Telangana : కవిత సస్పెన్షన్‌పై పీసీసీ చీఫ్ మహేశ్ గౌడ్ స్పందన

PCC Chief Mahesh Goud's response on Kavitha's suspension

Telangana : తెలంగాణ రాజకీయ వర్గాల్లో ఈ రోజు సంచలనాత్మక పరిణామం చోటుచేసుకుంది. బీఆర్‌ఎస్ పార్టీ అధ్యక్షుడు, మాజీ ముఖ్యమంత్రి కల్వకుంట్ల చంద్రశేఖర్ రావు తన కుమార్తె, ఎమ్మెల్సీ కల్వకుంట్ల కవితపై కఠిన నిర్ణయం తీసుకున్నారు. పార్టీ వ్యతిరేక కార్యకలాపాలకు పాల్పడుతున్నారన్న ఆరోపణలతో ఆమెను బీఆర్‌ఎస్ నుంచి తక్షణమే సస్పెండ్ చేస్తున్నట్టు పార్టీ అధికారికంగా ప్రకటించింది. ఈ నేపధ్యంలో తెలంగాణ పీసీసీ అధ్యక్షుడు మహేశ్ కుమార్ గౌడ్ స్పందిస్తూ, బీఆర్‌ఎస్ నేతల మధ్య జరిగే పరస్పర విమర్శలు, పార్టీ అంతర్గత నిర్ణయాలపై తమకేం సంబంధం లేదని స్పష్టం చేశారు. కవితను కాంగ్రెస్ పార్టీలో చేర్చుకునే ప్రసక్తే లేదని ఖరాఖండిగా తెలిపారు. ఆమెను పార్టీలోకి తీసుకొచ్చే అవసరం తమకు ఏమాత్రం లేదని ఆయన స్పష్టం చేశారు.

“బీఆర్‌ఎస్ అవినీతికి తానే నిదర్శనం”

మహేశ్ గౌడ్ మీడియాతో మాట్లాడుతూ..కవిత ఇటీవల చేసిన ఆరోపణలు చూస్తుంటే ఆమెకు జరిగిన అన్యాయం వల్ల కాదు… బీఆర్ఎస్‌లో జరిగిన అవినీతి లావాదేవీల్లో తేడాలు వచ్చాయన్న కోపమే స్పష్టంగా కనిపిస్తోంది. గత పదేళ్ల బీఆర్ఎస్ పాలనలో జరిగిన అవినీతి బాగోతాలన్నీ ఇప్పుడే గుర్తొస్తాయా? ఈ వ్యవహారాన్ని పూర్తి స్థాయిలో బహిర్గతం చేయాలని ఆమె బాధ్యతగా భావించి ముందుకు రావాలి అన్నారు.

కవితపై చర్యల వెనుక రాజకీయ వ్యూహమా?

బీఆర్‌ఎస్ అధిష్ఠానం ఈ నిర్ణయం తీసుకోవడానికి ప్రధాన కారణం కవిత ఇటీవల హరీశ్ రావు, సంతోష్ కుమార్, మేఘా కృష్ణారెడ్డిలపై గుప్పించిన విమర్శలే. అమెరికా పర్యటన ముగించుకుని వచ్చిన తర్వాత మీడియా సమావేశంలో కవిత,  కేసీఆర్ చుట్టూ ఉన్న కొందరు వ్యక్తులు తమ స్వార్థ ప్రయోజనాల కోసం భారీ కాంట్రాక్టర్లతో కుమ్మక్కయ్యారు. వారి వల్లే ఇప్పుడు సీబీఐ విచారణల ఎదుర్కోవాల్సి వస్తోంది  అంటూ తీవ్ర స్థాయిలో ఆరోపణలు చేశారు. కాగా, హరీశ్ రావు మీద ప్రత్యేకంగా టార్గెట్ చేస్తూ ఐదేళ్లు నీటిపారుదల శాఖ మంత్రిగా ఉన్న హరీశ్ రావుకు ఈ కుంభకోణంలో పాత్రలేదా?” అంటూ సూటిగా ప్రశ్నించారు. ఈ వ్యాఖ్యలను పార్టీ అత్యంత తీవ్రంగా పరిగణించి క్రమశిక్షణ చర్యలు తీసుకుంది.

పార్టీలో కలహాలెందుకు పెరిగాయి?

బీఆర్ఎస్‌లో నెలకొన్న అంతర్గత విభేదాలు వెలుగులోకి రావడమంటే, అది పార్టీ భవిష్యత్తుపై అనేక అనుమానాలకు తావిస్తోందని విశ్లేషకులు చెబుతున్నారు. ముఖ్యంగా కుటుంబ సభ్యుల మధ్యే ఈ స్థాయిలో పగటి బలుపు బయటపడటం గమనార్హం. దీనికి తోడు, పార్టీ ఓటమి తర్వాత నాయకత్వంపై అసంతృప్తి, అవకాశాల కోసం నాయకుల మధ్య పోటీ… ఇవన్నీ కలిసే ఇటువంటి పరిణామాలకు దారితీసినట్టు చెబుతున్నారు.

కవితకు రాజకీయంగా ముందున్న మార్గం ఏమిటి?

కవిత కాంగ్రెస్‌కి రారని మహేశ్ గౌడ్ క్లారిటీ ఇవ్వడంతో, ఆమె భవిష్యత్తు రాజకీయ ప్రస్థానంపై అనేక ప్రశ్నలు ఉత్పన్నమవుతున్నాయి. బీఆర్ఎస్‌లో తిరిగి ప్రవేశం సాధ్యమా? లేక ఆమె కొత్త రాజకీయ వేదిక ఏర్పాటుకు సిద్ధమవుతున్నారా? అనే చర్చలు రాజకీయ వర్గాల్లో ఊపందుకున్నాయి. ఈ పరిణామాలు బీఆర్‌ఎస్ పార్టీకి, కవిత రాజకీయ భవిష్యత్తుకి కీలక మలుపుగా మారనున్నాయన్నది స్పష్టంగా కనిపిస్తోంది. తెలంగాణ రాజకీయాల్లో ఇది కొత్త శకానికి నాంది కావచ్చు. మరోవైపు, కాంగ్రెస్ పార్టీ అయితే ఈ విషయంపై స్పష్టత ఇస్తూ, తమ పార్టీకి కవిత అవసరం లేదని, ఆమె చేసిన వ్యాఖ్యలతో అవినీతిపై అర్ధవంతమైన చర్చ మొదలవుతోందని భావిస్తోంది. ఇక,పై కవిత ఏమి నిర్ణయం తీసుకుంటారో, ఆమెపై బీఆర్‌ఎస్ అధిష్ఠానం ఇంకా ఏవైనా కఠిన చర్యలు తీసుకుంటుందా అన్నది వేచి చూడాల్సిన అంశమే.

Read Also: Nara Lokesh: కడపలో తొలి స్మార్ట్ కిచెన్ ప్రారంభించిన నారా లోకేశ్

Follow us