Stress: ఒత్తిడి భరించలేకపోతున్నారా? ఇలా చేస్తే సులువుగా భయటపడొచ్చు!

Stress: ఆధునిక జీవితంలో ఒత్తిడి అనేది మానవ జీవితంలో ఒక భాగం అయ్యింది. అది మన దైనందిన కార్యకలాపాలను, మానసిక, శారీరక ఆరోగ్యాన్ని తీవ్రంగా ప్రభావితం చేస్తున్నది.ఒత్తిడిని సమర్థవంతంగా తగ్గించుకోవడానికి కొన్ని ఆరోగ్యకరమైన చిట్కాలు పాటిస్తే చాలా బెనిఫిట్స్ ఉంటాయని ఆరోగ్య నిపుణులు చెబుతున్నారు.

ఒత్తిడి తగ్గించుకోవడానికి ఆరోగ్య చిట్కాలు

శారీరక శ్రమ ఒత్తిడిని తగ్గించడంలో కీలక పాత్ర పోషిస్తుంది. రోజూ కనీసం 30 నిమిషాల పాటు వ్యాయామం చేయడం వల్ల శరీరంలో ఎండార్ఫిన్లు విడుదల అవుతాయి, ఇవి సహజంగా మూడ్‌ని మెరుగుపరుస్తాయి. నడక, జాగింగ్, సైక్లింగ్ లేదా ఏదైనా క్రీడలో పాల్గొనడం మంచిది. అలాగే, ధ్యానం (మెడిటేషన్), యోగా ఒత్తిడిని తగ్గించడంలో అద్భుతంగా పనిచేస్తాయి. యోగా శారీరక భంగిమలు, శ్వాస వ్యాయామాలు, ధ్యానం కలయిక. ఇది మనసును ప్రశాంతంగా ఉంచడానికి, ఒత్తిడి హార్మోన్ల స్థాయిలను తగ్గించడానికి సహాయపడుతుంది. ప్రతిరోజూ ఉదయం లేదా సాయంత్రం 15-30 నిమిషాల పాటు యోగా చేయడం వల్ల గణనీయమైన మార్పును గమనించవచ్చు.

నిద్ర ప్రాముఖ్యత

ఒత్తిడి నిర్వహణలో సరిపడా నిద్ర చాలా ముఖ్యం. పెద్దలకు ప్రతీ రాత్రి 7-9 గంటల నాణ్యమైన నిద్ర అవసరం. నిద్ర లేకపోవడం వల్ల ఒత్తిడి హార్మోన్లైన కార్టిసాల్ స్థాయిలు పెరుగుతాయి. ఇది ఆందోళన, చిరాకుకు దారితీస్తుంది. మంచి నిద్ర కోసం, నిద్రవేళకు ముందు కెఫిన్, ఆల్కహాల్‌కు దూరంగా ఉండటం, బెడ్‌రూమ్‌ను చీకటిగా, నిశ్శబ్దంగా, చల్లగా ఉంచుకోవడం వంటివి పాటించాలి. క్రమంగా ఒకే సమయానికి నిద్రపోవడం, నిద్ర లేవడం అనేది జీవితానికి చాలా మేలు చేస్తుంది.

ఆహారం, ఒత్తిడి
ఆహారం కూడా ఒత్తిడిని ప్రభావితం చేస్తుంది. ఆరోగ్యకరమైన, సమతుల్య ఆహారం తీసుకోవడం వల్ల శరీరానికి అవసరమైన పోషకాలు లభిస్తాయి.ఇది ఒత్తిడిని తట్టుకోవడానికి సహాయపడుతుంది. ముఖ్యంగా పాలకూర, బ్రోకలీల్లో మెగ్నీషియం ఉంటుంది. ఇది ఒత్తిడిని తగ్గిస్తుంది. ఒమేగా-3 ఫ్యాటీ యాసిడ్స్ పుష్కలంగా ఉంటాయి.చేపలు (సాల్మన్), అవిసె గింజలు, చియా గింజలు ఒత్తిడిని, ఆందోళనను తగ్గిస్తాయి. ఇక సిట్రస్ పండ్లలో విటమిన్ సి అధికంగా ఉండే నారింజ, నిమ్మ వంటివి ఒత్తిడి హార్మోన్లను తగ్గిస్తాయి. నట్స్, సీడ్స్ అయిన బాదం, వాల్‌నట్స్, పొద్దుతిరుగుడు గింజలు విటమిన్ ఇ, బి విటమిన్లను కలిగి ఉంటాయి, ఇవి ఒత్తిడిని తగ్గించడంలో సహాయపడతాయి. డార్క్ చాక్లెట్ తింటే సెరోటోనిన్ ఉత్పత్తిని పెంచుతుంది, ఇది మూడ్‌ని మెరుగుపరుస్తుంది.

ఒత్తిడి తగ్గాలంటే ప్రాసెస్ చేసిన ఆహారాలైన అధిక చక్కెర, కెఫిన్ అధికంగా ఉండే పానీయాలకు దూరంగా ఉండటం మంచిది. ఎందుకంటే అవి ఒత్తిడిని పెంచుతాయి. ఈ ఆరోగ్యకరమైన అలవాట్లను పాటించడం ద్వారా ఒత్తిడిని నెమ్మదిగా తగ్గించుకోవచ్చు.