్పోతున్నారని కొందరు అభ్యర్థులు ఆరోపిస్తున్నారు. మొత్తంగా, తెలంగాణ రాష్ట్రంలో డీఎస్సీ అభ్యర్థులు, గ్రూప్-1 పరీక్ష అభ్యర్థులు ప్రస్తుతం తీవ్రమైన సందిగ్ధతలో ఉన్నారు.