Jaishankar : భారత్-పాక్ ఘర్షణలు ద్వైపాక్షిక అంశం కాదు… ఉగ్రవాదంపై గ్లోబల్ హెచ్చరిక

Jaishankar : భారత్-పాకిస్థాన్ మధ్య తలెత్తిన ఉద్రిక్తతలు కేవలం రెండు దేశాల మధ్య సమస్య కాదని, ఇది ఉగ్రవాదం అనే ప్రపంచ వ్యాప్తంగా ఉన్న ప్రమాదకరమైన సమస్యతో కూడిన అంశమని భారత విదేశాంగ మంత్రి ఎస్. జైశంకర్ స్పష్టం చేశారు. ప్రస్తుతం ఆయన యూరప్ పర్యటనలో భాగంగా ప్రముఖ మీడియా సంస్థ యూరాక్టివ్‌కు ఇచ్చిన ఇంటర్వ్యూలో ఈ విషయాలను వెల్లడించారు. “ఒసామా బిన్ లాడెన్ అనే ఉగ్రవాది ఎందుకు పాకిస్థాన్ సైనిక పట్టణంలో, అక్కడి వెస్ట్ పాయింట్ సమీపంలో ఏళ్ల తరబడి స్వేచ్ఛగా నివసించగలిగాడు? ప్రపంచం ఈ విషయాన్ని గమనించాలి. ఇది భారత్-పాక్ వ్యవహారం కాదు… ఇది ఉగ్రవాదం గురించిన అంశం. ఈ ఉగ్రవాదమే ఓ రోజున మిగతా ప్రపంచాన్ని వెంబడిస్తుంది,” అని జైశంకర్ ఆందోళన వ్యక్తం చేశారు.

WTC Final 2025: టాస్‌ గెలిచి బౌలింగ్ ఎంచుకున్న దక్షిణాఫ్రికా

రష్యాపై ఆంక్షలు విధించడంలో భారత్ ఎందుకు భాగస్వామి కాలేదన్న ప్రశ్నకు సమాధానంగా జైశంకర్ మాట్లాడుతూ, “యుద్ధం ద్వారా సమస్యలకు పరిష్కారం లభించదు అనే నమ్మకమే మాకు ఉంది. భారత్ ఎప్పుడూ రాజీ, శాంతి మార్గాన్నే కోరుకుంటుంది. మేము ఏదైనా తీర్పునిచ్చే స్థితిలో ఉండటం లేదు, అదే సమయంలో ఈ సమస్యల నుండి పక్కకు కూడా నిలబడి ఉండటం లేదు,” అని తెలిపారు. భారత్‌కు రష్యాతో, ఉక్రెయిన్‌తో కూడా బలమైన సంబంధాలున్నాయని గుర్తుచేశారు. అంతేకాకుండా, భారత్ స్వతంత్ర దేశంగా తన చరిత్ర, అనుభవాలను బట్టి నిర్ణయాలు తీసుకుంటుందని వివరించారు.

“1947లో స్వాతంత్ర్యం అనంతరం కశ్మీర్‌లో పాకిస్థాన్ నుంచి జరిగిన దాడిపై మాకు ఇప్పటికీ వేదన ఉంది. అప్పుడు మాకు సహకరించాల్సిన పాశ్చాత్య దేశాలు ఏం చేశాయో అందరికీ తెలుసు. ఇప్పుడు అదే దేశాలు అంతర్జాతీయ న్యాయ సూత్రాల గురించి మాట్లాడితే, వారే తమ గతాన్ని తిరిగి పరిగణించుకోవాలని నేను అభిప్రాయపడుతున్నాను,” అని జైశంకర్ విమర్శించారు. నూతన ప్రపంచ వ్యవస్థలో యూరప్‌కు కీలకమైన స్థానం ఉందని, ఇప్పటికే యూరప్ స్వతంత్ర నిర్ణయాలు తీసుకునే దిశగా ముందుకు వెళ్తోందని జైశంకర్ అభిప్రాయపడ్డారు. “ఇప్పుడు యూరప్‌ ‘స్ట్రాటజిక్ ఆటానమీ’ గురించి మాట్లాడుతోంది. ఇది మునుపు మేము మాట్లాడిన మాటే. ఈ మల్టీపోలార్ వరల్డ్‌లో భారత్-యూరప్ సంబంధాలను మరింత బలపర్చడమే నా పర్యటన లక్ష్యం,” అని చెప్పారు.

Prisoners Exchange : రష్యా, ఉక్రెయిన్‌ల మధ్య యుద్ధ ఖైదీల మార్పిడి