GHMC: సూప‌ర్ మార్కెట్ పై జీహెచ్ఎంసీ కొరఢా.. 7 రోజుల్లో క్లోజ్!

Ghmc

కూక‌ట్ ప‌ల్లి రెయిన్ బో విస్టా రాక్ గార్డెన్ విజేత సూపర్ మార్కెట్ పై జీహెచ్ఎంసీ అధికారులు కొర‌ఢాఝులిపించారు. సరైన నిర్వహణా ప్రమాణాలు పాటించకపోవడం… తరచుగా ఫిర్యాదులు వస్తున్న కారణంగా విజేత సూపర్ మార్కెట్ 7 రోజుల్లో ఖాళీ చెయ్యాలని జీహెచ్ఎంసీ మూసాపేట సర్కిల్ హెల్త్, శానిటేషన్ అధికారులు నోటీసులు జారీచేశారు. 18.10.2021 న వినియోగదారుల ఫిర్యాదు చెయ్యగా అప్పట్లో తనిఖీలు చేసిన జీహెచ్ఎంసీ అధికారులు ఆరోపణలు నిజమేనని గుర్తించి 5వేల రూపాయల జరిమాన విధించారు. అయినప్పటికీ సూపర్ మార్కెట్ యాజమాన్యం తీరు మారలేదు. దీంతో 21వ తేదీన‌ కస్టమర్ల ఫిర్యాదుమేరకు జీహెచ్ఎంసీ అసిస్టెంట్ మెడికల్ అధికారి సంపత్, ఫుడ్ ఇన్స్పెక్టర్ నిహారిక లు రెండోసారి తనిఖీలు నిర్వహించారు.

తనిఖీల సమయంలో కాలం చెల్లిన తినుబండారాలతో పాటు బొద్దింకలు, ఎలుకలను గుర్తించారు. దీంతో వినియోగదారుల ఆరోపణలు నిజమేనని అధికారులు నిర్ధారించారు. సూపర్ మార్కెట్ లోని ఆహార పదార్థాల శాంపిల్స్ సేకరించిన అధికారులు వాటిని ల్యాబ్ కు పంపారు. ఏడు రోజుల్లోగా సూపర్ మార్కెట్ మూసివేయాలని లేని పక్షంలో జీహెచ్ఎంసీ నిబంధనల ప్రకారం లీగల్ చర్యలు తీసుకోవాల్సి ఉంటుందని నోటీసులో అధికారులు పేర్కొన్నారు

Follow us