H-1B: హెచ్-1 బీ, గ్రీన్ కార్డ్ అభ్యర్థులకు అలర్ట్.. ఇకపై కొత్త రూల్స్..!
- Author : Vamsi Chowdary Korata
Date : 10-07-2026 - 12:55 IST
Published By : Hashtagu Telugu Desk
అమెరికాలో ఉద్యోగం, శాశ్వత నివాసం కోసం ప్రయత్నిస్తున్న విదేశీయులకు యూఎస్ సిటిజన్షిప్ అండ్ ఇమ్మిగ్రేషన్ సర్వీసెస్ (USCIS) కీలక ప్రకటన చేసింది. హెచ్-1బీ వీసా, గ్రీన్ కార్డ్తో పాటు అన్ని రకాల వలస దరఖాస్తులపై సంతకాల విషయంలో మరింత కఠినమైన నిబంధనలను అమల్లోకి తీసుకొచ్చింది. జులై 10 నుంచి ఈ మార్పులు అమలులోకి రానున్నాయి. సరైన సంతకం లేకుండా సమర్పించిన దరఖాస్తులను ఎలాంటి సవరణకు అవకాశం ఇవ్వకుండా నేరుగా తిరస్కరించనున్నట్లు యూఎస్సీఐఎస్ స్పష్టం చేసింది. వలస ప్రక్రియలో పారదర్శకత పెంచడం, నకిలీ దరఖాస్తులను అడ్డుకోవడం, దరఖాస్తుదారుల అసలు గుర్తింపును ధ్రువీకరించడం ఈ నిర్ణయం వెనుక ప్రధాన ఉద్దేశమని అధికారులు తెలిపారు. గతంలో కొన్ని సందర్భాల్లో సంతకాల లోపాలను సరిచేసుకునే అవకాశం ఉండేది. అయితే తాజా నిబంధనల ప్రకారం ఆ అవకాశం ఉండదు. ఒకసారి దరఖాస్తు తిరస్కరించబడితే, అభ్యర్థి అన్ని వివరాలతో పాటు ఫీజును మళ్లీ చెల్లించి కొత్త దరఖాస్తు సమర్పించాల్సి ఉంటుంది.
యూఎస్సీఐఎస్ తెలిపిన వివరాల ప్రకారం, దరఖాస్తు ప్రారంభ దశలో స్వీకరించినా, తర్వాతి పరిశీలనలో సంతకం నిబంధనలకు అనుగుణంగా లేదని తేలితే కూడా దానిని తిరస్కరించే అవకాశం ఉంది. అందువల్ల ప్రతి దరఖాస్తుదారుడు సంతకాల విషయంలో ప్రత్యేక జాగ్రత్తలు తీసుకోవాలని అధికారులు సూచిస్తున్నారు. సంతకాల విషయంలో ఏవి చెల్లుబాటు అవుతాయనే దానిపై కూడా యూఎస్సీఐఎస్ స్పష్టమైన మార్గదర్శకాలు జారీ చేసింది. పెన్నుతో చేతితో చేసిన అసలు సంతకాన్నే ప్రామాణికంగా గుర్తిస్తారు. ఆన్లైన్లో దరఖాస్తు సమర్పించే వారు ముందుగా చేతితో సంతకం చేసిన ఫారమ్ను స్కాన్ చేసి అప్లోడ్ చేయవచ్చు. అలాగే ఫోటోకాపీ లేదా ఫ్యాక్స్ ద్వారా పంపిన సంతకాలనూ కొన్ని సందర్భాల్లో అంగీకరిస్తారు. అయితే టైప్ చేసిన పేరు, డిజిటల్ సిగ్నేచర్ సాఫ్ట్వేర్ ద్వారా రూపొందించిన సంతకాలు, ఆటో-పెన్ లేదా సిగ్నేచర్ స్టాంప్తో చేసిన సంతకాలు చెల్లవని స్పష్టం చేసింది. మైనర్లు లేదా ఆరోగ్య కారణాల వల్ల సంతకం చేయలేని వ్యక్తులు మినహా, న్యాయవాదులు లేదా ఇతర ప్రతినిధులు దరఖాస్తుదారుల తరఫున సంతకం చేయడం కూడా అనుమతించబడదని పేర్కొంది.
హెచ్-1బీ వీసా, గ్రీన్ కార్డ్ వంటి ముఖ్యమైన వలస దరఖాస్తులు సమర్పించే వారు ప్రతి ఫారమ్పై స్వయంగా చేతితో సంతకం చేయడం తప్పనిసరి. ఆన్లైన్లో అప్లికేషన్ సమర్పించే ముందు అన్ని సంతకం విభాగాలు పూర్తిగా నింపారో లేదో జాగ్రత్తగా పరిశీలించాలి. సంతకం చేసిన అసలు పత్రాలను భవిష్యత్తు అవసరాల కోసం భద్రంగా ఉంచుకోవాలని కూడా సూచించారు. నిపుణుల అభిప్రాయం ప్రకారం, సంతకానికి సంబంధించిన చిన్న పొరపాటు కూడా దరఖాస్తు తిరస్కరణకు దారితీసే అవకాశం ఉంది. దీంతో వీసా లేదా గ్రీన్ కార్డ్ ప్రక్రియలో అనవసరమైన ఆలస్యం ఏర్పడటమే కాకుండా అదనపు ఖర్చు కూడా భరించాల్సి రావచ్చు. అందుకే తాజా నిబంధనలను పూర్తిగా అర్థం చేసుకుని, అన్ని పత్రాలను నిబంధనలకు అనుగుణంగా సిద్ధం చేసి సమర్పించడం దరఖాస్తుదారులకు అత్యంత కీలకంగా మారింది.
Follow us
