Nepal : నేపాల్‌లో కర్ఫ్యూ విధించినట్లు సైన్యం ప్రకటన

Nepal :  పొరుగు దేశమైన నేపాల్ ఈ మధ్య కాలంలో తీవ్రమైన ఉద్రిక్తతలకు కేంద్రబిందువుగా మారింది. ప్రత్యేకంగా ‘జెన్-జీ’ తరానికి చెందిన యువత చేపట్టిన నిరసనలు పెద్ద ఎత్తున హింసాత్మక రూపం దాల్చాయి. ప్రజా ఆందోళనలు నియంత్రణ కోల్పోవడంతో శాంతి భద్రతలు పూర్తిగా చెల్లాచెదురయ్యాయి. ఈ నేపథ్యంలో దేశాన్ని తిరిగి సామాన్య స్థితికి తీసుకురావడానికి నేపాల్ సైన్యం రంగంలోకి దిగింది. బుధవారం రాత్రి నుంచి గురువారం ఉదయం 6 గంటల వరకు నేపాల్ వ్యాప్తంగా కర్ఫ్యూ విధించబడింది. అత్యవసర సేవలకు మినహాయింపు ఇచ్చినప్పటికీ, సాధారణ ప్రజలకు ఇంట్లోనే ఉండాలన్న ఆదేశాలు జారీ అయ్యాయి. సైన్యం అన్ని కీలక ప్రాంతాల్లో బలగాలను మోహరించింది.

ఆందోళనలు పక్కదారి పట్టినట్టు సైన్యం ఆరోపణ

గత కొన్ని రోజులుగా జరుగుతున్న నిరసనల వెనుక ఉన్న ఉద్దేశ్యాలు ప్రశ్నార్థకంగా మారినట్లు సైన్యం పేర్కొంది. ఆందోళనల పేరుతో కొన్ని అరాచక శక్తులు దేశంలో విధ్వంసం సృష్టిస్తున్నాయి. ప్రభుత్వ ప్రైవేట్ ఆస్తులపై దాడులు జరుగుతున్నాయి. ప్రజలపై నేరస్తుల దాడుల అవకాశమూ ఉంది అని సైన్యం విడుదల చేసిన ప్రకటనలో వెల్లడించింది. బుధవారం జరిగిన హింసాత్మక ఘటనల నేపథ్యంలో సింఘ్ దర్బార్, సుప్రీంకోర్టు భవనాల వద్ద ఆందోళనకారులు నిప్పు పెట్టినట్లు సమాచారం. ఈ ఘటనలతో పాలనా యంత్రాంగం పూర్తిగా విఫలమైందని గుర్తించిన సైన్యం, పరిస్థితిని అదుపులోకి తెచ్చేందుకు హస్తక్షేపం చేసిందని అధికారికంగా తెలిపింది.

విధ్వంసక చర్యలకు పాల్పడితే కఠిన చర్యలు

ప్రస్తుతం కాఠ్మండు సహా ప్రధాన నగరాల్లో సైనిక బలగాలు టహాలు చేపడుతున్నాయి. కర్ఫ్యూ అమలులో భాగంగా రోడ్లపైకి వచ్చిన సైనిక సిబ్బంది, ప్రజలకు హెచ్చరికలు జారీ చేస్తున్నారు. “కర్ఫ్యూను ఉల్లంఘించినా, విధ్వంసక చర్యలకు పాల్పడినా కఠిన చర్యలు తప్పవు ” అని సైన్యం స్పష్టం చేసింది. అత్యవసర సేవల కోసం మాత్రమే అంబులెన్సులు, పారిశుద్ధ్య వాహనాలు, ఆరోగ్య కార్యకర్తల వాహనాలకు అనుమతి ఇచ్చారు. ఈ చర్యలు పూర్తిగా దేశంలోని శాంతిభద్రతలను కాపాడడానికేనని వారు స్పష్టం చేశారు.

అరెస్టులు, రాజకీయ ఉత్కంఠ

ఇప్పటికే హింసాత్మక ఘటనలకు సంబంధించి 27 మందిని సైన్యం అరెస్ట్ చేసింది. నిరసనల పర్యవసానంగా నేపాల్ ప్రధాని కేపీ శర్మ ఓలీ రాజీనామా చేసిన సంగతి తెలిసిందే. ఆయన రాజీనామా నేపథ్యంలో రాజకీయ భవిష్యత్తు ఎటు సాగుతుందన్న అంశంపై దేశవ్యాప్తంగా చర్చలు జరుగుతున్నాయి. సైన్యం తాజా పరిణామాల నేపథ్యంలో నిరసనకారుల ప్రతినిధులతో సంప్రదింపులు జరిపే ప్రయత్నాలు చేస్తోంది. రాజకీయ సమస్యలకు ప్రజాస్వామ్య పరిష్కారాలే మార్గమని స్పష్టం చేస్తూ, నిరసనలను శాంతియుతంగా ముగించాలన్న విజ్ఞప్తి చేస్తోంది.

పరిస్థితి గమనిస్తూ నిర్ణయాలు

ప్రస్తుత పరిస్థితిని బట్టి దేశవ్యాప్తంగా కర్ఫ్యూను మరికొన్ని రోజులు కొనసాగించాలా అనే అంశంపై అధికారులు చర్చిస్తున్నట్లు సమాచారం. నిరసనలు ఎటు దారి తీస్తాయన్న దానిపై ఇప్పటికే స్థానిక మాధ్యమాల్లో తీవ్ర చర్చ జరుగుతోంది. ప్రజలు హింసాత్మక మార్గాలను వదిలి శాంతియుతంగా వ్యవహరించాలని నేపాల్ సైన్యం విజ్ఞప్తి చేస్తోంది.

Read Also: AP : డిప్యూటీ సీఎం ఫొటో ఏర్పాటుపై నిషేధం లేదు: ఏపీ హైకోర్టు